काठमाडौं- नेकपा एमालेमा अध्यक्षमा प्रत्यासी भीम रावलले आफूले केन्द्रीय कमिटी सदस्यको लागि उम्मेदवारी नदिएको बताएका छन्। मंगलबार बिहान मतदानपछि पत्रकारहरुसँग कुरा गर्दै उनले अध्यक्षमा लड्ने मान्छेले सदस्यमा उम्मेदवारी नहाल्ने बताए।
‘मैले सदस्यमा उम्मेदवारी हालेको थिइनँ। तर, स्क्रिन (विद्युतीय भोटिङ मेसिन)मा मेरो नाम रहेछ। सदस्यमा मेरो उम्मेदवारी होइन,’ उनले भने, ‘अध्यक्षमा लड्ने मान्छेले सदस्यमा उम्मेदवारी हाल्दैन। त्यहाँ रहेछ। सम्भवतः बढी भोट आउन सक्छ।’
पदाधिकारीको उम्मेदवारहरुलाई स्वतः केन्द्रीय कमिटी सदस्यको पनि उम्मेदवारको रुपमा राखिएको छ। रावलले भने आफूले अध्यक्ष पदको लागि मात्रै उम्मेदवारी फाराम भरेको बताए।
‘केन्द्रीय सदस्यमा आफूलाई स्वीकार गर्दिनँ। मैले उम्मेदवारी नै दिएको छैन,’ उनले भने, ‘मैले पहिले पनि सपथ गरेको होइन। अहिले पनि गर्दिनँ। अध्यक्ष भइनँ भने केन्द्रीय सदस्य पनि बन्दिनँ।’
आठौं महाधिवेशनमा उपाध्यक्षमा पराजित भएका रावलले लामो समय केन्द्रीय सदस्यको सपथ ग्रहण गरेका थिएनन्। माधव नेपालले मन्त्री बनाउने भनेपछि मात्रै उनले सपथ गरेका थिए।
रावलले मतपरिणामलाई आफूले सहज रुपमा लिने बताए। ‘सदस्यता नवीकरण, वितरण र प्रतिनिधि चयनमा व्यापक रुपमा अनियमितता भएका छन्। मैले अगाडि नै भनेको हो। तैपनि मतपरिणामलाई सहज रुपमा नै लिन्छु,’ उनले भने।
रावलले आफूले देश, जनता र लोकतन्त्रको हितमा काम गरिरहेको भन्दै पराजित भएको अवस्थामा पनि त्यसलाई निरन्तरता दिने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771045886.png)
-1764146706.png)
-1770562345.jpg)
