काठमाडौं– राष्ट्रिय प्रजातन्त्रको आगामी नेतृत्वका लागि कमल थापा र राजेन्द्र लिङ्देलबीच प्रतिस्पर्धा हुने देखिएको छ। महाधिवेशन नजिकिँदै गर्दा अध्यक्षका दुई प्रत्यासी आफूलाई 'बलियो' सावित गर्न अनेक प्रयास गरिरहेका छन्।
थापा र लिङ्देनबीच सवाल–जवाफसँगै आरोप–प्रत्यारोप पनि चल्न थालेको छ। कमल थापाले लिङ्देनलाई अध्यक्ष हुनका लागि अझै ४ वर्ष पर्खन भनेका छन्। थापाले अध्यक्षको दौडका कुद्न आउन पनि लिङ्देनलाई चुनौती दिएका छन्।
लिङ्देनले मंगलबार थापाको सवालको जवाफ दिएका छन्। उनले आफू अध्यक्षको उम्मेदवार बन्नमा थापाको पनि लगानी रहेको बताए। ‘मैले उम्मेदवारी घोषणा गर्दैमा कसैले अपमानित हुनु पर्दैन,’ लिङदेनले भने, ‘म बन्नुमा उहाँ (कमल थापा)को पनि लगानी छ।’
यसअघि थापाले लिङ्देनको उम्मेदवारी घोषणाप्रति टिप्पणी गर्दै अध्यक्ष हुन हतार नगर्न बताएका थिए। अझै पुरानो पुस्ता बाँकी रहेकाले अध्यक्ष बन्न लिङ्देनको पालो नआएको उनको भनाइ थियो।
त्यसको जवाफमा लिङ्देनले पुस्ता र उमेरको कुरा गरेर मात्रै अध्यक्षको उम्मेदवार बन्ने घोषणा नगरेको बताए। ‘उमेर र पुस्ताको कुरा मात्रै होइन। उमेरको कुरा गर्ने हो भने राप्रपाकै नेता राजाको आशिर्वाद लिएर ३०–४० वर्षको उमेरमा पनि मन्त्री भएका थिए, ’ उनले भने, ‘त्यसबेला हामीले सोधेका थियौं र ? यो राप्रपा मात्र होइन, देश बचाउने सन्देश लिएर जाने कुरा हो।’
कमल थापा राजाबाट मन्त्री हुदाँ आफूहरुले कहिल्यै पनि प्रश्न नगरेकाले अहिले उनले अरुमाथि उठाउन नसक्ने लिङ्देनको भनाइ छ। राप्रपालाई बचाउन पार्टीभन्दा बाहिरका मान्छे पनि ल्याउनुपर्ने भन्दै कार्यकर्ताको कुरा सुन्न पनि लिङ्देनले थापालाई आग्रह गरे।
थापाले देशभरका आम कार्यकर्ताको भावनाको सम्मान गर्दै राप्रपालाई अझै बलियो बनाएर लैजान आफू उठ्ने र राप्रपालाई पहिलो शक्ति बनाएर मात्रै विश्राम लिने भनेका थिए। त्यसका जवाफमा लिङदेनले आफू मात्रै नभन्न र कार्यकर्ताको कुरा सुन्न भनेका छन्।
‘राप्रपालाई बचाउन राप्रपाभन्दा बाहिरको मान्छे ल्याउनुपर्छ। सम्पूर्ण कार्यकर्ताको कुरा सुन्नुस्,’ लिङदेनले भने, ‘यहाँभन्दा बाहिरको कुरा सुन्नुस्। राप्रपा भित्रको मात्रै कुरा सुन्दा ३ प्रतिशतमा खुम्चिनुपरेको कुरालाई स्मरण गर्नुहोला।’
अहिलेको अवस्थामा नेतृत्व परिवर्तन नभए राप्रपा अन्य दलको दलाली गरेर २/४ वटा मन्त्री पद पाउने पार्टीमा मात्रै सीमित उनको टिप्पणी थियो। केपी शर्मा ओली नेतृत्वको पहिलो सरकारमा थापा परराष्ट्र मन्त्री बनेर राप्रपा सरकारमा सहभागी भएको थियो। लिङ्देनले ओली सरकारमा सहभागिताको विषयतर्फ संकेत गर्दै यस्तो भनेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768546075.png)
-1764146706.png)
-1768395492.png)
