चितवन– केन्द्रीय कमिटीको सूची प्रस्ताव गर्ने अधिकार अध्यक्ष केपी शर्मा ओलीले पाएपछि हलमा उनले भने, ‘बलमिच्याइ होइन, लोकतान्त्रिक प्रयास हो।’ तर, ओलीको भनाइ र उनको गराइमा तादम्य महाधिवेशनभरि भेटिन मुश्किल परिरहेको छ। सूची प्रस्ताव गर्ने अधिकार अध्यक्ष ओलीलाई दिने प्रस्ताव नेकपा एमाले उपहासचिव विष्णु पौडेलले हलसामु राखेपछि उपाध्यक्ष भीम रावल चकित परेका थिए। किनकि, उनले त्यस्तो प्रस्तावको अपेक्षा त परको कुरा परिकल्पना समेत गरेका थिएनन्।
अध्यक्ष केपी शर्मा ओलीलाई केन्द्रीय कमिटीको सूची प्रस्ताव गर्ने अधिकार दिने प्रस्ताव उपमहासचिव पौडेलले बन्दसत्रमा प्रस्तुत गरे। हलमा उपस्थित महाधिवेशन प्रतिनिधि ताली पड्काउन कस्सिहाले। ताली पड्केपछि प्रस्ताव पास भयो तर अध्यक्षमण्डलका सदस्यसमेत रहेका भीम रावलले मञ्चबाट विरोधको हात उठाए। उनलाई झिनो संख्यामा प्रतिनिधिले साथ दिन खोजे।
अध्यक्षको उम्मेदवारी दिने घोषणासहित भोट माग्न सक्रिय रहेका रावललाई उक्त प्रस्तावले तरंगित बनाउनु स्वाभाविक थियो। माहोल तरंगित हुन थालेपछि महासचिव ईश्वर पोखरेलले हस्तक्षेप गरे र भने बोल्न समय दिइन्छ कमरेड आत्तिनुपर्दैन।
फरक मतमाथि बलमिच्याइँ
फरक मतको सम्मान लोकतन्त्रको सौन्दर्य मानिन्छ। तर, एमाले महाधिवेशनमा त्यस्तो देखिँदैन। बरु त्यसलाई निरीहताको प्रतिकका रुपमा स्थापित गरिन थालेको एमाले महाधिवेशनमा देखिन्छ।
शनिबार बन्दसत्रमा रावलले केही बोल्न खोजेको भन्दै पोखरेलले समय दिए। त्यतिन्जेल प्रतिनिधिहरु निस्किन थालिसकेका थिए। ओलीमय माहोलमा आफ्ना फरक धारणाले हलमा खासै असर नपार्ने रावललाई लागिरहेको थियो। त्यसैले उनले आफूले छोटो भनाइ राख्ने भन्दै हतारिएका प्रतिनिधिलाई आश्वस्त पार्दै भने, ‘कुनै व्यक्तिलाई उम्मेदवारको नाम प्रस्ताव गर्ने अधिकार हुने हो भने अब उप्रान्त निर्वाचन नहुने र फलानोले प्रस्ताव गरे हुन्छ भनेर विधानमा लेख्नुपर्छ।’
नेकपा (एमाले)को १०औं राष्ट्रिय महाधिवेशनमा अध्यक्षमा उम्मेदवारी घोषणा गरेका उपाध्यक्ष भीम रावलले लोकतान्त्रिक अभ्यास र स्वस्थ प्रतिस्पर्धा गर्ने जबजको सिद्धान्त अनुशरण नगर्ने हो भने दुनियाँका सामुन्ने अनुहार देखाउन पनि नसकिने बताए।
लोकतान्त्रिक अभ्यास र स्वस्थ प्रतिस्पर्धा गर्ने जबजको सिद्धान्त अनुशरण गर्ने र आफू उम्मेदवार बन्ने प्रस्ट पारे। पहिल्यै अध्यक्षमा उम्मेदवारी घोषणा गरेका उपाध्यक्ष भीम रावलले आफू अध्यक्षको उम्मेदवारीबाट पछि नहट्ने बताए।
सरप्राइजमाथि सरप्राइज
सौराहामा ओलीइतरका नेताहरु हरेक दिन सरप्राइज मात्रै पाइरहेका छन्। मंसिर १० गते बसेको नवौं महाधिवेशनको अन्तिम केन्द्रीय कमिटीको बैठकमा पनि उपाध्यक्ष भीम रावल, उपमहासचिव घनश्याम भुसालले सरप्राइज प्राप्त गरेका थिए। केन्द्रीय कमिटी बैठकमा विधान संशोधनको प्रस्ताव आउने उनीहरुले सुइँको समेत पाएका थिएनन्। बैठक सुरु हुनुअघि आधा घन्टाअघिसम्म पनि रावल त्यस्तो खास प्रस्ताव नआउने बताइरहेका थिए। जब आयो, केन्द्रीय कमिटीका सदस्य होइन, ओलीइतरका पदाधिकारी नै चकित परे।
दुई महिनाअघि मात्रै सम्पन्न विधान महाधिवेनशनलाई औचित्यहीन बताउँदै विधान संशोधन प्रस्ताव अघि सारियो। केन्द्रीय कमिटी २२५ बाट ३०१ पुर्याइयो। यसैगरी कार्यकारी पदमा दुई कार्यकालभन्दा बढी उठ्न नपाइने, आयोगमा सदस्यको संख्या २५ पुर्याउनेलगायतका विषयमा संशोधन प्रस्ताव पेश भयो। त्यो केन्द्रीय कमिटी हुँदै हलले पारित गरिसकेको छ।
सहमति होइन, सहमत खोज्ने प्रयास
नेकपा एमालेको महाधिवेशनलाई एकताको भनिएको छ। माओवादी केन्द्रबाट आएका रामबहादुर थापा बादल, एमाले अन्तरसंघर्षमा माधव नेपाल पक्षमा रहेका भीम रावललगायतका नेताहरु र ओली पक्षको एकता भनिएको हो।
त्यही एकताका लागि सहमतिमा नेतृत्व चयन गर्ने भाष्य महाधिवेशनको माहोल सुरु हुनुअघिदेखि नै सुरु भएको थियो। अध्यक्ष केपी शर्मा ओलीले एमालेभित्रकै फरक धारणा राख्नेहरुसँग सहमति भने अहिलेसम्म खोजेका छैनन्।
उनले न केन्द्रीय कमिटी निर्वाचनको तरिकामा सहमति खोजे। न आफू अध्यक्ष दोहोर्याउने कुरामा उपाध्यक्ष भीम रावलसँग सहमतिको प्रयास गरे। रावलले लोकतान्त्रिक अधिकार प्रयोग गर्ने कुरा गरिरहँदा पार्टीमा रहेको प्रभावका बलमा रावलमाथि खिसीट्युरी गरिरहेका थिए, ‘अर्कोले उम्मेदवारी दिएन, लड्न आएन भने तपाईं सर्वसम्मत हुनुहोला मान्नुहुन्छ कि हुन्न?’ उनले भनेका थिए। उनी यतिमै रोकिएनन् प्रतिनिधि नै आफूलाई अध्यक्ष मान्ने आइपुगेको कुरलाई लिएर रावलको उम्मेदवारीको औचित्यमाथि प्रश्न उठाउँदै उनले भने, ‘चुनाव लडे पनि सर्वसम्मत गरेपनि निष्कर्ष (परिणाम) त उस्तैउस्तै आउने होला।’
यसैगरी उपाध्यक्षमा उम्मेदवारी गरेका उपमहासचिव घनश्याम भूसालसँग पनि अध्यक्ष ओलीले भेटघाट गरेका छैनन्। उपाध्यक्षमै भूसाललाई राखिए उनी त्यसैमा सहमत हुन सक्छन् तर नराखिए उनको उम्मेदवारी निरन्तर रहने उनीनिकट नेता बताउँछन्।
ओली अहंमा ठेस
१० औं महाधिवेशनका हरेक प्रक्रिया ओली अनुकल नै छन्। तरपनि किन हडबडाइरहेका छन् ओली? उनले भनेजस्तै ओलीले सर्वसम्मत नेतृत्व चुनिएको रवाफ बनाएर विरोधीलाई चुनौती दिन चाहन्छन्। आफूभित्रका समकक्षी प्रतिस्पर्धीलाई पाखा लगाइसकेका उनी जुनिएरबाट चुनौतीको अपेक्षा राखिरहेका थिएनन्।
सर्वसम्मत नेतृत्वमा चयन भएको इतिहास बनाउन उनी लालायित थिए। उपाध्यक्ष रावलको चुनौतीले उनको इगोमा ‘हर्ट’ गरिरहेको छ। आफूसँग अध्यक्षमै प्रतिस्पर्धा गर्ने घोषणा गरिसकेका व्यक्तिसँग सौदाबाजी गर्न पनि ‘ओली अहं’ले दिइरहेको छैन।
त्यसैमाथि रावल अध्यक्षबाट पछि हट्ने अवस्थामा उनलाई वरिष्ठ उपाध्यक्ष दिनुपर्ने हुन सक्छ,। उपाध्यक्ष भइसकेका रावल त्यही पदमा दोहोरिन चाहँदैनन्। वरिष्ठ उापध्यक्षमा आफ्नै गुटमा भइरहेको प्रतिस्पर्धालाई उनले बल्लबल्ल सेटल गरेका छन्। त्यसैले उनी पेलेरै गलाउने रणनीतिमा लागेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
