काठमाडौं– बलिउड अभिनेता विक्की कौशल र कट्रिना कैफ अहिले चर्चामा छन्। उनीहरुले विवाह गर्न लागेका कारण पनि यो चर्चा चुलिएको हो। मंगलबारबाट भारतको राजस्थान उनीहरुको विवाह कार्यक्रम सुरु भएको छ।
९ डिसेम्बरमा उनीहरु विवाह बन्धनमा बाँधिदै छन्। विक्की र कटरीना स्वयंले विवाहको बारेमा कही पनि नखुलाएको भएपनि उनीहरु दुवै जना सोमबार नै विवाह स्थलमा पुगेको भारतीय सञ्चारमाध्यमले उल्लेख गरेका छन्।
विवाह बन्धनमा बाँधिन लागेका यी दुई बलिउड कलाकार हालसम्म एउटै फिल्ममा देखिएका छैनन् भन्दा चाहिँ अच्चम लाग्छ। हालसम्म विक्की र कट्रिनाले सँगै फिल्ममा काम गरेका छैनन्। बलिउडमा दुवै जना सफल कलाकार भएपनि हालसम्म उनीहरुले एउटै पर्दामा भने काम गर्ने मौका पाएका छैनन्।
त्यसो भए कसरी प्रेम सम्बन्धमा बाँधिए त विक्की र कट्रिना?
विक्की र कट्रिनाको प्रेम सम्बन्ध स्थापित हुनुमा भारतीय निर्देशन, निर्माता तथा टेलिभिजनका प्रस्तोता करण जोहरको भूमिका छ। जब करणले आफ्नो कार्यक्रम ‘कफी विथ करन’मा कट्रिनालाई प्रश्न गर्दै आगामी दिनमा ‘को सँग काम गर्न मन छ?’ भनेर सोध्दा उनले विक्कीको नाम लिएकी थिइन्। यो कुरा करणले आफ्नो कार्यक्रममा विक्कीलाई बोलाउँदा सुनाएका थिए। आफ्नो नाम कट्रिनाले लिएको सुनेपछि विक्कीले भने टेलिभिजन कार्यक्रम सेटमा छातीमा हात राख्दै ‘बेहोस्’ भएको नाटक गरेका थिए।
यसरी सुरु भएको दुईको प्रेम सम्बन्धले २०१९ मा थप विस्तारित रुप लिएको थियो।
विक्कीले सन् २०१९ मा ‘स्टार स्क्रिन अवार्ड’मा कट्रिननालाई विवाहको प्रस्ताव गरेका थिए। विक्कीले आफू कट्रिनाको निकै ठूलो प्रसंशक भएको बताउँदै विवाहको मौसम भइरहेकाले कट्रिनालाई ‘एक विक्की कौशल खोजेर विवाह गर्नु’ भन्दै जिस्काएका थिए। त्यसपछि भने विक्कीले कट्रिनालाई ‘मसँग विवाह गर्छौं?’ भनेर सोधेका थिए, जसको जवाफमा कट्रिनाले भने ‘हिम्मत छैन’ भनेकी थिइन्।
यो सबै घटना बलिउडका अर्का हस्ती सलमान खानको अघि भइरहेको थियो। अवार्ड कार्यक्रममा एक अर्कालाई जिस्काइरहेका दुवै गुपचुप रुपमा भने एकअर्कासँग प्रेम सम्बन्धमा बाँधिदैं थिए। त्यो घटनापछि बलिउडमा यी दुईको सम्बन्धको बारेमा चर्चा सुरु भएको थियो।
उक्त घटनापछि विक्की र कट्रिना धेरै ठाउँमा सँगै देखिएका थिए। विक्कीलाई कैयौं पटक कट्रिनाको घर बाहिर पनि देखिएको थियो। सन् २०१९ को आईफा अवार्डमा पनि दुवै सँगै देखिएका थिए। लगातार सँगै तस्बिर देखिन थालेपनि विक्की र कट्रिना दुवैले आफूहरु प्रेम सम्बन्धमा भएको स्वीकार गरेका थिएनन्।
यसरी सुरु भएको दुईको प्रेम सम्बन्ध कैयौं पटक सामाजिक सञ्जालमा पनि देखिएको थियो। एउटै ‘हुडी’मा दुवैले फोटो राख्नेदेखि विक्कीको छातीमा निदाएको फोटोसम्म सामाजिक सञ्जालमा राखेर कट्रिनाले पछि हटाएकी थिइन्।
गत महिना दिपावलीको अवसरमा भारतीय निर्देशक कबीर खानको घरमा गुपचुप रुपमा ‘रोका’ समारोह गरेका उनीहरुले त्यसपछि भने विवाह गर्ने भन्दै चर्चा चुलिएको थियो।
विक्की र कट्रिनाको राजस्थानमा हुने विवाहमा १२० जना पाहुनालाई बोलाइएको भारतीय सञ्चारमाध्यमले जनाएका छन्। विवाहका लागि हरेक पाहुनालाई ‘सिक्रेट कोड’ दिनेदेखि करौडौं खर्च गरेर होटल बुक गरिएको र विवाह कार्यक्रम चार दिनसम्म चल्ने जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786157138.png)
-1786184812.png)
