काठमाडौं- दक्षिण अमेरिकी महादेशको छनोटअन्तर्गत बुधबार बिहान चिरप्रतिद्वन्दी ब्राजिलसँग गोलरहित बराबरी खेलेपछि अर्जेन्टिनाले चार खेल खेल्न बाँकी रहँदै आगामी वर्ष कतारमा हुने विश्वकपमा सहभागिता जनाउने निश्चित गरेको छ।
बुधबार भएका अन्य खेलमा चिली इक्वेडरसँग पराजित भएको थियो। यस्तै, अर्को खेलमा कोलम्बिया, पाराग्वेसँग गोलरहित बराबरीमा रोकिएको थियो।
१३ खेलबाट २८ अंक जोडेको अर्जेन्टिना तालिकाको दोस्रो स्थानमा छ। समान खेलबाट ३५ अंक जोडेको ब्राजिल शीर्षस्थानमा छ।
योसँगै २०१४ को उपविजेता अर्जेन्टिना लगातार १३औँ पटक विश्वकप फुटबलमा छनोट भएको छ।
सन् १९७४ देखि लगातार विश्वकप खेलिरहेको अर्जेन्टिना समग्रमा १८औँ पटक विश्वकपमा छनोट भएको हो।
१० टोली सहभागी दक्षिण अमेरिकी महादेशको छनोटबाट कम्तीमा चार टोली र बढीमा पाँच टोली विश्वकपमा सहभागी हुन्छन्। फुटबलको सर्वोच्च निकाय फिफाको प्रावधान अनुसार पाचौँ स्थानमा रहेको टोलीले अन्तर महादेशीय छनोट खेल्छ।
अंक तालिकाको पाचौँ स्थानमा रहेको पेरुले १४ खेलबाट १७ अंक जोडेको छ। चौंथो स्थानमा रहेको कोलम्बियाको समान खेलबाट १७ अंक नै छ।
अर्जेन्टिना छनोट भएसँगै लिओनल मेस्सीले टोलीमा परे या उनले खेल्न चाहे पाचौँपटक कतार विश्वकप २०२२ खेल्नेछन्।
हाल फ्रान्सेली क्लब पेरिस सेन्ट जर्मेन (पीएसजी) आवद्व रहेका मेस्सीले २००६ यता लगातार चार वटा विश्वकप खेलेका छन्।
उनको नेतृत्वमा अर्जेन्टिना पछिल्ला २७ खेलयता अपराजित रहेको छ। दुईपटकको विश्वकप विजेता अर्जेन्टिनाले सन् १९८६ पछि यो प्रतियोगिता जित्न सकेको छैन।
उनको नेतृत्वमा अर्जेन्टिना सन् २०१४ मा ब्राजिलमा आयोजना भएको विश्वकपमा फाइनलसम्म पुगेको थियो। तर, फाइनलमा जर्मनीसँग १-० ले पराजित हुँदै उपविजेता बनेको थियो। तर, अर्जेन्टिना दुईपटक क्वार्टरफाइनलसम्म र एकपटक प्रि- क्वार्टरफाइनलसम्म पुगिसकेको छ।
मेस्सी २०१४ को विश्वकपका सर्वोत्कृष्ट खेलाडी हुन्। उनी गत जुलाईमा भएको कोपा अमेरिकाको फाइनलमा ब्राजिललाई हराएर सर्वाधिक सातपटकका फिफा वर्ष खेलाडी घोषित भएका थिए।
सिनियर राष्ट्रिय टोलीबाट मेस्सी कोपा अमेरिकाको उपाधि नै पहिलो सफलता हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770262754.png)
-1764146706.png)
-1770196062.png)
