काठमाडौं– १३औं महाधिवेशनका बेला जिल्ला सभापतिमा कमजोर देखिएका कांग्रेस सभापति शेरबहादुर देउवा यसपटक (१४औं महाधिवेशन)मा धेरैभन्दा धेरै जिल्ला नेतृत्व आफ्नो पक्षमा पार्ने कसरतमा छन्।
१३ औं महाधिवेशनमा वरिष्ठ नेता रामचन्द्र पौडेल पक्षमा ४२ जिल्ला सभापति खुलेका थिए। पार्टी सभापतिमा पौडेललाई विजयी गराउन सार्वजनिक आव्हान पनि ४२ जिल्ला सभापतिहरुले गरेका थिए। बहुमत जिल्ला सभापतिको साथ पाएर पनि गत अधिवेशनमा पौडेल पार्टी सभापतिमा विजयी हुन सकेनन्।
जिल्ला सभापतिको 'बल' बुझेका देउवाले यसपटक जिल्ला अधिवेशनमा आफ्नो पकड बलियो बनाउन केही समय अगाडिदेखि तयारी थालेका थिए। केही जिल्लामा त देउवाले उम्मेदवार हुन 'दबाब' नै दिएका थिए। रामेछापका ठेकेदार पूर्णबहादुर तामाङ (कान्छाराम)लाई केही महिना अगाडि निवासमै बोलाएर सभापतिमा उठ्न भनेका थिए। उनै कान्छाराम सोमबार रामेछाप कांग्रेसको सभापति चुनिएका छन्।
शनिबार जिल्ला सभापतिका लागि तीन जनाबीच भएको प्रतिस्पर्धामा कान्छारामले सबैभन्दा बढी मत ल्याएका थिए। सबैभन्दा बढी मत ल्याएपनि उनले प्राप्त गरेको मत कूल मतको ५१ प्रतिशत कटेन। सभापतिमा निर्वाचित हुन ५१ प्रतिशत मत ल्याउनुपर्ने विधानको व्यवस्थाअनुसार दोस्रो चरणको निर्वाचन सोमबारका लागि तोकिएको थियो।
शनिबार सम्पन्न निर्वाचनमा तामाङले ६६८, लवश्री न्यौपानेले ३५६ र कृष्णबहादुर महतले ३२८ मत ल्याएका थिए। दोस्रो स्थानको मत ल्याएका संस्थापनइतरका न्यौपानेले तामाङलाई स्वतः पद छोडिदिएका छन्। न्यौपानेले निर्वाचनमा प्रतिस्पर्धा नगरेपछि तामाङको बाटो सहजै खुलेको छ।
संस्थापन पक्ष मनाङमा पनि बलियो देखिएको छ। मनाङमा देउवा पक्षीय जिल्ला नेता शंकर गुरुङ सभापतिमा चुनिएका छन्। शनिबार भएको जिल्ला अधिवेशनबाट उनी सर्वसम्मत जिल्ला सभापति चुनिएका हुन्। कांग्रेस विभाजीत हुँदा पनि गुरुङले देउवालाई साथ दिएका थिए। तत्कालीन कांग्रेस प्रजातान्त्रिकको उनी जिल्ला सभापति बनेका थिए।
ताप्लेजुङमा पनि देउवा निकट उम्मेदवार जिल्ला नेतृत्वमा विजयी भएका छन्। सभापति शेरबहादुर देउवानिकट गजेन्द्र तुम्याहाङले अर्को पक्षका छविलाल गुरुङलाई हराए। तुम्याहाङले ५८८ मत प्राप्त गरे भने पराजित गुरुङले ४३० मत ल्याएका थिए। विद्यार्थीकालदेखि देउवा निकट रहेर राजनीति गरेका तुम्याहाङले गत अधिवेशनमा संस्थापनइतर लीला बोखीमसँग सभापतिमा पराजित भएका थिए।
हुम्लामा पनि देउवा निकट जिल्ला नेता सभापतिमा चयन भएका छन्। लामो समय जिल्लाको सचिव पद सम्हालेका मोहनविक्रम सिंह जिल्ला सभापतिमा चुनिएका हुन्। कर्णालीमा कांग्रेसका संसदीय दलका नेता जीवनबहादुर शाहीको बोलवाला रहने उनको गृह जिल्लामा शाहीकै बलमा सिंहलाई जिल्ला नेतृत्व सुम्पिएको छ।
देउवा पक्षबाट निर्वाचित जिल्ला सभापतिहरू:
१. रामेछाप– पूर्णबहादुर तामाङ (कान्छाराम)
२. मनाङ– शंकर गुरुङ
३. ताप्लेजुङ– गजेन्द्र तुम्याहाङ
४. हुम्ला– मोहनविक्रम सिंह
हालसम्म परिणाम प्रकाशित भएका जिल्लामध्ये वरिष्ठ नेता रामचन्द्र पौडेल पक्षका ४ जना जिल्ला सभापति बनेका छन्। पौडेल पक्षबाट २ पूर्वमन्त्रीले जिल्ला सभापतिको जिम्मेवारी प्राप्त गरेका छन्। संखुवासभा र मुस्ताङका नवनिर्वाचित सभापति पूर्वराज्यमन्त्री हुन्। संखुवासभामा दीपक खड्का विजयी भएका छन् भने मुस्ताङमा रोमी गौचन थकाली सर्वसम्मतिमा सभापति चुनिएका छन्। खड्काले ११९८ मत पाएका थिए। उनीसँग सभापतिमा प्रतिस्पर्धा गरेका राईबहादुर राईले १५४ मत मात्रै प्राप्त गरे। संखुवासभामा १ हजार ३५२ मत खसेको थियो।
पूर्वमन्त्री रोमी गौचन थकाली गत शनिबार मुस्ताङको सभापति सर्वसहमतिमा चुनिएका छन्। थकाली संस्थापनइतरमा छन्। कालिकोटमा अम्मबहादुर शाही सर्वसहमतमा जिल्ला सभापति बनेका छन्। शाही वरिष्ठ नेता रामचन्द्र पौडेल पक्षधर हुन्।
क्रियाशील सदस्यतामा नाम छुटेर पछि समावेश गरिएका रुकुम पूर्वका पौडेल पक्षीय नेता केशरमान रोका जिल्ला सभापति बनेका छन्। पार्टी वरिष्ठ नेता पौडेल पक्षमा रहेका रोका सर्वसम्मतिले शनिबार जिल्ला सभापति चुनिएका हुन्।
पौडेलबाट जिल्ला सभापतिमा निर्वाचितहरू:
१. संखुवासभा – दीपक खड्का
२. मुस्ताङ – रोमी गौचन थकाली
३. कालीकोट – अम्मबहादुर शाही
४. रुकुमपूर्व – केशरमान रोका
हिमाली २१ जिल्लाको अधिवेशन सोमबार भित्र सक्ने पार्टी निर्णय थियो। तर, सोमबार १४ जिल्लाको मात्रै अधिवेशन सकिने समितिका सदस्य एगराज पोखरेलले जानकारी दिए। गोर्खाको जिल्ला अधिवेशन मंगलबार हुने भएको छ। गोर्खामा संस्थापनइतरका सभापति निर्वाचित हुने सम्भावना बढी रहेको बताइएको छ। दोलखामा पनि संस्थापनइतरबाट जिल्ला सभापति चुनिने भएका छन्। आइतबार भएको जिल्ला अधिवेशनमा नयाँ नेतृत्व छनोट हुन सकेको थिएन। आइतबार सभापतिका लागि चार जना भिडेका थिए। पौडेल पक्षका प्रत्यासी बर्मा लामाले ६४३ मत, नेता कृष्णप्रसाद सिटौला पक्षका तारा खड्काले ३९७ मत, देउवा समूहका रुद्रबहादुर खड्का ३५८ मत र अर्का उम्मेदवार केशव चौलागाई ९५ मत ल्याएका थिए।
पौडेल पक्षका लामा र सिटौला पक्षका खड्काबीच सोमबार दोस्रो चरणको निर्वाचनमा प्रतिस्पर्धा हुने भएको छ। १३ औं महाधिवेशनबाट जिल्ला सभापतिमा देउवा पक्षबाट निर्वाचित खड्का हाल तेस्रो स्थानमा पुगेर प्रतिस्पर्धाबाट बाहिरिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773992198-1773992913.jpeg)
-1764146706.png)
-1773837959.png)
