काठमाडौं– नेकपा (एमाले)का नेता भीम रावलले चितवनमा जारी १०औं राष्ट्रिय महाधिवेशनमा धाँधलीको संकेत देखिएको आरोप लगाएका छन्।
आइतबार साँझ सामाजिक सञ्जाल ट्वीटरमा एक ट्वीट गर्दै उनले दिनभरि बैठक नगरेर प्रतिनिधिहरूलाई अलपत्र बनाउने र संस्थागत छलफल नगरी राति ७ बजे बैठक हुने सूचना जारी गर्नु धाँधलीको संकेत रहेको बताएका हुन्।
‘दिनभरि बैठक नगरेर प्रतिनिधिहरूलाई अलपत्र बनाउने र संस्थागत छलफल नगरी राति ७ बजे बैठक हुने सूचना जारी गर्नु अलोकतान्त्रिक कार्य मात्र होइन, धाँधलीको संकेत पनि हो,’ उनले लेखेका छन्,‘यसले जनताको बहुदलीय जनवादअन्तर्गत प्रतिस्पर्धाको राजनीतिमाथि आघात पुग्छ।’
एमालेको शनिबार बन्दसत्रले सर्वसम्मतिमा नेतृत्व चयन गर्ने अधिकार अध्यक्ष केपी शर्मा ओलीलाई दिएको थियो। त्यसका आधारमा ओलीले आज दिनभर नेताहरूसँग छलफल गरी सूची तयार गरेको बताइएको छ।
उनले तयार पारेको सूची आज राति ८ बजेदेखि चितवनको सौराहास्थित होटल सेभन स्टार परिसरमा बस्ने बन्दसत्रमा पेस गरिने छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।