काठमाडौं- नेपाली कांग्रेसका वरिष्ठ नेता रामचन्द्र पौडेलले कांग्रेसको आन्तरिक लोकतन्त्रमा गम्भीर खतरा रहेको बताएका छन्।
आइतबार काठमाडौंमा आफूद्वारा लिखित हाते पुस्तक ‘कांग्रेसको अबको बाटो (रुपान्तरणको १० सूत्र)’ सार्वजनिक गर्दै वरिष्ठ नेता पौडेलले कांग्रेसभित्रको आन्तरिक लोकतन्त्रमा गम्भीर खतरा रहेको औँल्याएका हुन्।
कांग्रेस संस्थापनपक्षले निर्वाचनको क्रममा सत्ताको प्रयोग गर्दै आफू अनुकूल गरिरहेको भन्दै उनले आन्तरिक लोकतन्त्रको लागि खतरा महसुस गरेको बताए। उनले भने, ‘निर्वाचनका क्रममा जे हामीले भोग्यौँ। निर्वाचनहरु सम्पन्न हुँदा प्रशासन, प्रहरीको जसरी कहीँ बल प्रयोग, कहीँ छल प्रयोग, कहीँ सल प्रयोग। सल, बल, छल। त्यसैले सत्ताको प्रयोग भइरहेको छ। यो पनि पार्टीभित्र आन्तरिक डेमोक्रेसीका लागि, आन्तरिक लोकतन्त्रका लागि एउटा गम्भीर खतरा बनिरहेको महसुस भइरहेको छ।’
वरिष्ठ नेता पौडेलले राजनीतिक दलहरुलाई लोकतान्त्रीकरण गर्नुपर्ने आवश्यकता रहेको बताए। राजनीतिक दलका कारण निमुखा जनताको अधिकारमाथि हस्तक्षेप भएको भन्दै उनले राजनीतिक दलहरुलाई निमुखा जनताको पहरेदार बनाउनुपर्ने बताए। दलको सदस्यलाई विशेष सहुलियत दिने तर निमुखा जनताको अधिकार कुण्ठित गरिने अवस्था रहनु चिन्ताको विषय भएको उनको भनाइ छ।
वरिष्ठ नेता पौडेलले लोकतान्त्रिक प्रक्रियाबाटै निर्वाचित भएर सत्तामा पुग्ने व्यक्तिको असीमित महत्त्वाकांक्षाले लोकतन्त्रमाथि नै संकट पैदा हुने खतरा रहेकाले यस्तो प्रवृत्तिबाट लोकतन्त्र जोगाउने प्रयत्न गर्नुपर्नेमा जोड दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
