काठमाडौं– सहिद स्मारक ए डिभिजन लिगमा तीनै खेलमा पराजित भएको जावलाखेल युथ क्लब रेलिगेशन जोनमा रहेको छ।
त्यति मात्र होइन्, जावलाखेलले यी खेलमा गोल पनि गर्न सकेको छैन। यस्तो परस्थितिमा जावलाखेल रेलिगेशन जोनबाट निस्किन खोजिरहेको छ।
तर, बुधबार सम्पन्न तेस्रो खेलमा जाउलाखेलको त्यो प्रयासमा मछिन्द्र फुटबल क्लबले अंकुश लगाइदिएको छ।
त्रिपुरेश्वरस्थित दशरथ रंगशालामा जवाखेलले लिगमा लगातार तेस्रो हार व्यहोर्दा मछिन्द्र क्लबले लिगको दोस्रो जित निकालेको हो।
मछिन्द्रको जितका लागि जावलाखेलले एक गोल उपहार दियो भने अर्को गोल डिफेन्डर रन्जित धिमालले गरे। यो गोलसँगै ७ अंक बनाएको मछिन्द्र क्लब अंकतालिकाको दोस्रो स्थानमा उक्लिएको छ।
हारपछि जावलाखेलका प्रशिक्षक किशोर कुमार केसी गोलरक्षक टिकेन्द्र थापाको प्रदर्शनमा निराशा व्यक्त गरेका छन्।
‘आज हामीले दुवै गोल गोलरक्षकको गल्तिमा खाएका छौं’, केसीले भने, ‘धैर्यता राखेर खेलेको भए गोल खानुपर्ने थिएन।’
उनले आफू एक अंक लिने लक्ष्यका साथ आएपनि गोलरक्षकको गल्तिले सोचे जस्तो नतिजा नआएको बताए।
‘केटाहरुले प्रदर्शन त राम्रै गरेका हुन। तर, गोलकिपरले गल्ती गर्यो। एउटा त आत्मघाती नै भयो। दुवै गोलमा किपरको ठूलो गल्ती छ। बाँकी तर धेरै अट्याक भएन। यता हामीले चाहिँ पाएका अवसरलाई पनि सदुपयोग गर्न सकेनौं,’ उनले भने।
मछिन्द्रले रेलिगेसन जोनमा रहेको जावलाखेललाई खेलको सुरुआतबाटै दबाबमा राख्न सफल भएको थियो। मछिन्द्रको अगाडि फितलो डिफेन्स खेलेको जावलाखेलले पहिलो हाफमा नै २ गोल खान पुग्यो। दोस्रो हाफमा जावलाखेलमाथि हाबी भए पनि उत्साहित मछिन्द्रले गतिलो प्रहार गर्न भने सकेन, र खेल २-० गोल अन्तरमा टुङ्ग्यायो।
खेलको १४औं मिनेटमा मछिन्द्रले अग्रता लियो। जावलाखेलका डिफेन्डर सीमान्तले आफ्नै पोस्टमा गोल गर्न पुगे। मनिष डाँगीले दिएको कटब्याक क्रसलाई अभिषेक रिजालले प्रहार गर्न खोजेको बललाई बचाउने क्रममा सीमान्तले आफ्नै पोस्टतर्फ गोल गर्न पुगे। जारी लिगमा यो पहिलो आत्मघाती गोल हो।
२२औं मिनेटमा मछिन्द्रले अग्रता दोब्बर बनायो। रञ्जित धिमालले करिब २० यार्डबाट फस्ट बारतर्फ गरेको प्रहारलाई जावलाखेलका गोलरक्षक टेकेन्द्र सिंह थापाले ठम्याउन सकेनन्। नुर्लान नोभ्रुजोभलाई जावलाखेलका लोइस जिमी कोहाइमले लडाएपछि रेफ्रीले फउल दिएका थिए।
केसीले आउने दिनमा टोलीका नयाँ गोलरक्षकलाई मौका दिने बताएका छन्। ‘नयाँ गोलरक्षक छन्, तर खेलको अनुभव खासै नभएर नै जोखिम नलिएको हुँ । अब अर्को खेलमा दुई नयाँ मध्य एकलाई अवसर दिनेबारे सोच्नुपर्ने छ। अब आउने खेलमा रिस्क लिन्छु पनि होला,’ उनले भने।
दोस्रो हाफमा मैदान प्रवेश गरेका जावलाखेलका सुरजज्यू ठकुरीले ६२औं मिनेटमा गरेको प्रहार पनि क्रसबार छेउबाट बाहिरिएको थियो। राष्ट्रिय टिमबाट खेलिसकेका सुरज पहिलो रोजाईमा परेका थिएनन्।
राष्ट्रिय टोलीमा रहेका मिडफिल्डर सुरजलाई सुरुवात नगराएको भन्ने प्रश्नमा सुरजले दर्शकलाई खुसी पार्ने खेल खेलेपनि प्रशिक्षकलाई खुसी पार्ने खेल खेल्न नसकेको प्रशिक्षक केसीले बताए ।
‘उ राम्रो खेल्छ । तर, तपाईहरुलाई खुसी पार्ने होइन प्रशिक्षकलाई खुसी पार्ने खेल्नुपर्छ,’ उनले भने,‘आज पनि गल्ति गरिसकेको थियो । ’उनले सुरजले यस्तै खेल खेल्ने हो भने राष्ट्रिय टोलीमा पर्न गाह्रो हुने दाबी गरे।
‘जितेको बेला र हारेको बेला खेल्ने शैली फरक हुनुपर्छ। यस्तो प्रदर्शनले माथि जान गाह्रो हुन्छ। उसलाई नै पनि राष्ट्रिय टोलीमा रहन यस्तो खेलले सम्भव हुँदैन,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790846254.jpg)
-1786602170.png)
