काठमाडौं- विश्वकप छनोटअन्तर्गत बुधबार बिहान ब्राजिलसँग गोलरहित बराबरीमा खेल्दै अर्जेन्टिनाले अर्को वर्ष कतार विश्वकप २०२२ को लागि टिकट काटिसकेको छ।
पछिल्लो पटक सन् १९८६ मा विश्वकपको उपाधि उचालेको अर्जेन्टिना आसन्न विश्वकपमा दक्षिण अमेरिकाबाट स्थान पक्का गर्ने दोस्रो टोली हो। यसअघि ब्राजिलले विश्वकपमा आफ्नो स्थान सुरक्षित गरिसकेको छ।
छनोटका १३ खेलबाट ३५ अंक जोडेको ब्राजिल तालिकाको शीर्षस्थानमा छ। यता, दोस्रो स्थानमा रहेको अर्जेन्टिनाको समान खेलबाट २९ अंक छ। छनोटमा दुवै टोली हालसम्म अपराजित छन्।
ब्राजिलसँग बराबरी खेलेसँगै अर्जेन्टिनाले आफ्नो अपराजित यात्रालाई २७ खेलसम्म लम्ब्याएको छ। योसँगै २०१४ को उपविजेता अर्जेन्टिना लगातार १३औँ पटक विश्वकप फुटबलमा छनोट भएको छ। सन् १९७४ देखि लगातार विश्वकप खेलिरहेको अर्जेन्टिना समग्रमा १८औँ पटक विश्वकपमा छनोट भएको हो।
१० टोली सहभागी दक्षिण अमेरिकी महादेशको छनोटबाट कम्तीमा चार टोली र बढीमा पाँच टोली विश्वकपमा सहभागी हुन्छन्। फुटबलको सर्वोच्च निकाय फिफाको प्रावधान अनुसार पाचौँ स्थानमा रहेको टोलीले अन्तर महादेशीय छनोट खेल्छ।
अर्जेन्टिनाले कतार विश्वकपमा स्थान सुरक्षित गरेसँगै टोलीका मुख्य प्रशिक्षक लियोनल स्कालोनीले यो एक सपना रहेको बताए।
'कोपा अमेरिका जित्नु र अपराजित रहँदै विश्वकपमा छनोट हुनु, यो एक सपना थियो। हामीले दुई (ब्राजिल, उरुग्वे) कठिन प्रतिद्धन्द्धीहरुबाट चार अंक जोड्यौं,' स्कालोनीले भने। उनले ब्राजिलविरुद्धको खेल जित्न चाहेपनि सफल हुन नसकेको बताए।
स्टार फरवार्ड नेयमारबिना उत्रिएको ब्राजिलले कप्तान लिओनल मेसीसहितको अर्जेन्टिनालाई रोक्न सफल भयो। बल पोसेसनमा पकड जमाएपनि अर्जेन्टिनाले ब्राजिलको डिफेन्स लाइनलाई चिर्न सकेन। दोस्रो हाफमा ब्राजिलका मिडफिल्डर फ्रेडले पोस्टमा प्रहार गर्दा ब्राजिल अघि बढ्नबाट चुकेको थियो।
त्यस्तै, भिनिसियस जुनिअरले काउन्टर अट्याकमा प्राप्त अवसर सदुपयोग गर्न नसक्दा ब्राजिल जित निकाल्नबाट चुक्यो। मेस्सीले खेलको अन्त्यतिर गरेको प्रहारलाई गोलरक्षक एलिसन बेकरले विफल पार्दै खेल गोलरहित नै राखेका थिए।
'यस प्रकारको खेलले टोलीलाई परिपक्व बनाउँछ। विश्वकपमा केही खेलअगावै छनोट हुनु निकै कठिन काम हो। तर, हामीले यो पूरा गर्यौं। यो मेरो प्रशिक्षणको उत्कृष्ट वर्ष रह्यो,'स्कालोनीले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
