काठमाडौं- प्रधानमन्त्री शेरबहादुर देउवाले अदालतको बारेमा धेरै बोल्न नमिल्ने टिप्पणी गरेका छन्।
नेपाल तरुण दलले बुधबार बालुवाटारस्थित प्रधानमन्त्रीको सरकारी निवासमा आयोजना गरेको एक कार्यक्रममा प्रधानमन्त्री देउवाले परमादेशको सवाललाई उठाएर सर्वोच्च अदालतका सबै न्यायाधीशहरुले राजीनामा दिनुपर्ने जस्ता गैरजिम्मेवार अभिव्यक्ति दिएको भन्दै एमाले अध्यक्ष केपी शर्मा ओलीप्रति आक्रोश व्यक्त गरे।
मंगलबार एमाले अध्यक्ष ओलीले असार २८ गतेको फैसला गर्ने पाँचै जना न्यायाधीशलाई राजीनामा दिन सुझाव दिएका थिए।
प्रधानमन्त्री देउवाले परमादेशबाट संसदीय व्यवस्था, संविधान र सिंगो देशलाई बचाउने काम न्यायाधीशहरुले गरेको दाबी गर्दै त्यसको विरोध नगर्न एमाले अध्यक्ष ओलीलाई आग्रह गरे।
‘परमादेश ल्याउने सबैलाई हटाउनु पर्दछ भन्ने गैर जिम्मेवार कुरा गर्नु उचित हुँदैन' देउवाले भने।
उनले न्यायालयको सम्बन्धमा उठेका सवालहरुबारे सत्तारुढ गठबन्धनमा छलफल गरेर अघि बढने बताए। 'हाम्रो गठबन्धन ५ पार्टीको जो छ, जे उठेका सवालहरु छन्–न्यायालय सम्बन्धमा। सरसल्लाह, छलफल गर्नेछौं' उनले भने।
अदालतले के गर्छ भन्ने उसको कुरा भएको देउवाको भनाइ थियो। 'अदालतको बारेमा हामीले धेरै बोल्ने कुरा छैन । अदालतले जे गर्छ, त्यो अदालतको कुरा हो’ देउवाले भने।
गजेन्द्र हमाल नेपाली कांग्रेसको कोटाबाट मन्त्री भएको र उनी कांग्रेसका नेता भएको उनले बताए। आलोचना धेरै भएपछि हमालले राजीनामा दिनुपरेको प्रधानमन्त्री देउवाको भनाइ थियो।
'मैले तपाईहरुलाई भनेको भन्यै छु। हमाल हाम्रो पार्टीको मान्छे हो। विचारा, बस्न नसक्ने भएपछि राजीनामा दिए। यो कुरा सिद्धि सकेको थियो, तर कुरा उठाएका उठाएकै छन्।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
