चितवन– प्रमुख प्रतिपक्षी दल नेपाल कम्युनिष्ट पार्टी(एमाले)को दशौं राष्ट्रिय महाधिवेशन आजदेखि सुरु हुँदैछ। नारायणी नदी किनारमा एक समारोहबीच पार्टीको महाधिवेशन उद्घाटन हुँदैछ।
नेकपा एमालेले आज मध्यान्ह १२ बजे भव्य समारोहबीच महाधिवेशनको उद्घाटन गर्दैछ। एमाले अध्यक्ष केपीशर्मा ओलीले महाधिवेशन उद्घाटन गर्ने कार्यक्रम रहेको छ।
एमालेले नारायणी नदी किनारमा महाधिवेशन उद्घाटनका लागि भव्य मञ्च निर्माण गरेको छ। मञ्च निकै आकर्षक रुपमा निर्माण गरिएको छ।
मञ्च आसपास क्षेत्रमा ठूल ठूला एलसीडी राखिएका छन्। जसका कारणले सहभागीहरुले सहजै उद्घाटन सत्रको कार्यक्रम हेर्न सक्ने व्यवस्था मिलाइएको छ। ‘उद्घाटन सत्रको सबै तयारी सकिएको छ। देशका विभिन्न भागबाट आउने सहभागी पनि आइरहनुभएको छ,’ एमाले केन्द्रीय सदस्य एवं जनपरिचालन समितिका संयोजक देवी ज्ञवालीले भने, ‘रातिदेखि नै चितवनमा सहभागीहरु पुगिसकेको अवस्था छ। प्रतिनिधिहरु पनि आइरहनुभएको छ।’
राति देखि नै जिल्लाका विभिन्न स्थानबाट आएका सवारी साधनहरुलाई आयोजकले व्यवस्थापन गर्ने उनीहरुको प्रबन्ध गर्ने काम गरिरहेको छ। उद्घाटन सत्र अघि देशका विभिन्न स्थानबाट सहभागी भएका कार्यकर्तासहित विशाल र्यालीको तयारी गरिएको छ। ‘९ बजेभित्र सबै साथीहरु जिल्ला प्रवेश गरिसक्नुहुने छ,’ उनले भने, ‘चितवनका प्रमुख क्षेत्रबाट जुलुस अघि बढ्नेछ। पूर्वतिरबाट आएको जुलुस केन्द्रीयबस टर्मिनलबाट सहिद चोक, माडी, पटियानीलगायतको क्षेत्रको जुलस पनि त्यसै हिसाबले अघि बढनेछ।’
विभिन्न स्थानबाट जुलुस प्रदर्शन हुने उनले बताए। सबै तिरको जुलुस कार्यक्रम स्थलमा पुग्ने कार्यक्रम रहेको छ।पार्टी अध्यक्ष केपी शर्मा ओली भने र्यालीमा सहभागी हुने छैनन्। उनी सोझै कार्यक्रम उद्घाटन स्थलमा आइपुग्ने कार्यक्रम रहेको ज्ञवालीले जानकारी दिए।
२ हजार १७५ प्रतिनिधि सहभागी हुने
एमाले महाधिवेशनमा कुल प्रतिनिधिको संख्या २ हजार १ सय ७५ जना हुने भएको छ। महाधिवेशनको पूर्वसन्ध्यामा उद्घाटनस्थल नारायणी किनारमा आयोजित पत्रकार सम्मेलनमा प्रचार विभागका संयोजक योगेश भट्टराईले प्रतिनिधिको संख्याबारे जानकारी दिएका हुन्। ‘महाधिवेशनमा कुल २१७५ जनाको सहभागिता हुनेछ। भुगोलबाट, जनसंगठनबाट, विभागबाट, सम्पर्क कमिटीहरुबाट र प्रवासका कमिटीहरुबाट निर्वाचित र केन्द्रीय कमिटीबाट १०६ जना गरी २१७५ जनाको प्रतिनधित्व हुनेछ,’ उनले भने, ‘१०३ जना पर्यवेक्षक हुनुहुन्छ।’
कुल प्रतिनिधिमा ६२७ जना महिला प्रतिनिधि हुने उनले जानकारी दिए। ‘यो नेकपा एमालेको इतिहासमा मात्रै होइन कि अरु दलको इतिहासमा पनि यो संख्याको महिला प्रतिनिधित्व पहिलो हो भन्ने मलाई लाग्छ। हामीले केन्द्रीय कमिटीमा पनि ३३ प्रतिशत महिलाहरुको सिट सुनिश्चित गरेका छौं,’ उनले भने।
दलित उत्पीडित समुदायबाट २०९ जना प्रतिनिधिले भाग लिने भट्टराईको भनाइ छ। ‘नेकपा एमाले एकदमै समावेशी छ। सबै क्षेत्र र लिंग समुदाय लगायतको प्रतिनिधित्व नेकपा एमालेमा हुनेछ। र यो एउटा समावेशी पार्टी राष्ट्रिय चरित्रको पार्टीको रुपमा रहनेछ,’ उनले भने।
प्रधानमन्त्री देउवासहितका प्रमुख नेताहरुले शुभकामना दिने
एमाले महाधिवेशनको उद्घाटन समारोहमा प्रधानमन्त्री शेरबहादुर देउवासहित विभिन्न पार्टीका शीर्ष नेताहरूले शुभकामना दिने भएका छन्। महाधिवेशनमा शुभकामना मन्तव्य दिन प्रधानमन्त्री एवं नेपाली कांग्रेसका सभापति देउवा आज बिहान चितवन आइपुग्ने कार्यक्रम रहेको छ।
एमालेले संघीय संसदमा प्रतिनिधित्व गर्ने सातवटा राजनीतिक दललाई उद्घाटन समारोहमा निम्तो गरेको थियो । लोकतान्त्रिक समाजवादी पार्टीका अध्यक्ष महन्थ ठाकुर, जनता समाजवादी पार्टीका अध्यक्ष उपेन्द्र यादव, राष्ट्रिय प्रजातन्त्र पार्टीका अध्यक्ष कमल थापा र राष्ट्रिय जनमोर्चाका अध्यक्ष चित्रबहादुर केसी पनि शुभकामना मन्तव्य दिन आउने कार्यक्रम तय भइसकेको छ।
नेकपा माओवादी केन्द्रका अध्यक्ष पुष्पकमल दाहाल भने सहभागी हुने छैनन्। नेकपा माओवादीका अनुसार कार्यक्रममा स्थायी कमिटी सदस्य लीलामणि पोखरेल आउने तय भएको छ। प्रचण्डलाई औपचारिक रुपमा नै निमन्त्रणा दिएको भए पनि उनी सहभागी नहुने भएका छन्। नेकपा एकीकृत समाजवादीलाई भने एमालेले महाधिवेशनको उद्घाटन सत्रमा निमन्त्रण नै दिएको छैन। त्यसैले उक्त पार्टीको सहभागिता हुने छैन।
पाँचहजार स्वयंसेवक उद्घाटनमा परिचालन
नेकपा एमालेले पार्टीको दशौं राष्ट्रिय महाधिवेशनको उद्घाटन सत्रमा पाँचहजार स्वयमसेवक परिचालन गरेको छ। विभिन्न जनवर्गीय संगठनका नेता कार्यकर्ताहरुलाई उद्घाटन सत्रमा स्वयम्सेवकका रुपमा परिचालन गर्न लागेको हो। महाधिवेशनलाई भव्य र व्यवस्थित बनाउनका लागि तीन दिन अघिदेखि नै स्वयम्सेवक चितवन आइसकेका छन्। उनीहरुले महाधिवेशनका दिन सहभागी भएका जनसमुदाय र अन्य पाहुनाको सहजताका लागि खटिने भएका हुन्।
चितवनको सुरक्षा व्यवस्था कडा
एमालेको महाधिवेशनलाई मध्यनजर गर्दै चितवनको सुरक्षा व्यवस्था कडा पारिएको छ। चितवन क्षेत्र र पश्चिम नवलपरासी क्षेत्रसहित विभिन्न ठाउँमा झण्डै २ हजारको संख्या सुरक्षाकर्मी परिचालन गरिएको छ। पूर्वसन्ध्यामा प्रहरीका अधिकारीहरुले निरीक्षण गरेका छन्। नेपाल प्रहरीले कार्य विभागका एआईजी सहकुल थापाकै नेतृत्वमा सुरक्षा कमान्ड खटाएको छ। एमाले महाधिवेशनलाई मध्यनजर गर्दै एआईजी थापा चितवन पुगेर कमान्ड पनि सम्हालि सकेका छन्। आज उद्घाटन सत्रको दिन चितवन क्षेत्रमा अत्यावश्यक बाहेका सवारी साधनहरु सञ्चालनमा निषेध गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1753263770.jpg)
-1764146706.png)
