काठमाडौं– पछिल्लो वर्ष (२०७६) को शहीद स्मारक ए डिभिजन लिगमा फ्रेन्ड्सले तीन पटकको लिग विजेता थ्रीस्टारविरूद्व १-० को जित निकालेको थियो। ४६ सालयता शीर्ष डिभिजनमा थ्रीस्टारमाथि निकालेको यो नै पहिलो जित हो, फेन्ड्सको।
करिब तीन दशकमा यसअघि ललितपुरका यी दुई टिमबीच १७ पटक भेट भएको थियो। जसमध्ये २ खेल बराबरीमा टुङ्गिएको थियो भने १५ पटक ए डिभिजन लिगमा प्रभुत्व जमाएको थ्रीस्टारले जित निकालेको थियो।
यिनै दुई टिमबीच एक अर्को ललितपुर डर्बीमा शुक्रबार त्रिपुरेश्वरस्थित दशरथ रंगशालमा १८औं पटक भेट भएको छ, शहीद स्मारक लिग ए डिभिजनअन्तर्गत तेस्रो खेलमा।
खेलको सुरुआती समयदेखि नै थ्रीस्टारमाथि हाबी भएको फ्रेन्ड्सले आधा दर्जनभन्दा बढी प्रहार गरेपनि कुनै पनि फ्रेममा पर्न सकेन। यता, थ्रीस्टारले पनि पाएको केही मौकालाई सदुपयोग गर्न नस्कदा पहिलो हाफ गोलरहित बराबरीमा सकिएको थियो। तर, दोस्रो हाफमा भने दुवै टोलीले १-१ गोल गर्दै बराबरीको श्रृङ्खलालाई ३ मा पुर्याएका छन्।
तेस्रोपटक बराबरीमा खेल सकाउन फेन्ड्सका गार्सिया जुडे र थ्रीस्टारका मिक्चेन तामाङले १–१ गोल गरे।
खेलको चौथौ मिनेटमा नै फ्रेन्ड्सले अग्रता लिने मौका गुमायो। फ्रेन्ड्सका खेलाडीले अगाडितर्फ उडाएको बललाई राफायल रिमले ब्याट हेडर गर्दा अनन्त तामाङबीच तालमेल नमिल्दा फ्रेन्ड्सले मौका पाएको थियो। तर, उसका फरवार्ड प्रिजेन तामाङले थ्रीस्टारका गोलरक्षक प्रिसो अगाडि बढेको अवस्थामा करिब ३५ यार्डबाट गरेको प्रहार प्रिसोले पञ्च गर्दै बाहिर पठाइदिए।
यस्तै, २२औं मिनेटमा डिफेन्डर प्रेमबहादुर भण्डारीले दिएको लामो पासलाई ट्रिनिडाड एण्ड टोबागोका मिडफिल्डर गार्सिया जुडेले कनेक्ट गरे पनि सदुपयोग गर्न सकेनन्। उनले प्रहार गरेको बल थ्रीस्टारका डिफेन्डर अनन्तलाई लाग्दै बाहिरियो।
त्यसको तीन मिनेट भित्रै थ्रीस्टारले अर्को मौका पनि खेर फाल्यो। मिडफिल्डर हेमन्त थापामगरले दिएको पासलाई सञ्जोक राईले ग्रास बल प्रहार गरेपनि पोस्टको दिशा लिन सकेन।
३४औं मिनेटमा फ्रेन्ड्सका जुडेले करिब ३५ यार्डबाट गरेको प्रहार फ्रेममा परेन र अग्रताको मौका चुकायो।
३६औं मिनेटमा कप्तान प्रकाश बुढाथोकीले अर्को मौका गुमाए। जुडेले दिएको पासलाई नियन्त्रणमा लिएर प्रहार गरे पनि फ्रेममा परेन।
४०औं मिनेटमा फेन्ड्सका सुशील लामाको प्रहार थ्रीस्टारका अनन्त र गोलरक्षक प्रिसोले तालमेल गर्दै बचाए। सुशिलको ग्रासबल प्रहार अनन्तलाई लाग्दै बाहिर जान लागेको बललाई प्रिसोले मुस्किलले बचाए।
दोस्रो हाफमा भने दुवै टोलीले सुधारिएको खेल प्रदर्शन गरेका थिए। फलस्वरुप दुवै टोलीबाट १-१ गोल निस्किएको थियो।
५०औं मिनेटमा थ्रीस्टारको अर्को मौका गुमायो। सञ्जोकले ट्रिनिडाड एण्ड टोबागोका डिफेन्डर पाउल एन्थोनीलाई बिट गर्दै दिएको पासलाई ऋतिक कुमार खड्काले वान भर्सेस वानमा जाली चुमाउन सकेनन्।
५१औं मिनेटमा फ्रेन्ड्सले अग्रता लियो। मैदानको बीच भागबाट आएको लामो पासलाई कप्तान प्रकाशलले नियन्त्रणमा लिँदै डिफेन्डर रिम र फरवार्ड आयुष घलानललाई छक्काउँदै दिएको हाइ पासलाई जुडोले हेडरमार्फत् गोल गरे।
७५औं मिनेटमा सञ्जोकले थ्रीस्टारलाई खेलमा फर्काउने मौका गुमाए। रिमले मिलाइदिएको पासमा सञ्जोकले डिबक्स बाहिरबाट गरेको प्रहार सेकेन्ड बारमा लागेर फर्किएको थियो।
७९औं मिनेटमा फेन्ड्सका कप्तान प्रकाशको प्रहारलाई थ्रीस्टारका डिफेन्डर अनन्तले स्लाइड गर्दै रोकिदिए।
८२औं मिनेटमा थ्रीस्टार खेलमा फर्कियो। ऋितिकले फेन्ड्सका खेलाडीबाट बल थुत्दै दिएको पासलाई रामवाइले ड्राइभ हेडर गर्न खोजेपनि सुरज विश्वकर्माले उनको टाउको माथिबाट बचाएका थिए। क्लियर नभएको उक्त बललाई मिडफिल्डर मिक्चेन तामाङले जाली चुमाए।
त्यसको दुई मिनेटपछि नै सञ्जोकले दिएको हाइ पासलाई गोलरक्षक राहुल यादवले अगाडि बढेर पञ्च गरेका थिए। त्यसपछि ऋतिकले खाली पोस्टमा गरेको प्रहारलाई फेन्ड्सका डिफेन्डरहरुले हेडर गरेर बचाइदिए।
८७औं मिनेटमा अनन्तको हेडरले दिशा लिएन। हेमन्तको कर्नरमा गोलरक्षक राहुल यादव अगाडि बढेको अवस्थामा उनले गरेको हेडर प्रहार पोस्ट माथिबाट बाहिरियो। त्यसपछि दुवै टिमबाट गोल हुन सकेन र ११ अंक बाँडे।
पहिलो खेलमा च्यासल युथ क्लबलाई ३–० ले पराजित गरेको थ्रीस्टार दोस्रो खेलमा सातदोबाटोसँग १–० ले स्तब्ध बनेको थियो।
यता, पहिलो खेलमा सातदोबाटोसँग गोलरहित बराबरी खेलेको फ्रेन्ड्स दोस्रो खेलमा संकटासँग अग्रता जोगाउन नसक्दा २–१ ले पराजित भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
