काठमाडौं- नेकपा (एमाले)को २०७८ असोज १५ देखि १७ सम्म आयोजना गरिएको विधान महाधिवेशनले विधानमा प्रस्ट भाषामा व्यवस्था गर्यो- एउटै पदमा दुईपटकभन्दा बढी उम्मेदवार हुन नपाइने।
विधानको धारा ६४ (१) मा भनिएको थियो- पालिका वा सोभन्दा माथिल्लो कमिटीमा पदाधिकारीको हैसियतमा कार्यरत कुनै पनि व्यक्ति एउटै तह र एउटै पदमा दुईपटकभन्दा बढी उम्मेदवार हुन पाउने छैन।
तर, शुक्रबार मध्यरातमा सौराहामा बसेको केन्द्रीय कमिटी बैठकले यो व्यवस्था परिवर्तन गर्ने निर्णय गर्यो। सोहीअनुसार शनिबार राति एमालेको दशौं महाधिवेशनको बन्दसत्रले विधानको त्यो व्यवस्था संशोधन गरेको छ। र, उम्मेदवारीसम्बन्धी त्यो बन्देज हटाइएको छ।
किन परिवर्तन गरियो त यो प्रावधान?
एमाले अध्यक्ष केपी शर्मा ओलीनिकट नेताहरुले लेखा आयोगका अध्यक्ष पुष्प कँडेललाई निरन्तरता दिन विधान संशोधन गरेर यस्तो व्यवस्था हटाइएको तर्क गरेका थिए। तर, अहिले एमालेका नेता तथा कार्यकर्ताले त्यसको अन्तर्य केलाउन थालेका छन्- त्यो परिवर्तन त ओलीलाई अध्यक्ष उठ्न परेको बाधालाई फुकाउन पो गरिएको रहेछ।
विधानमा भनिएको थियो- दुई पटकभन्दा बढी उम्मेदवार हुन नपाउने। ओली आठौं र नवौं महाधिवेशनमै अध्यक्षको उम्मेदवार भइसकेका थिए।
२०६५ फागुन ५ देखि १४ गतेसम्म आयोजना गरिएको एमालेको आठौं महाधिवेशनमा ओलीले झलनाथ खनालसँग अध्यक्षमा प्रतिस्पर्धा गरेका थिए। त्यतिबेला खनाल ९१३ पत पाएर विजयी भएका थिए। तर ओलीले भने ७९६ मतमात्रै पाएका थिए।
विधान महाधिवेशनबाट पारित विधान।
नवौं महाधिवेशनमा पनि ओली अध्यक्षको उम्मेदवार भए। उनका प्रतिस्पर्धी थिए, माधव नेपाल। त्यतिबेला ओलीले एक हजार ५९ मत पाएर विजयी भएका थिए। नेपालले भने एक हजार तीन मत मात्रै पाएका थिए।
नवौं महाधिवेशनबाट पारित विधानको धारा ६५ (२) मा भनिएको थियो- केन्द्रदेखि जिल्ला तहसम्म पदाधिकारी एउटा पदमा दुई कार्यकालभन्दा बढी रहने छैनन्।
नवौं राष्ट्रिय महाधिवेशनबाट पारित विधान।
विधान महाधिवेशनले यो भाषालाई सच्याउँदै 'उम्मेदवार नै बन्न नपाउने' भनेपछि ओलीलाई अप्ठ्यारो परेको थियो। सम्भवतः त्यतिबेला ओली र उनीनिकट नेताहरुले यसलाई ख्याल गरेका थिएनन्। जसलाई महाधिवेशन सुरु भइसकेपछि बसेको केन्द्रीय कमिटीको बैठकले परिवर्तन गरिदियो। शनिबारको बन्दसत्रले त्यसलाई अनुमोदन गरिदिएको छ।
धेरैले दुई महिनाअघि महाधिवेशन नै गरेर निर्माण गरिएको विधानलाई परिवर्तन गरिएकोमा व्यङ्ग्य गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
