काठमाडौं- सहिद स्मारक 'ए' डिभिजन लिगमा मनाङ मर्स्याङ्दी क्लबले जावलाखेल युथ क्लबमाथि संघर्षपूर्ण जित निकालेको छ।
त्रिपुरेश्वरस्थित दशरथ रंगशालामा आइतबार सम्पन्न दिनको दोस्रो खेलमा मनाङले दिनेश राजवंशीको निर्णायक गोलमा जावलाखेललाई १-० गोलअन्तरले पराजित गरेको हो।
पहिलो हाफको ३० मिनेटसम्म मध्यभागमा रूमलिएका खेलाडीहरूले त्यसपछि केही मुभ बनाएका थिए। तर, गोल भने गर्न सकेनन्।
३१औं मिनेटमा मनाङका पुजन उपरकोटीले करिब ३० यार्डबाट प्रहार गरेको फ्रिकिक बल सोमिडे एडिलेजाले हुलमुलमा हेड गरेका थिए। उक्त बललाई आफिज ओलावालेले गोल गरेका थिए। तर ,रेफ्री प्रज्वल क्षेत्रीले अफसाइड देखाए।
४५औं मिनेटमा जावलाखेल अग्रता बनाउन चुक्यो। सुरजज्यू ठकुरीको कर्नरमा ओनगुना जुनियरको हेड प्रहार अपर क्रस बारमा लागेर फर्कियो।
दोस्रो हाफको सुरूआतमै मनाङले अर्को मौका गुमायो। ४९औं मिनेटमा पुजन उपरकोटीको फ्रिकिक प्रहार मनाङ र जावलाखेलका खेलाडीबीच ठोकिएर आएको बललाई दिनेश राजवंशीले फ्रेममा पार्न सकेनन्।
५४औं मिनेटमा नितिन थापाले जावलाखेलको बक्सभित्र दिएको हाइपास बललाई कप्तान अन्जन विष्टले हेड गरे। तर, जावलाखेलका गोलरक्षक टेकेन्द्रसिंह थापा विट भइसकेको अवस्थामा अन्जनले बललाई फ्रेममा खसाल्न सकेनन्।
५७औं मिनेटमा मनाङले अग्रता लियो। भारतीय खेलाडी दयानन्द सिंहले प्रहार गरेको कर्नर बलमा मनाङका दिनेश राजवंशीले गरेको हेडलाई जावलाखेलका गोलरक्षक टेकेन्द्रले बचाउने मौका पाएनन्।
६१औं मिनेटमा जावलाखेलका सुनिल खड्काले डीबक्स बाहिरबाट गरेको प्रहार मनाङका गोलरक्षक विशाल सुनारले जम्प गर्दै बचाए। ७०औं मिनेटमा जावलाखेलका दिपेनराज सिंहले पहेँलो कार्ड पाए। मनाङका अन्जनमाथि खराब ट्याकल गरेपछि रेफ्री प्रज्वलले कार्ड देखाएका थिए।
७३औं मिनेटमा जावलाखेलले अर्को मौका गुमायो। जुनियरले प्रहार गरेको बललाई विशालले बचाए। ७८औं मिनेटमा जावलाखेलका प्रेम लोन्डुप शेर्पाले खाली पोस्टमा गोल गर्न सकेनन्। मध्यभागबाट रूपबहादुर लामाले प्रहार गरेको फ्रिकिक बललाई उनले 'सिक्स यार्ड'भित्र 'टचअप' दिन सकेनन्। ८९औं मिनेटमा ओलावालेले खाली पोस्टमा गोल गर्न सकेनन्। अन्जनले पहिलो पोलतर्फ दिएको पासलाई उनले फ्रेममा प्रहार गर्न सकेनन्।
जितसँगै मनाङले तीन अंक जोडेको छ। जावलाखेलले हारबाट प्रतियोगिताको सुरूआत गरेको छ।
आज भएको दिनको पहिलो खेलमा ब्रिगेट ब्वाइजले विभागीय टोली एपीएफलाई ३-२ गोलले हराएको थियो।
सोमबार पनि दुई खेल हुने छन्। दिनको पहिलो खेलमा विभागीय टोली त्रिभुवन आर्मी र नेपाल पुलिसबीच खेल हुनेछ। उक्त खेल दिउँसो १:०० बजेबाट सुरू हुनेछ।
अर्को खेलमा साविक विजेता मछिन्द्र फुटबल क्लबले न्यूरोड टिम (एनआरटी)को सामना गर्नेछ। उक्त खेल अपराह्न ४:४५ बाट सुरू हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
