चितवन- नेकपा एमालेको केन्द्रीय कमिटीको आकार बढाएर ३०१ सदस्यीय बनाउने प्रस्ताव पेस भएको छ।
शुक्रबार अबेर राति बसेको एमालेको नवौं महाधिवेशनबाट निर्वाचित केन्द्रीय कमिटीको अन्तिम बैठकमा महासचिव ईश्वर पोखरेलले यस्तो प्रस्ताव पेस गरेका हुन्।
गत असोजमा ललितपुरमा भएको प्रथम विधान महाधिवेशनले केन्द्रीय कमिटीको संख्या २२५ बनाउने निर्णय पारित गरेको थियो।
पछिल्लो समय नेतृत्व सर्वसम्मत गराउनका लागि पदाधिकारी बढाएर केन्द्रीय कमिटी ३०१ पुर्याउन लागिएको हो। केन्द्रीय कमिटी बैठकले प्रस्ताव पास गरेमा बन्द शत्रको हलले पारित गर्नुपर्ने छ। हलबाट प्रस्ताव पारित भएमा नेतृत्व चयन हुनेछ।
पदाधिकारीसहित स्थायी कमिटीको संख्या र केन्द्रीय कमिटीसमेत संख्या बढाएर सर्वसम्मत नेतृत्व चयन गर्ने देखिएको छ।
यसअघि एमाले सस्थापन पक्षीय नेताहरूले विधान महाधिवेशनले गरेको निर्णय फेरबदल नहुने बताउँदै आएका थिए। तर, महाधिवेशनमा पदाधिकारी कम र नेताहरू धेरै भएपछि नेतृत्वलाई दबाब बढेको थियो । पार्टी अध्यक्ष केपी शर्मा ओलीले आफू निकट नेताहरूसँग आन्तरिक छलफल गरेपछि यो निर्णयमा पुगेको बताइएको छ।
पदाधिकारीको संख्या बढाइएपछि अब सर्वसम्मत रूपमा नै नेतृत्व चयन हुने देखिएको छ।
यता, पोखरेलले ९९ सदस्यीस पाेलिटब्यूराे गठन गर्ने प्रस्तावसमेत बैठकमा पेस गरेका छन्। यस्तै, स्थायी समिति ४५ सदस्यीय हुने भएकाे छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
