सौराहा- नेकपा (एमाले)का अध्यक्ष केपी शर्मा ओलीले स्थायी कमिटी सदस्य सुवास नेम्वाङलाई वरिष्ठ उपाध्यक्षको दाबी छाड्न आग्रह गरेका छन्। नेम्वाङ निकट नेताहरुका अनुसार ओलीले महासचिव ईश्वर पोखरेलका लागि उक्त पद छाडिदिन आग्रह गरेका हुन्।
'ईश्वर पोखरेल दुई-दुईपटक महासचिव भइसक्नुभयो। उहाँको व्यवस्थापन गर्न अन्य पद छैन। त्यसैल वरिष्ठ उपाध्यक्ष उहाँलाई नै बन्न दिनुस्,' ओलीले नेम्वाङलाई गरेको आग्रहबारे जानकारी पाएका ती नेताले भने, 'आगामी निर्वाचनपछि एमालेलाई राष्ट्रपति बन्ने अवसर आएमा तपाईं बन्नुहोला।'
ओलीको आग्रहलाई नेम्वाङले भने अस्वीकार गरेका छन्। उनले प्रतिस्पर्धा भएको अवस्थामा पनि आफूले सोही पदमा प्रतिस्पर्धा गर्ने जवाफ फर्काएका थिए।
सहमतिबाट नेतृत्व चयन गर्नुपर्ने दबाब बढिरहेका बेला आफू निकटका नेताहरुले नै एउटै पदमा दाबी नछाडेपछि ओली अप्ठ्यारोमा परेका छन्। विशेषगरी वरिष्ठ उपाध्यक्षमा नेम्वाङ र पोखरेल तथा महासचिवमा विष्णु पौडेल र शंकर पोखरेलले दाबी गरिरहेका छन्। सबै नेताहरु ओली निकट हुन्।
त्यसो त, ओलीलाई पनि अध्यक्षमा भीम रावलले चुनौती दिने भएका छन्। अध्यक्षमा उम्मेदवारी घोषणा गरेका रावलले आफू पछि नहट्ने स्पष्ट पारिसकेका छन्। कार्यकर्ता र महाधिवेशन प्रतिनिधिले सहमतिमै नेतृत्व चयन गर्न दबाब बढाए पनि त्यसको सम्भावना टर्दै गएको छ।
उपाध्यक्षमा उम्मेदवारी घोषणा गरेका घनश्याम भुसालले सामाजिक सञ्जालमार्फत् मत मागेका छन्। शनिबार उनले सार्वजनिक गरेको फोटोमा नारा लेखिएको छ- दलाल पुँजीको अन्त्य र राष्ट्रिय पुँजीको विकास गर्दै समाजवादको तयारी गरौँ। सामूहिकता, विधि र विचारसहितको नेकता एमालेको पुनरोदय गरौँ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
