काठमाडौं– देशका ६ वटा महानगरपालिकाका समितिमध्ये नेपाली कांग्रेसको संस्थापन (सभापति शेरबहादुर देउवा) पक्षले एउटामा मात्रै चित्त बुझाउनुपरेको छ।
एउटा (वीरगञ्ज महानगरपालिका)मा अधिवेशन हुन सकेको छैन। अधिवेशन भएकामध्ये ४ वटा महानगरका समितिको नेतृत्वमा इतर समूहका नेता चुनिएका छन्।
संघीय राजधानी रहेको काठमाडौं महानगरपालिकाको समितिमा संस्थापन इतरका निलकाजी श्रेष्ठ फराकिलो मतान्तरसहित विजयी भएका छन्। काठमाडौंका ६ वटा संघीय निर्वाचन क्षेत्र जोडिएको महानगरको समितिमा नेता प्रकाशमान सिंह निकट शाक्य सभापति देउवा पक्षका उम्मेदवारलाई हराएर सभापति निर्वाचित भएका हुन्।
शाक्यले ७८६ प्राप्त गरे। शाक्यलाई विजयी गराउन नेता गगन थापा पनि सक्रिय भएर लागेका थिए। ३२ वडा रहेको महानगरका अधिकांश वडा सभापति संस्थापनइतरकै विजयी भएका थिए। ती वडा सभापतिको साथ पनि शाक्यलाई थियो।
संस्थापन पक्षका उम्मेदवार प्रगतिमान रञ्जितले ३२९ मत प्राप्त गरे।
पोखरा महानगरको समितिमा संस्थापन इतरका नेता सभापतिमा विजयी भएका छन्। पोखरा महानगरमा पौडेल समूहका सुरेन्द्रमान बिजुक्छे सभापतिमा विजयी भएका हुन्।
सभापतिका लागि ६ जना प्रतिस्पर्धी थिए। बिजुक्छेले ४१४ मत ल्याएर गंगाधर पराजुलीलाई पछि पारेका थिए। पत्रकार समेत रहेका पराजुली न्यूनतम पारिश्रमिक निर्धारण समितिको प्रमुख पदमा कार्य गरिसकेका व्यक्ति हुन्। उनी देउवा निकट हुन्।
पोखरा महानगरको अधिवेशनमा सभापतिमा प्रतिस्पर्धी गर्ने अन्य जिल्ला नेतामा रामराज लामिछाने, मोहनप्रसाद बास्तोला मिलनप्रसाद तिवारी र ज्योति हमाल थिए। पोखरा महानगरको अधिवेशनबाट पदाधिकारीमा निर्वाचित अधिकांश पदमा संस्थापनइतरकै उम्मेदवार विजयी भएका छन्।
विराटनगर महानगरपालिकामा नेता डा शेखर कोइराला निकट दीपक चापागाईं विजयी भए। विजयी चापागाईंले २१२ मत ल्याउँदा देउवा पक्षीय उम्मेदवार सन्तोष न्यौपानेले १६५ मत प्राप्त गरे।
विराटनगर महानगरपालिका समितिको सभापति पदमा भिड्ने अन्यमा कृष्ण कार्की र अरूण न्यौपाने थिए। तेस्रो र चौथो स्थानको मत ल्याउने दुबै जना संस्थापनइतरका हुन्। विराटनगरमा विजयी अन्य पदाधिकारी पनि कोइराला निकटका हुन्।
भरतपुर महानगरको अधिवेशनमा संस्थापन पक्ष प्रमुख प्रतिस्पर्धी पनि बन्न सकेन। चितवनमा तुलनात्मक रुपमा पौडेल पक्ष बलियो छ। भरतपुरमा प्रमुख प्रतिस्पर्धा पनि पौडेल समूह भित्रै भएको छ।
चित्रसेन अधिकारी भरतपुरको कांग्रेस सभापति बनेका छन्। उनले आफ्नै पक्षधर भरत अधिकारीलाई पछाडि पारेका हुन्। निर्वाचित अधिकारीले ६४९ मत प्राप्त गरे भने भरतले ५४६ मत ल्याएका थिए। सोही पदमा प्रत्यासी बनेर तेस्रो स्थानको मत हिरामणि अधिकारीले ल्याए। सभापतिमै प्रतिस्पर्धा गर्नेमा वचन काकी र अर्जुन रिजाल पनि थिए। भरतपुरमा विजयी भएका अन्य पदाधिकारीमा पौडेल समूहकै छन्।
अधिवेशन भएका ५ महानगरमा देउवा पक्षबाट विजयी हुनेमा ललितपुरका सुभाननरत्न धाख्वा एक्ला उम्मेदवार हुन्। प्रकाशमान सिंह निकट गणेशभक्त श्रेष्ठलाई पराजित गर्दै धाख्वा विजयी भएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773992198-1773992913.jpeg)
-1764146706.png)
-1773837959.png)
