राजनीति

निर्वाचनका लागि एमालेको ‘गाउँ फर्क’ अभियान : सबै केन्द्रीय नेतालाई भूगोलमा खटाउने तयारी

बीपी अनमोल मंगलबार, मंसिर २१, २०७८ १७:२५

काठमाडौं- पार्टीको १०औं राष्ट्रिय महाधिवेशन सम्पन्न गरेको प्रमुख प्रतिपक्षी दल नेकपा (एमाले)ले निर्वाचनलाई लक्षित गर्दै देशैभर अभियान तीव्र पार्ने भएको छ। मङ्सिर १० देखि १४ गतेसम्म चितवनमा सम्पन्न भएको महाधिवेशनबाट नयाँ नेतृत्व चयन भएपछि एमाले निर्वाचनलाई लक्षित गरेर त्यसमा होमिन लागेको हो।

महाधिवेशनबाट नयाँ नेतृत्व चयन भएपछि सौराहामै बसेको पहिलो केन्द्रीय कमिटीको बैठकमा अध्यक्ष केपी शर्मा ओलीले पार्टीको सम्पूर्ण शक्ति निर्वाचनलाई लक्षित गरेर अघि बढ्ने बताएका थिए। उनले केन्द्रीय सदस्यहरुलाई आ-आफ्नो क्षेत्रमा खटिएर निर्वाचनको तयारीमा जुटन निर्देशन दिएका थिए।

आउँदो मङ्सिर २५-२६ मा बोलाइएको केन्द्रीय कमिटी बैठकबाट अबको रणनीतिक योजना पारित गरेर एमालेले देशव्यापी नेता कार्यकर्ता परिचालन गर्ने तयारी गरेको छ। एमाले केन्द्रीय कार्यालयका सचिव एवं केन्द्रीय सदस्य शेरबहादुर तामाङले पार्टीको अबको लक्ष्य निर्वाचन नै भएको बताए।

‘मङ्सिर २५ देखि सुरु हुने केन्द्रीय कमिटीको बैठकले नेताहरुको जिम्मेवारी बाँडफाँट गर्नेदेखि प्रस्ट कार्ययोजना निर्माण गर्नेछ,’ उनले भने, ‘अब सबै नेता कार्यकर्ता आ-आफ्नो भूगोलमा परिचालन हुने छन्।’

एमालेले माघ १५ गतेभित्र सातवटै प्रदेश र ७७ वटै जिल्लाका अधिवेशनहरु गर्ने तयारी गरेको छ। यी अधिवेशनका मिति केन्द्रीय कमिटी बैठकले नै तय गर्नेछ। ‘बैठकले स्थायी कमिटी र पोलिटब्यूरोको गठन गर्नेछ,’ उनले भने, ‘नेताहरुलाई कामको जिम्मेवारी पनि तत्कालै तोकिनेछ।’

४५ सदस्यीय स्थायी कमिटी र ९९ सदस्यीय पोलिटब्यूरो
नेकपा (एमाले)ले आउँदो केन्द्रीय कमिटीको बैठकबाट ४५ सदस्यीय स्थायी कमिटी र ९९ सदस्यीय पोलिटब्यूरो गठन गर्ने भएको छ। त्यसका लागि एमाले अध्यक्ष ओली, महासचिव शंकर पोखरेलसहित ओलीको 'कोर टिम'ले आवश्यक गृहकार्य अघि बढाएको छ।

‘१९ सदस्यीय पदाधिकारीसहित थप २६ जना थपेर स्थायी कमिटी बन्छ। त्यसपछि स्थायी कमिटीमा अन्य नेताहरु थपिएर पोलिटब्यूरो निर्माण हुन्छ,’ ओलीनिकट एक नेता भन्छन्, ‘अहिले नै को पर्ने, नपर्ने भन्दा पनि काम, क्षमता, योग्यताका हिसाबले नेताहरु समेटिने छन्।’

स्थायी कमिटी र पोलिटब्यूरो सदस्य बन्नका लागि एमालेभित्र केन्द्रीय सदस्यहरुले दौडधुप पनि जारी राखेका छन्। तर, ओली र उनको 'कोर टिम'ले आवश्यक अध्ययन गरेर नै क्षमतावान नेताहरुलाई राखेर कमिटी बनाउने तयारी गरिरहेको छ।

एमालेले सातवटै प्रदेश र जिल्लाका इन्चार्ज पनि तोक्ने तयारी गरेको छ। कार्यालय सचिव तामाङले नेताहरुको जिम्मेवारी तोक्ने विषयमा पर्खने काम नहुने बताए। ‘अब हुने निर्वाचनमा पार्टीले एक्लै बहुमत ल्याउने हिसाबले हाम्रो तयारी अघि बढ्छ,’ तामाङ भन्छन्, ‘त्यस हिसाबले पनि नेताहरुलाई भूगोलमा खटाउन ढिला नगरेर तत्कालै सबै टुङ्‍गो लगाउँछौं।’

तीन महिने पार्टी प्रवेश र घर फर्क अभियान
एमालेले आउँदो केन्द्रीय कमिटीको बैठक सम्पन्न भएलगत्तै देशैभर तीन महिने पार्टी प्रवेश र घर फर्क अभियान चलाउने बताएको छ। सौराहामा नवनिर्वाचित केन्द्रीय कमिटीको शपथपछि बसेको पहिलो बैठकमै अध्यक्ष ओलीले देशभर अभियान चलाउने बताएका थिए।

‘हामी तीन महिने पार्टी प्रवेश अभियान र घर फर्क अभियान चलाउँछौं,’ तामाङले भने, ‘एमालेमा देखिएको आकर्षणअनुसार अन्य पार्टीबाट प्रवेश गर्न चाहने र अलमलमा रहेका पूर्वएमालेका कार्यकर्ताका लागि पनि घर फर्क अभियान सञ्चालन हुन्छ।’

उनले अन्य पार्टीबाट एमालेमा प्रवेश गर्न चाहने र पूर्वएमालेका अधिकांश कार्यकर्ता पनि पुनः एमालेमै फर्किन चाहेको भन्दै त्यसका लागि छलफल भइरहेको बताए। एमालेले यहीकारण केन्द्रीय कमिटीमा मनोनीत गर्ने १० प्रतिशत केन्द्रीय सदस्यको विषयमा भने तत्कालै निर्णय नगर्ने देखिएको छ।

निर्वाचनअघि १५ लाख पार्टी सदस्य
देशैभर सञ्चालन हुने तीन महिने अभियानबाट आउँदो निर्वाचनसम्म एमालेले पार्टी सदस्यता सङ्ख्या १५ लाख पुर्‍याउने लक्ष्य राखेको छ। त्यसका लागि रणनीतिक रुपमा कार्यक्रम सञ्चालन गर्ने एमालेले जनाएको छ। दशौं राष्ट्रिय महाधिवेशनको पूर्वसन्ध्यासम्म एमालेको पार्टी सदस्यता सङ्ख्या आठ लाख नाघिसकेको छ।

‘अहिले कायम रहेका पार्टी सदस्यको तुलनामा दोब्बर सङ्ख्या बढाउने हिसाबले तयारी गर्दै छौं,’ तामाङले भने, ‘हामी नयाँ सदस्य बनाउनेदेखि नवीकरण गर्न बाँकी रहेकाहरुको नवीकरणको काम गर्छौं।’

असार २८ गते सर्वोच्च अदालतको परमादेशपछि सत्ताबाट बाहिरिएको एमालेले अबको निर्वाचनमा एक्लै दुईतिहाइ बहुमत ल्याउने दाबी गर्दै आइरहेको छ। एमाले अध्यक्ष ओलीले प्रतिस्पर्धी दलहरुलाई एक्ला-एक्लै चुनावमा भिड्न चुनौती दिँदै आएका छन्।

गठबन्धनमा रहेका पाँच दल मिलेर प्रतिनिधि सभाको निर्वाचनसम्मै जाने बताइरहेका बेला एमाले आक्रामक रुपमा निर्वाचनलक्षित अभियानमा होमिन लागेको हो। पदाधिकारीदेखि केन्द्रीय कमिटी सदस्यहरुलाई भूगोलमै केन्द्रित गराउने रणनीति एमालेको छ।