सौराहा– नेकपा एमालेको १०औं महाधिवेशनअन्तर्गत दोस्रो दिनको बन्दसत्र फेरि १ घण्टाका लागि सरेको छ।
यसअघि माइकिङ गरेर बेलुकी ७ बजे सुरु हुने भनिएको बन्दसत्र अब ८ बजे सुरु हुने भएको हो।
नेकपा एमालेका केन्द्रीय कार्यालय सचिव शेरबहादुर तामाङले बन्दसत्र ८ बजेदेखि सुरु हुने जानकारी दिए।
दोस्रो दिनको बन्दसत्र बिहान १० बजेदेखि नै सुरु हुने भनिएको थियो। तर, एमाले अध्यक्ष केपी शर्मा ओली पक्षकै नेताहरुबीच पद 'बाडफाँट'मा कुरा नमिलेपछि दिनभरी बन्दसत्र सुरु हुन सकेन।
१०औं महाधिवेशनबाट सर्वसम्मत अध्यक्ष हुने भनिएका अध्यक्ष ओलीको चाहनामा समेत उपाध्यक्ष भीम रावलले 'उम्मेदवार घोषणा'ले धक्का पुर्याइदिएको छ।
शनिबार पहिलो दिनको बन्दसत्रबाट पार्टी पदाधिकारी र केन्द्रीय सदस्यहरुको सूची तयार पार्ने जिम्मा अध्यक्ष ओलीलाई दिइएको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।