काठमाडौं– राष्ट्रिय प्रजातन्त्र पार्टीका अध्यक्ष पशुपति शमशेर जबराले आफू अहिले कुनै पनि उम्मेदवारको पक्षमा नरहने निर्णय गरेका छन्।
जबराले मंगलबार पार्टी कार्यालय चाबहिलमा पत्रकार सम्मेलन गर्दै आफू निर्वाचन भन्दा एकता महाधिवेशनको पक्षमा रहेको बताए। सर्वसम्मतिका लागि पहल गर्ने भन्दै उनले आफू अहिले कुनै पक्षमा नलागेको बताए।
आजै अर्का अध्यक्ष प्रकाशचन्द्र लोहनीले अध्यक्षका उम्मेवार राजेन्द्र लिङ्देनलाई सर्मथन गरेका थिए। अध्यक्षका प्रतिस्पर्धी कमल थापा र जबराले अब नयाँ पुस्तालाई नेतृत्व दिनुपर्ने तर्क गर्दै लोहनीले लिङ्देनलाई सर्मथन गरेका थिए।
अध्यक्ष जबरासँग देशभरको नेटवर्क भएकाले आफ्नो पक्षमा पार्ने लबिइङ दुवै पक्षले गर्दै आएका थिए। मंसिर १५,१६ र १७ गते काठमाडौमा हुन गइरहेको राप्रपाको महाधिवेशनबाट नयाँ नेतृत्व चयन हुनेछ। जबराले आफूले पार्टी एकताका लागि अध्यक्षमा उम्मेदवारी नदिने निर्णय गरेको पनि बताए।
‘म पार्टी एकता र सहमतिका लागि अध्यक्ष पदमा अलग रहेर पार्टीमा सक्रिय रहन्छु’, उनले भने, ‘मेरो जिम्मेवारी, भूमिका जारी रहने छ। मुलुकको राष्ट्रियता र प्रजातन्त्रका लागि लड्ने छु। वैकल्पिक प्रजातन्त्रिक शक्तिको रूपमा राप्रपालाई अघि बढाउने छु।’
जबराले आफूले सकभर सर्वसम्मतको प्रयत्न गर्ने सर्वसम्मत नभए निर्वाचन हुने उनले बताए।
‘राप्रपा अझै शक्तिशाली भएर अघि बढ्नुपर्ने अहिलेको आवश्यकता हो। सर्वसम्पत रूपमा नेतृत्व चयन गर्ने हो’ जबराले भने ‘अन्तिम समयसम्म सहमतिको प्रयास नै गर्ने हो। हुन नसके लोकतान्त्रिक प्रक्रिया छँदै छ।’
अध्यक्षमा उठ्न डराउनु भएको हो? भन्ने प्रश्नमा उनले आफू नडराएको तर, अहिलेको आवश्यकता भनेको आपसमा लड्ने नभएको जिकिर गरे।
धेरैले आफूलाई अध्यक्षको प्रतिस्पर्धाबाट बाहिर नजान सुझाव दिएका भन्दै उनले तरपनि सर्वसहमतिमा नेतृत्व चयन होस् र पार्टी सशक्त रूपमा अघि बढोस् भनेर प्रतिस्पर्धा गर्न नचाहेको बताए।
‘कहिलेकाहीँ पछाडी बसेर धकेल्दा पनि धेरै गर्न सकिन्छ भन्ने विश्वास गरेर मैले यो कठोर निर्णय लिएको छु’, उनले भने ‘यो निर्णयद्वारा मैले राजनीतिबाट सन्यास लिएको होइन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751533150.jpg)
-1749826086.png)
