काठमाडौं– अजयी मार्टिनको ह्याट्रिकसँगै सातदोबाटो युथ क्लबले सहिद स्मारक‘ ए’ डिभिजन लिगको शीर्ष स्थानमा उक्लिएको छ।
शुक्रबार त्रिपुरेश्वरस्थित दशरथ रंगशालामा सम्पन्न दिनको दोस्रो खेलमा विभागिय टोली एपीएफ फुटबल क्लबलाई ४–१ को फराकिलो अन्तरले हराउँदै सातदोबाटो शीर्ष स्थानमा पुगेको हो।
पहिलो हाफको अन्त्यतिर मार्टिनले सातदोबाटोका लागि २ गोल गरेका थिए। यस्तै, दोस्रो हाफमा उनले एक गोल गरे भने सुशिल राईले पनि गोल गरे। यता, एपीएफले भने एक गोल उपहार पाएको थियो।
४२औं मिनेटमा मार्टिनल गोल गर्दै सातदोबाटोलाई अग्रता दिलाएका थिए। कप्तान मानबहादुर तामाङको फ्रिकिक प्रहारलाई पेनाल्टी बक्सबाट एपीएफका खेलाडीले बल क्लियरको प्रयास गरेका थिए। तर, रिबाउन्डमा प्राप्त बललाई सुदीप गुरुङले पास निकाले। त्यहि बलमा मार्टिनले पेनाल्टी बक्सबाट एपीएफका गोलरक्षक दिलकुमार लिम्बुलाई कुनै मौका नदिइ गोल गरे।
१९औं मिनेटमा एपीएफका पहिलो रोजाईका गोलकिपर अमृत चौधरी घाइते भएपछि उनको स्थानमा दिलकुमारले पोष्ट सम्हालेका थिए। अमृतको खुट्टामा चोट लागेको छ।
यस्तै, पहिलो हाफको इन्जुरी समयमा उनले अर्को गोल गरे। पासाङ लामाले दिएको पासमा मार्टिनले प्रहार गरेको बललाई दिलकुमारले फुस्काएका थिए, त्यहि बलमा मार्टिनले हेडर गर्दै अग्रतालाई दोब्बर बनाए।
दोस्रो हाफको सुरुमै एपीएफले गोल गर्दै खेलमा फर्कने संकेत गरेको थियो। ४८ औं मिनेट आशिष लामाले दिएको बलमा विकी तामाङले पोस्टतर्फ प्रहार गरेका थिए। त्यहि बल रोक्ने क्रममा विश्वास उदासले आत्मघाती गोल गरे।
त्यसको दुई मिनेट बित्न नपाउँदै सुशिल राईले गोल गर्दै सातदोबाटोलाई ३–१ को अग्रता दिलाए। एपीएफका तीन रक्षकलाई छक्काउँदै सुशिलले गोल गरेका थिए।
मार्टिनले ५८ औं मिनेटमा ह्याट्रिक पूरा गरे। सुदीपको पासलाई गोलरक्षकले पूर्ण रुपमा नियन्त्रणमा लिन नसकेपछि नजिक रहेका मार्टिनले सहजै गोल गरे। जारी लिगमा ह्याट्रिक गर्ने मार्टिन पहिलो खेलाडी बनेका छन्।
जारी लिगमा यो सर्वाधिक गोल भएको खेल हो। यो जितसँगै सातदोबाटो ७ अंकका साथ अंक तालिकाको शीर्ष स्थानमा उक्लेको छ। एपीएफले भने लगातार तेस्रो खेलमा हार बेहोरेको छ।
सातदोबाटोले पहिलो खेलमा फ्रेन्ड्ससँग बराबरी खेलेको थियो। दोस्रो खेलमा थ्रीस्टारलाई १–० ले स्तब्ध पारेको थियो। ब्रिगेड ब्वाइज क्लबसँग पहिलो खेलमा ३–२ को हार बेहोरेको एपीएफले दोस्रो खेल च्यासलसँग १–० ले गुमाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
