काठमाडौं– नेकपा माओवादी केन्द्र आफ्नो आगामी राष्ट्रिय सम्मेलनलाई नीतिगत छलफलमा केन्द्रित गर्ने जनाएको छ। बिहीबार बसेको स्थायी समितिको बैठकले राष्ट्रिय सम्मेलनलाई शक्ति प्रदर्शनभन्दा पनि पार्टीको आगामी मार्गदर्शन र नीति निर्माणमा केन्द्रित गर्ने निर्णय गरेको हो।
माओवादी केन्द्रका स्थायी कमिटी सदस्य लीलामणि पोखरेलका अनुसार राष्ट्रिय सम्मेलन पुस ११ देखि १३ गतेसम्म काठमाडौंको कमलादीस्थित प्रज्ञा प्रतिष्ठानको भवनमा हुने छ।
सम्मेलनको उद्घाटन र बन्दसत्र प्रज्ञा प्रतिष्ठानकै भवनमा हुने पोखरेलले बताए। 'हामीले आमसभा नगर्ने निर्णय गरेका छौं। कोरोना भाइरस संक्रमणको जोखिमका बीच भिडभाड हुने गरी आमसभा नगर्ने निर्णय भयो,' पोखरेलले भने।
सम्मेलनमा १ हजार ६०० देखि २ हजारसम्म प्रतिनिधिहरु सहभागी हुने जनाइएको छ। ३ दिनसम्म चल्ने सम्मेलनले पार्टीको आगामी नीति पारित गर्न पोखरेलले जानकारी दिए।
सम्मेलनमा अध्यक्ष पुष्पकमल दाहाल (प्रचण्ड)ले राजनीतिक र सांगठनिक प्रतिवेदन पेस गर्ने छन्।
माओवादी केन्द्रका प्रवक्ता कृष्ण बहादुर महराका अनुसार बिहीबार बसेको स्थायी समिति बैठकमा वडा र पालिका अधिवेशनको समीक्षा भएको छ। वडा र पालिका अधिवेशनहरु सफलताका साथ सम्पन्न भएको निष्कर्ष निकालिएको महराले जानकारी दिए। केही पालिकाहरुमा स्थगित भएको सम्मेलन शुक्रबारसम्म सकिने महराको भनाइ छ।
बिहीबारको बैठकमा ७ वटै प्रदेशबाट वडा र प्रदेश अधिवेशनको रिपोर्टिङ भएको र थप छलफलका लागि शुक्रबार बिहान ११ बजे पुन: बैठक बस्ने महराले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
