जब ओलीको प्रस्तावविरुद्ध सुवास नेम्वाङसहित ६ जना पदाधिकारी उभिए

राजनीति

बीपी अनमोल आइतबार, मंसिर २६, २०७८ २१:०८

काठमाडौं– नेकपा एमालेको आइतबार सम्पन्न केन्द्रीय कमिटी बैठकले केन्द्रीय कमिटीका ४३ जना सदस्य मनोनित गरेको छ। त्यसैगरी ४५ सदस्यीय स्थायी कमिटी र ९९ सदस्यीय पोलिटब्यूरो टुंगो लगाएको छ। प्रदेशहरुका इन्चार्ज तोक्दै एमालेले नेताहरुको कार्य विभाजन समेत गरेको छ।

आइतबारको बैठकबाट यी विषय टुंग्याउँदा एमालेले जे निर्णय गर्‍यो, ती ओलीकै प्रस्ताव थिए। निर्णयमा ओलीकै प्रस्ताव अनुमोदन भए पनि बैठकमा ती प्रस्ताव प्रस्तुत हुँदा सहज अवस्था भएन। बैठक सकिएपछि कतिपय नेताहरुले सञ्चारमाध्यममै बैठकभित्र देखापरेका असन्तुष्टिहरु सार्वजनिक पनि गरे। बाहिर के कति कुरा आए वा आएनन् भन्ने फरक कुरा हो, तर बैठक भित्र भने ओलीले ठूलै विरोध सामना गर्नुपर्‍यो।

केन्द्रीय कमिटी सदस्यहरुको मनोनयन, स्थायी कमिटी र पोलिटब्यूरो गठनमा ओलीले जब नाम प्रस्ताव गरे, त्यसमा एमालेका पदाधिकारीहरुबाटै असन्तुष्टि प्रकट भयो। सबभन्दा पहिले एमाले सचिव योगेश भट्टराईले प्रस्तावमा असन्तुष्टि प्रकट गरेका थिए। उनले यसबारे पदाधिकारी टिममा समेत छलफल नगरिएको भन्दै असन्तुष्टि पोखेका थिए।

एमालेमा महाधिवेशनबाट निर्वाचित अध्यक्ष ओलीसहित १९ जना पदाधिकारी छन्। तिनै पदाधिकारीमा २६ जना थपेर ४५ सदस्यीय स्थायी कमिटी गठन गरिएको हो। योगेशले असन्तुष्टि पोखेलगत्तै उपाध्यक्ष अष्टलक्ष्मी शाक्यले पनि आफ्नो असन्तुष्टि व्यक्त गरिन्। बैठकमा सहभागी एक नेताका अनुसार शाक्यले पदाधिकारीहरुबीच यसबारे कुनै छलफल नै नभएको उल्लेख गर्दै भनेकी थिइन्, ‘कम्तीमा यसबारे पदाधिकारीहरु बीचमा छलफल गरिनुपर्थ्यो। छलफलसम्म नगरी एकलौटी रुपमा नामको सूची लिएर आइयो।’

त्यसपछि ओलीका ‘भित्रिया’मध्ये मानिने एमाले उपाध्यक्ष सुवासचन्द्र नेम्वाङले पनि छलफल नै नगरी नाम ल्याइएको भन्दै असन्तुष्टि जनाएका थिए। अर्का उपाध्यक्ष युवराज ज्ञवालीले एउटा मापदण्ड बनाएर निर्णय गरिएन भने समस्या सिर्जना हुने बताए। उनले पदाधिकारीहरुबीच छलफल नै नभएकोमा असन्तुष्टि जनाउँदै पार्टीलाई सामूहिक नेतृत्वमा चलाउन माग गरेका थिए।

उपाध्यक्ष सुरेन्द्र पाण्डे, सचिव गोकर्ण विष्टलगायतले पनि छलफल नै नगरी नाम ल्याइएको भन्दै असन्तुष्टि पोखेका थिए।

तर, त्यो असन्तुष्टिबीच पनि बैठकबाट तिनै नाम अनुमोदन भए जो ओलीले प्रस्ताव गरेका थिए।

घनश्यामले ‘धार्मिक सम्राट’को उदाहरण दिइरहँदा बोलेनन् ओली
आइतबारको बैठकमा एमाले केन्द्रीय सदस्य घनश्याम भुसालले पनि ओलीको प्रस्तावको चर्को आलोचना गरेका थिए। ओलीको प्रस्ताव आएलगत्तै भुसालले कुनै विधि र पद्दति टेकेर नामावली नआएको टिप्पणी गरेका थिए। उनले भूमिका बाँध्दै भनेका थिए, ‘धर्मका नाममा एक ताका धार्मिक सम्राटले आफ्ना आसेपासेहरुलाई राख्थे, धर्मको कुरा भएकाले अन्याय हुँदा पनि मान्छे बोल्न सक्दैन्थे, आज त्यस्तै भयो। जानाजान अन्याय गरियो।’

भुसाल यतिमै रोकिएनन्। उनले टंक कार्कीलाई पोलिटब्यूरोमा प्रस्ताव नगरिएकोमा झन् धेरै असन्तुष्टि जनाए। कार्की तिनै नेता हुन् जो महाधिवेशनमा ओलीको सूचीविरुद्ध ‘बागी’ बनेर सचिवको उम्मेदवार बने र पराजित भएका थिए। केन्द्रीय सदस्यमा पनि उनी पराजित भएको सूची एमाले निर्वाचन आयोगले सुरुमा सार्वजनिक गरेका थियो। तर, एक हप्ताभन्दा पछि भीम रावल पराजित भएको भन्दै उनलाई विजयी घोषणा गरिएको थियो।
चीनका लागि नेपाली राजदूत रहिसकेका कार्की पुराना एमाले नेता हुन्। धेरै कनिष्ठहरु पोलिटब्यूरामा अटाउँदा उनलाई नसमेटिएपछि भुसालले ओलीलाई बैठकमै भने, ‘मलाई पोलिटब्यूरो चाहिएको छैन। मेरो नाम काटेर टंक कार्कीलाई पोलिटब्यूरोमा राखिदिनुस्।’

आइतबारको बैठकबाट निस्कने क्रममा केही नेताहरुले त ‘हाम्रो पार्टीमा दुर्गा प्रसाईं आएको होइन, हामी दुर्गा प्रसाईंको पार्टीमा आएको अनुभूति भो’ भन्ने टिप्पणी गरेका थिए।

हुनपनि एमालेले कुनै राजनीतिक पृष्ठभूमि नै नभएका विवादास्पद पात्र प्रसाईंलाई केन्द्रीय सदस्य मनोनित गर्दा इतिहास बोकेका एमाले नेता नरेश खरेललाई सूचीमा पारेन। झापाका खरेलभन्दा प्रसाईं अब्बल ठहरिए। त्यतिमात्र होइन, प्रसाईंभन्दा दीपकप्रकाश भट्ट, सुरेन्द्र मानन्धर, योगेन्द्र शाही, अर्चना गहतराज, सुवास कर्माचार्य ‘अयोग्य’ ठहरिए। यी पाँचजना तिनै नेता हुन्, जसले चितवन महाधिवेशनमा केन्द्रीय सदस्यमा उम्मेदवारी दिएका थिए। तर, पछि मनोनित गर्ने भन्दै उनीहरुलाई उम्मेदवारी फिर्ता लिन लगाइएको थियो। ‘उम्मेदवारी फिर्ता लिनुस्, हामी मनोनित गरेर ल्याउँछौं भनेर (वर्तमान महासचिव) शंकर पोखरेललगायतका नेताहरुले आश्वस्त पार्नुभएको थियो’, ५ मध्येका एक नेताले भने, ‘दुर्गा प्रसाईंहरु भएपछि पार्टीलाई हाम्रो खाँचो परेन होला।’

श्रीमाया अटिनन्, जुलीलाई पोलिटब्यूरो
श्रीमाया थकाली एमालेको आठौं महाधिवेशनमै बैकल्पिक पोलिटब्यूरो सदस्य निर्वाचित भएकी थिइन्। नवौं महाधिवेशनपछि उनी पोलिटब्यूरो सदस्य बनिन्। तर, दशौं महाधिवेशनपछि भने उनलाई केन्द्रीय सदस्यमै सीमित राखिएको छ। आइतबार एमालेले गरेको पोलिटब्यूरो गठनमा उनी अट्न सकिनन्। लगातार ३ पटक केन्द्रीय सदस्य निर्वाचित ममता गिरी पनि पोलिटब्यूरोमा परिनन्।

बरु उनीहरुभन्दा निकै जुनियर जुली महतो एमाले पोलिटब्यूरो सदस्य बनेकी छन्। जुली ओलीनिकट एमाले नेता रघुबीर महासेठकी पत्नी हुन्। त्यस्तै सुजिता शाक्य पनि पोलिटब्यूरोमा परिन्। शाक्य एमाले महासचिव शंकर पोखरेलकी पत्नी हुन्। आफू पोलिटब्यूरोमा नअट्नुको कारण श्रीमायाले आइतबारको बैठकमै ओलीसँग मागेकी थिइन्। ‘म आठौं महाधिवेशनबाट बैकल्पिक पोलिटब्यूरो सदस्य भएँ, नवौंबाट पोलिटब्यूरोमा निर्वाचित भएँ। दशौं महाधिवेशनपछि म किन पोलिटब्यूरोका लागि योग्य बन्न सकिनँ? मेरो के योग्यता पुगेन?’