काठमाडौं- पहिलो खेलमा न्युरोड टिम (एनआरटी)लाई पराजित गर्दै सहिद स्मारक ए डिभिजन लिगमा विजयी सुरुआत गरेको डिफेन्डिङ च्याम्पियन मछिन्द्र फुटबल क्लबले आफ्नो अपराजित यात्रालाई कायमै राख्दै अंक तालिकाको दोस्रो स्थानमा उक्लिएको छ।
त्रिपुरेश्वरस्थित दशरथ रंगशालामा बुधबार सम्पन्न दिनको दोस्रो खेलमा राष्ट्रिय टोलीका खेलाडी प्रेरित मछिन्द्रले जावलाखेल युथ क्लबलाई २-० गोल अन्तरले पराजित गर्दै अंक तालिकाको दोस्रो स्थानमा उक्लिएको हो।
मछिन्द्रले रेलिगेसन जोनमा रहेको जावलाखेललाई खेलको सुरुआतबाटै दबाबमा राख्न सफल भएको थियो। मछिन्द्रको अगाडि फितलो डिफेन्स खेलेको जावलाखेलले पहिलो हाफमा नै २ गोल खान पुग्यो। दोस्रो हाफमा जावलाखेलमाथि हाबी भए पनि उत्साहित मछिन्द्रले गतिलो प्रहार गर्न भने सकेन, र खेल २-० गोल अन्तरमा टुङ्ग्यायो।
मछिन्द्रका लागि एक मात्रै गोल डिफेन्डर रन्जित धिमालले गरेका थिए भने एक गोल जावलाखेलका डिफेन्डर सीमान्त थापाले आत्मघाती गोलको उपहार दिएका थिए।
खेलको १०औं मिनेटमा ओनगुना जुनियरले करिब ३० यार्डबाट गरेको शक्तिशाली प्रहार क्रस बारमाथिबाट बाहिरिएको थियो। त्यसको ३ मिनेटमै मिडफिल्डर अमिर श्रेष्ठले गरेको हाइ फ्लाइ प्रहार क्रस बारभन्दा अलिकति माथिबाट बाहिरिँदा जावलाखेलले अग्रता लिने मौका चुकाएको थियो।
खेलको १४औं मिनेटमा मछिन्द्रले अग्रता लियो। जावलाखेलका डिफेन्डर सीमान्तले आफ्नै पोस्टमा गोल गर्न पुगे। मनिष डाँगीले दिएको कटब्याक क्रसलाई अभिषेक रिजालले प्रहार गर्न खोजेको बललाई बचाउने क्रममा सीमान्तले आफ्नै पोस्टतर्फ गोल गर्न पुगे। जारी लिगमा यो पहिलो आत्मघाती गोल हो।
खेलको २०औं मिनेटमा जावलाखेलले अर्को मौका खेर फ्याँक्यो। कोरा कोनेले दिएको पासमा जुनियरले मछिन्द्रका डिफेन्डरलाई बिट गर्दै गरेको प्रहारले गोल लाइन क्रस गरे पनि रेफ्री सुमन श्रेष्ठले अफसाइड दिए। उनको निर्णयविरुद्ध जुनियरले आपत्ति जनाए पनि रेफ्री श्रेष्ठ आफ्नो निर्णयमा अडिग रहे।
२२औं मिनेटमा मछिन्द्रले अग्रता दोब्बर बनायो। रञ्जित धिमालले करिब २० यार्डबाट फस्ट बारतर्फ गरेको प्रहारलाई जावलाखेलका गोलरक्षक टेकेन्द्र सिंह थापाले ठम्याउन सकेनन्। नुर्लान नोभ्रुजोभलाई जावलाखेलका लोइस जिमी कोहाइमले लडाएपछि रेफ्रीले फउल दिएका थिए।
पहिलो हाफको इन्ज्युरी समयमा जावलाखेलले खेलमा पुन: फर्किने मौका खेरा फाल्यो। मछिन्द्रको डिफेन्सबाट बल खोस्दै मिडफिल्डर रुपबहादुर लामाले करिब २० यार्डबाट गरेको प्रहार फ्रेममा पर्न सकेन।
खेलको ५८औं मिनेटमा मछिन्द्रका डिफेन्डर देवेन्द्र तामाङको हेडर प्रहारलाई जावलाखेलका डिफेन्डरले क्लियर गरिदिए। मिडफिल्डर विशाल राईले प्रहार गरेको कर्नरमा 'अनमार्क'मा रहेका देवेन्द्रले बललाई फ्रेममा खसाउन सकेनन्।
उनले ६२औं मिनेटमा गरेको प्रहार फस्ट बार नजिकैबाट बाहिरियो। ६४औं मिनेटमा जुनियरले कर्नर लाइनबाट दिएको पासलाई जिमीले सदुपयोग गर्न सकेनन्। उनले दिएको पासलाई जिमीले टच गर्न नसक्दा गोललाइन छुँदै बल बाहिरिएको थियो।
७२औं मिनेटमा मछिन्द्रले २-० को अग्रतालाई अगाडि बढाउने मौका गुमायो। नुर्लानलाई डिफेन्डर गौरभ श्रेष्ठले फउल गरेपछि रेफ्रीले फ्रिकिक दिएका थिए। कप्तान सुजल श्रेष्ठले छाडेको बलमा ओमोलजा करिमले गरेको प्रहारलाई मिड लाइनमा रहेका गोलरक्षक थापाले पञ्च गरेका थिए।
माथिल्लो बार हुँदै बाहिर लागेको बललाई कर्नर लाइनबाट सुनिल बलले बाइसाइकल किक प्रहार गरे पनि गोल लाइन टच हुनुपूर्व नै एसिस्टेन रेफ्री सुकराम तामाङले अफ साइडको सङ्केत दिए।
८८औं मिनेटमा सुनिलले 'वान भर्सेस वान'मा गोल गर्न सकेनन्। बीच मैदानबाट आएको पासलाई अनमार्कमा रहेका सुनिलले डिबक्स बाहिरबाट गरेको प्रहार क्रस बार माथिबाट बाहिरिएको थियो।
जितसँगै मछिन्द्र दोस्रो स्थानमा उक्लिएको छ। मछिन्द्र अंक तालिकाको शीर्ष स्थानमा रहेको सातदोबाटोभन्दा गोलअन्तरले पछाडि छ। मछिन्द्र र सातदोबाटोको तीन खेलबाट समान ७ अंक रहेको छ। मछिन्द्रले पहिलो खेलमा एनआरटीलाई २-१ गोल अन्तरले पराजित गरेको थियो भने विभागीय टोली त्रिभुवन आर्मीसँग गोलरहित बराबरीमा खेल सक्काएको थियो।
यता, पराजित जावलाखेल तीनै खेलमा निराशाजनक खेल प्रदर्शन गर्दै आएको छ। उसले अंक तालिकाको तेस्रो स्थानमा रहेको मनाङ मर्स्याङ्दी र विभागीय टोली नेपाल पुलिस क्लबसँग समान १-० गोल अन्तरको हार बेहोरेको थियो। जावलाखेल र विभागीय टोली सशस्त्र प्रहरी बल (एपीएफ) रेलिगेसन जोनमा रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
