काठमाडौं- ब्रिगेड ब्वाइज क्लब (बीबीसी) ले सहिद स्मारक ‘ए’ डिभिजन लिगमा एपीएफ फुटबल क्लबमाथि ३–२ रोमाञ्चक जित निकालेको छ।
त्रिपुरेश्वरस्थित दशरथ रंगशालामा आइबार भएको खेलमा बीबीसीले तीनपटक अग्रता लिर्दै जित हात पारेको हो। ब्रिगेड ब्वाइजको जितमा दिनेश राईले दुई तथा सुरज गुरुङले एक गोल गरे। यता, एपीएफका आशिष लामा र विक्की तामाङले गोल फर्काए।
१२औं मिनेटमा दिनेश राईले गोल गर्दै ब्रिगेड ब्वाइजलाई अग्रता दिलाए । उनले फ्रिकिकमा सिधै गोल गरे।
१७औं मिनेटमा आशिष लामाले गोल गर्दै एपीएफलाई खेलमा फर्काए। आवास लामिछानेको पासमा उनले गोल गरेका थिए।
४४औं मिनेटमा रुडी जोनाथनको पासमा कप्तान रोशनले अफसाइड बिट ट्याप गर्दै गरेको प्रहार बारमा लागेर फर्कदा ब्रिगेड ब्वाइज अग्रता लिनबाट चुक्यो।
६५औं मिनेटमा दिनेशले गोल गर्दै ब्रिगेड ब्वाइजलाई २–१ को अग्रता दिलाए। सुरज गुरुङको पासमा दिनेशले व्यक्तिगत दोस्रो गोल गरे।
७७औं मिनेटमा रवि थिङले दिएको क्रसलाई हेडरमार्फत् गोल गर्दै विक्की तामाङले खेललाई २–२ गोलको बराबरीमा ल्याए।
इन्ज्युरी समयको थप गरिएको दोस्रो मिनेटमा सुरजले गोल गर्दै ब्रिगेड ब्वाइजलाई ३–२ को जित दिलाए। उनले ड्याडी जुनियर वाम्वाको पासमा गोल गरेका थिए।
जितपछि ब्रिगेड ब्वाइजले ३ अंक जोडेको छ। एपीएफले भने हारबाट प्रतियोगिताको सुरुवात गरेको छ।
लिगमा ब्रिगेड ब्वाइज पहिलो चरणमा जित निकाल्ने दोस्रो टोली हो। यसअघि शनिबार सम्पन्न खेलमा थ्रीस्टार क्लबले च्यासल युथ क्लबलाई ३–० ले हराएको थियो।
सातदोबाटो, फ्रेन्ड्स, संकटा र हिमालयन शेर्पाको समान एक अंक छ।
दिनको दोस्रो खेलमा जावलाखेल युथ क्लब र मनाङ–मस्र्याङ्दी क्लबबीच प्रतिस्पर्धा हुनेछ। खेल दिउँसो ४ः४५ बजपछि हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751886908.jpg)
-1752043710.jpg)
-1752245592.jpg)
-1749826086.png)
