काठमाडौं– बेल्जियम कतारमा हुने फिफा विश्वकप २०२२ मा छनोट भएको छ। शनिबरराति सम्पन्न खेलमा इस्टोनियामाथि सहज जित निकाल्दै बेल्जियमले विश्वकपमा स्थान बनाएको हो।
घरेलु मैदानमा सम्पन्न खेलमा इस्टोनियालाई ३–१ ले पराजित गर्दै एक खेल बाँकी रहँदै बेल्जियम विश्पकपमा छानिएको हो। बेल्जियम विश्वकपमा छनोट हुने पाँचौं टोली बनेको छ। यसअघि जर्मनी, डेनमार्क, ब्राजिल र फ्रान्स विश्वकपमा छनोट भइसकेका छन्। आयोजकका रुपमा कतार पनि छनोट भइसकेको छ।
ब्रसेल्समा भएको खेलमा घरेलु टोलीको जितमा क्रिस्टियन बेन्टेके, यान्निक कारास्को र थोर्गान हाजार्डले गोल गरे भने इरिक सोरगाले एक गोल फर्काए। खेलको ११औं मिनेटमा क्रिस्टियन बेन्टेकेको गोलमा बेल्जियमले अग्रता लिएको थियो। ५३औं मिनेटमा यान्निकले गोल गर्दै बेल्जियमको अग्रता दोब्बर पारे।
७०औं मिनेटमा इरिक सोरगाले राउनो साप्पिनेनको पासमा गोल गर्दै खेललाई २–१ को अवस्थामा ल्याएपनि ७४औं मिनेटमा थोर्गान हाजार्डले गोल गर्दै बेल्जियमको जित पक्का गरे।
जितसँगै समूह ‘ई’ मा अपराजित रहेको बेल्जियमले ७ खेलबाट १९ अंक जोडेको छ। पराजित इस्टोनिया ४ अंकका साथ चौथो स्थानमा छ।
यही समूहको अर्काे खेलमा वेल्सले बेलारुसलाई ५–१ को अन्तरले पराजित गरेको छ। छनोटको अन्तिम खेलमा वेल्सले बेल्जियमसँग खेल्दैछ। जित र बराबरीको नतिजाले वेल्स प्ले अफमा पुग्नेछ। पराजित भएमा भने चेक रिपब्लिकको नतिजामा भर पर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
