काठमाडौं- कतारमा हुने फिफा विश्वकप २०२२ खेल्ने १३ टोलीको टुङ्गो लागेको छ। बुधबार बिहान अर्जेन्टिना छनोट भएसँगै आगामी वर्ष कतारमा हुने विश्वकप खेल्नका लागि स्थान पक्का गर्ने टोलीको संख्या १३ पुगेको हो।
दक्षिण अमेरिकी महादेशको छनोटअन्तर्गत बुधबार बिहान अर्जेन्टिनाले चीरप्रतिद्वन्द्वी ब्राजिलसँग गोलरहित बराबरी खेलेपछि चार खेल खेल्न बाँकी रहँदै आगामी वर्ष कतारमा हुने विश्वकपमा सहभागिता जनाउने निश्चित भएको हो।
सन् २०२२ को नोभेम्बर र डिसेम्बरमा हुने विश्व फुटबलको महाकुम्भमा ३२ टिम सहभागी हुने छन्। विभिन्न ३१ राष्ट्रले छनोट चरण पार गर्नुपर्नेछ भने आयोजकका हिसाबमा कतारले स्वतः प्रवेश पाएको छ। यद्यपि, प्रतियोगितामा १९ टिमको टुंगो लाग्न बाँकी छ।
युरोपबाट छनोट हुने १३ मध्ये १० वटा टोली (जर्मनी, डेनमार्क, फ्रान्स, बेल्जियम, क्रोएसिया, स्पेन, सर्विया, इङ्ल्याण्ड, स्वीटजरल्याण्ड र नेदरल्याण्ड) छनोट भइसकेका छन्। बाँकी ३ टोलीले 'प्ले अफ'बाट विश्वकपमा स्थान पक्का गर्ने छन्।
यस्तै, दक्षिण अमेरिकन छनोटबाट सोझै छनोट हुने चारमध्ये हालसम्म ब्राजिल र अर्जेन्टिना छनोट भइसकेका छन्। बाँकी २ टिम सोझै छनोट हुने छन्। यस्तै, थप १ टोली क्वालिफायर खेलेर आउनेछ।
यता, एसियाबाट चार टोली छनोटबाट सोझै छनोट हुने छन् भने एक प्लेअफ क्वालिफायर आउने छन्।
उत्तर/ मध्य अमेरिका र क्यारेबियन ३ टोली छनोटबाट सोझै छनोट हुने छन् भने एक क्वालिफायर आउने छन्। ओसिनियाबाट एक टोली 'प्ले अफ' क्वालिफायर खेलेर आउने छन्। यता, अफ्रिकाबाट ५ टोली सहभागी हुने छन्।
इटाली प्ले अफमा
युरोकप २०२० च्याम्पियन इटालीले पनि यो पटक विश्वकपमा छनोट हुन प्लेअफ खेल्नुपर्ने भएको छ।
सोमबार राति नर्दन आयल्याण्डसँग गोलरहित बराबरी खेलेपछि इटालीले सोझै छनोट हुने मौका गुमाएको थियो। इटालीले आगामी मार्चमा प्लेअफ खेल्नेछ।
विश्वकपमा सोझै छनोट हुने आशा गरिएका इटालीबाहेक पोर्चुगल, स्कटल्याण्ड, रसिया, स्वीडेन, वेल्स, टर्की, पोल्याण्ड, नर्थ मासेडोनिया, युक्रेन, अस्ट्रिया र चेक गणतन्त्रले प्ले अफ खेल्ने छन्।
इटालीसँगै युरोप छनोटमा अन्य समूहका दोस्रो स्थान हासिल गर्ने १० टोली र नेसन्स लिगको वरीयता अनुसार २ टोलीले प्लेअफमा खेल्ने छन्। प्लेअफको ड्र नोभेम्बर २६ मा हुनेछ। प्लेअफ चरणबाट ३ टोलीले विश्वकपमा स्थान बनाउने छन्।
स्वारेजलाई संकट
लिओनल मेस्सीको टोली अर्जेन्टिनाले विश्वकपमा स्थान बनाउँदा उनका कुनै समयका एउटै क्लबका सहकर्मी लुइस स्वारेजको उरुग्वे भने विश्वकपमा छनोट नहुने सम्भावना बढ्दै गएको छ।
१४ खेलबाट १६ अंक भएको उरुग्वे तालिकाको छैटौँ स्थानमा छ। विश्वकप छनोटको बलियो दाबेदार उरुग्वे अघिल्लो खेलमा अर्जेन्टिनासँग १-० गोलले पराजित भएको थियो।
बुधबार बिहान भएको खेलमा उरूग्वे १० खेलाडीमा सीमित बोलिभियासँग ३-० गोल अन्तरमा पराजित भयो। उरुग्वेले विश्वकपका पछिल्ला लगातार ३ संस्करण खेलेको छ।
कतारका विभिन्न ५ सहरका आठ रंगशालामा विश्वकपका खेलहरू हुने छन्। जसमा लुसाल, अलखोर, अल रायान, अल वाक्रह र दोहाका विभिन्न रंगशालामा खेल हुने फिफाले जनाएको छ।
सन् २०२२ को २१ नोभेम्बर सोमबार विश्वकपको उद्घाटन खेल हुने तालिका तय छ। पहिलो दिन चार खेल हुने जनाइएको छ।
यस्तै, फाइनल खेल सन् २०२२ को १८ डिसेम्बर आइतबार हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
