काठमाडौं– भ्याली कोल्डस्टोरका सञ्चालक बाबुराजा रावलको अपहरण घटनाका अभियुक्त प्रहरीको कमजोर अनुसन्धानका कारण जेलबाट छुटेको निष्कर्ष छानबिन समितिले निकालेको छ।
रावल अपहरणका अभियुक्त सोले र कुमार भनेर चिनिने दुर्गाबहादुर बुढाथोकी महानगरीय प्रहरी परिसर काठमाडौंका मुद्दा शाखाका प्रहरीको कमजोर अनुसन्धानका कारण छुटेको निष्कर्ष छानबिन समितिले निकालेको हो।
पुर्पक्षका लागि थुनामा गएको करिब ९ महिनापछि असोज ५ गते जिल्ला अदालत काठमाडौंले बुढाथोकीलाई निर्दोष भन्दै रिहा गरेको थियो। प्रहरीले भनेजस्तो उनी सर्लाहीका दुर्गाबहादुर बुढाथोकी नै नभएको उनी भारतीय नागरिक रहेको भन्दै अदालतले उनलाई रिहा गरेको थियो।
बुढाथोकी नेपाली नागरिक हुन् भन्ने प्रमाणसमेत पेस नगरी मुद्दा बुझाइएको र बुढाथोकीले प्रहरीको त्यही कमजोरी पत्ता लगाएर आफू नेपाली नागरिक नै नभएको र भारतीय नागरिक भएको भन्दै कागजात पेश गरेपछि उनलाई अदालतले निर्दोष सावित गर्दै रिहा गरेको थियो।
अपहरणकारी भनिएका व्यक्तिलाई अदालतले निर्दोष सावित गर्दै रिहा गरेपछि प्रहरीको अनुसन्धानमै प्रश्न उठेको थियो। त्यसपछि महानगरीय प्रहरी कार्यालय रानिपोखरीले उक्त घटनाको छानबिनका लागि महानगरीय प्रहरी कार्यालयका एसएसपी चक्रबहादुर सिंहको नेतृत्वमा ५ सदस्यीय छानबिन समिति गठन गरेर छानबिन गरेको थियो। प्रहरीले अदालतमा पेस गर्नुपर्ने कागजात पेस नगरेको र अनुसन्धानमा भएको त्रुटिका कारण बुढाथोकीले सफाइ पाएको देखिएपछि आन्तरिक अनुसन्धान थालिएको हो।
छानबिन समितिले प्रतिवेदन बुझाएको र अनुसन्धानमा प्रहरीको कमजोरी औंल्याएको रानिपोखरीका एआईजी हरि पालले नेपाल लाइभलाई जानकारी दिए। ‘नियतवश अभियुक्तलाई छुटाउन प्रमाण नजुटाएको भन्दा पनि काम गर्दा अत्यधिक चापका कारण कमजोरी हुन पुगेको समितिको निष्कर्ष छ,’ एआईजी पालले भने, ‘सोहीअनुसार उनीहरुलाई विभागीय कारबाहीका लागि सिफारिस गरिएको छ।’
कारबाही सिफारिस पर्नेहरुमा मुद्दा शाखाका प्रहरी निरीक्षक नानिकाजी थापासहित तीन जना छन्। उनीहरुलाई सचेत गराइने पालले बताए।
त्यसैगरी काठमाडौंमा मुद्दाको चाप अन्यत्रको भन्दा बढी भएको भन्दै मुद्दाको अनुगमन गर्नका लागि एसपी राख्नुपर्ने सुझाव पनि समितिले दिएको छ। अन्यत्रको तुलनामा काठमाडौंमा मुद्दाको चाप अत्यधिक रहेको र सोही अनुसार जनशक्ति नहुँदा हतारमा मुद्दा चलाउनुपर्ने अवस्था आएको र सोही कारण बुढाथोकी छुटेको निष्कर्ष निकाल्दै एसपी राख्न सुझाव समितिले दिएको छ।
समितिले काठमाडौं परिसर र मातहतका वृत्तहरुको मुद्दाको अनुगमन गर्नका लागि एसपी राख्न सुझाव दिएको छ। ‘अहिले परिसरमा एक जना मात्रै एसपी छन्। उनको काम अपरेशन हेर्ने मात्रै छ। मुद्दाको अनुगमन गर्ने एसपी छैनन्। जसकारण यस्ता त्रुटि हुने र त्यसलाई न्यूनीकरण गर्नका लागि एसपी राख्न सुझाव दिएका छौं,’ छानबिन समितिका एक सदस्यले भने।
त्यसैगरी परिसरकै मुद्दा हेर्ने र अनुगमन गर्नका लागि थप एक डिएसपी राख्न सुझाव समितिले दिएको छ। अहिले परिसरमा मुद्दा हेर्ने एक जनामात्रै डीएसपी छन्। उनीबाट भएका वा हुन सक्ने केही कमीकमजोरी न्यूनीकरण गर्नका लागि थप एक डीएसपी राख्न सुझाव समितिले दिएको छ।
प्रहरीको केन्द्रीय अनुसन्धान ब्युरो (सीआईबी)ले बुढाथोकीलाई रावलको अपहरण काण्ड भएको १२ वर्षपछि २०७७ पुसमा पक्राउ गरेको थियो। फरार रहेका बुढाथोकीलाई भारतको दार्जिलिङबाट पक्राउ गरी काठमाडौं ल्याइएको थियो।
त्यसअघि बुढाथोकी एक पटक पक्राउ परेर पनि हिरासत ब्रेक गरी फरार भएका थिए भने एक पटक प्रहरीको पन्जा फुत्किएका थिए।
२०६५ पुस १ गते भ्याली कोल्ड स्टोरका सञ्चालक बाबुराजा रावलको अपहरण भएको थियो। मारुती गाडीमा हालेर चार/पाँच जनाको समूहले मुखमा पट्टी बाँधेर रावलको अपहरण गरेको थियो। उक्त कार्यमा संलग्न रहेको आरोप बुढाथोकीमाथि लागेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
