फाइल तस्बिर
काठमाडौं- सहिद स्मारक लिग ए डिभिजन लिगका गत वर्षका विजेता मछिन्द्र फुटबल क्लब र उपविजेता हुन् विभागीय टोली त्रिभुवन आर्मी फुटबल क्लब।
त्यस लिगको अन्तिम तथा निर्णायक खेलमा यिनै दुई टोली भिडेका थिए। त्यस खेलमा बराबरीको नतिजा निकाले आर्मीका लागि पर्याप्त थियो, उपाधि जित्नका लागि।
तर, मछिन्द्रलाई भने उक्त खेल जित्नैपर्ने दबाब थियो। तर, उक्त खेलमा अभागी ठहरियो आर्मी। अन्तिम तथा निर्णायक खेलमा उसले जित त निकाल्नै सकेन उल्टै विकास तामाङले आत्मघाती गोल गरेर मछिन्द्रलाई उपाधिसमेत दिलाइदिए।
ती टोलीको भेट भने करिब दुई वर्षपछि उही त्रिपुरेश्वरस्थित दशरथ रंगशालामा सोमबार लिग चरणको दोस्रो खेलमा भयो। करिब चार हजार दर्शकमाझ भएको खेल यसपल्टको लिगको सबैभन्दा ठूलो खेलमध्ये एक हो।
सोमबार दशरथ रंगशालामा भएको यी दुई टोलीबीचको नतिजाले पूरा प्रतियोगितामा निर्णायक असर पार्ने आकलन गरिएको थियो। किनभने, मछिन्द्रले जितेमा लिग लिडर मनाङ मर्स्याङ्दीलाई असर गर्ने थियो। यस्तै, आर्मीले जिते चार अंकका साथ लिगमा अन्य टोलीलाई चुनौती दिने थियो। मच्छिन्द्रले पहिलो खेलमा न्यूरोड टिम (एनआरटी)लाई २-१ ले पराजित गरेको थियो भने आर्मीले विभागीय डर्बीमा पुलिससँग १-१ गोलको बराबरी खेलेको थियो। त्यसैले यी दुई क्लब अर्को खेल आफ्नो पक्षमा पार्ने योजना थिए।
तर, खेल भने सोचेजस्तो भएन। अधिकांश समय प्रतिस्पर्धात्मक जस्तो देखिने खेलमा दुवै टोलीबाट गोलका प्रयास भए पनि सफल हुन सकेन। खेलको पहिलो हाफमा मछिन्द्र क्लब आर्मीमाथि हाबी भए, तर पाएको मौकालाई भने सदुपयोग गर्न सकेन। जसकारण खेलको पहिलो हाफ गोलरहित बराबरीमा सकिएको थियो।
खेलको पाँचौं मिनेटमा आर्मीका डिफेन्डर सन्तोष तामाङलाई मछिन्द्रका मिडफिल्डर आन्द्रे नियाले फउल गरेपछि रेफ्री प्रज्वल क्षेत्रीले खेल रोकेका थिए। उक्त निर्णयविरुद्ध आपत्ति जनाएपछि नियालाई रेफ्री क्षेत्रीले पहेँलो कार्ड देखाएका थिए।
२६औं मिनेटमा मछिन्द्रले गोलको अवसर खेर फ्याँक्यो। रञ्जित धिमालको क्रसमा नुर्लान नोभ्रुजोभको ‘ब्याकहिल’लाई गोलरक्षक विकेश कुथुले नियन्त्रणमा लिन नसकेको बललाई सुनिल बलले गोल लाइनबाट प्रयास गरे पनि डिफेन्डर तामाङले ‘क्लियर’ गरिदिए।
त्यसपछिका समयमा भने मछिन्द्रले आर्मीको पोस्टमा आक्रमण बुन्न सकेन। यता, आर्मीले पनि मच्छिन्द्रको पोस्टमा खासै आक्रमण बुन्न सकेन। र, पहिलो हाफ गोलरहित बराबरीमा सकिएको थियो।
खेलको ४९औं मिनेटमा मछिन्द्रका मिडफिल्डर विशाल राई र नुर्लानले उत्कृष्ट मुभ सिर्जना गरेका थिए। विशालले दिएको पासलाई नुर्लानले ‘कनेक्ट’ गरेर डीबक्स एरियाबाट विशाललाई दिए पनि उनले प्रहार गर्न सकेनन्।
६१औं मिनेटमा सुनिल बलले करिब ३० यार्डबाट प्रहार गरेको फ्रिकिक बललाई आर्मीका गोलरक्षक विकेशले मुस्किलले बाहिर पठाइदिएका थिए। त्यसपछि सुनिलले प्रहार गरेका दुई कर्नरलाई नै आर्मीका डिफेन्डरले क्लिएर गर्दिए। त्यसपछि पनि दुवै टोलीले केही आक्रामक खेल खेल्ने प्रयार गरे पनि गोल गर्न भने सफल भएनन्। र, दुवै टोलीले १/१ अंक बाँडे।
हुन त पछिल्ला पाँच संस्करणलाई आधार मान्ने हो भने यी दुई क्लबको नतिजा मिश्रित छन्। २०७८ मा मछिन्द्र विजयी रहेको थियो भने २०७५ मा आर्मीले ३-० जित नतिजा निकालेको थियो।
त्यो वर्ष मछिन्द्र लिगको १३औं स्थानमा रहेको थियो। मछिन्द्र त्यसवर्ष रेलिगेसनबाट मुस्किलले बचेको थियो, किनभने त्यस लिगमा टिम तल झर्ने व्यवस्था नै थिएन।
२०७० को खेल भने १–१ को बराबरीमा रह्यो। त्यो वर्ष आर्मी आफैं रेलिगेसनको तनावबाट गुज्रेको थियो। आर्मीले त्यस वर्ष १०औं स्थानमा रहेर लिग सकाएको थियो।
२०६९ मा यी टिम दुईपल्ट भिडेका थिए। पहिलो खेल मछिन्द्रले १-० ले जित्यो भने अर्को खेल १-१ को बराबरीमा सकिएको थियो। २०६८ को खेल भने गोलरहित बराबरीमा सकिएको थियो। यो बराबरीसँगै आर्मीको उपाधि होडमा भने धक्का लागेको छ। यस नतिजाले अन्य खेलमा आर्मीलाई जित्नैपर्ने दबाब रहनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
