सौराहा(चितवन)- नेकपा एमालेको दशौं राष्ट्रिय महाधिवेशनमा मतदान जारी छ। मतदान मंगलबार बिहान ४ बजेपछि सुरु भएको थियो। विहान सवा ९ बजेसम्म १६ सय बढी मत खसेको एमाले निर्वाचन आयोग सदस्य बाबुराम दाहालले नेपाल लाइभलाई जानकारी दिए। उनका अनुसार मतदाताहरु उत्साहजनक रुपमा मतदानमा सहभागी भइरहेका छन्।
२१७५ जना प्रतिनिधि रहेको एमाले महाधिवशेनमा कार्यव्यस्तताका कारण कतिपयले महाधिवेशन छाडेर फर्किसकेकाले केही कम मत खस्न सक्ने सम्भावना रहेको दाहालले बताए। 'कसैको निजी कामले जानु भएको हुनसक्छ नभए शतप्रतिशत मत खस्छ' उनले भने।
५० वटा क्लस्टरमा मतदान गर्नुपर्नेमा ४० वटामा निर्विरोध भइसकेको र अहिले १० वटा क्लस्टरमा मात्र भोटिङ भइरहेको उनले जानकारी दिए।
मत दिएर फर्किएका केहीलाई मतदान गर्न पाँच मिनेट मात्र समय लागेको भएपनि केहीलाई २५ मिनेटसम्म लागेको आफूले पाएको दाहालले बताए।
'बाहिर फर्किएकालाई सोध्दा पाँच मिनेटमा सकेँ भन्ने पनि भेटेँ, २५ मिनेट लाग्ने पनि भेटेँ ' उनले भने, 'एभरेजमा एक जनालाई भोट खसाल्न १० मिनेट लाग्छ।'
दाहालका अनुसार साढे ११ बजेभित्रमा मतदान सकिने अपेक्षा आयोगले गरेको छ।
त्यसपछि केही प्राविधिक कुरा सकाएर मतगणना गर्न थालिने उनले बताए। मत गणना गर्न १ देखि २ घण्टा लाग्ने उनको भनाइ छ।
'भोटिङ मसिन हो। नेटवर्किङ गरेको भए एक क्लिकमा हुन्थ्यो। उम्मेदवारलाई एक कम्प्युटरबाट अर्कोमा जोडिएको छ भन्ने आशंका लाग्न सक्ने भएका कारण सबै कम्युटर अलग अलग छन्। कम्प्युटरमा जोडेर गर्नु पर्ने भएकाले १ देखि २ घण्टा लाग्न सक्छ' दाहालले भने।
निर्वाचन आयोगले निर्वाचन आचार संहिता कडाइका साथ लागू गरिरहेको उनले बताए।
अध्यक्षका उम्मेदवार भीम रावलले आफूलाई भोट नहाल्न आह्वान गरेर पर्चा वितरण गरिएको भन्दै आपत्ति जनाएपनि आफूहरुले त्यस्तो नभेटेको उनको दाबी छ।
'पर्चा बाँढियो भनेर कसैले पनि औपचारिक रुपमा उजुरी र जानकारीको दिएको छैन। ठूलठूला प्रचार सामाग्री वितरण गरेको पाइएको छैन। कहि फोटो कपि गरेको पायौं। त्यसलाई हामीले भेटेको जति जफत गर्यौं। संस्थागत रुपमा भएको जस्तो लागेन। कसैले व्यक्तिगत रुपमा गरेको हुनसक्छ' उनले भने।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।