फाइल तस्बिर।
काठमाडौं- प्रमुख प्रतिपक्षी दल नेकपा (एमाले)को प्रथम विधान महाधिवेशन ललितपुरको गोदावरीस्थित सनराइज सम्मेलन केन्द्रमा जारी छ। शुक्रबारदेखि सुरू भएको विधान महाधिवेशन आइतबारसम्म चल्ने छ।
महाधिवेशनमा सातवटै प्रदेशका ७७ वटै जिल्लाका नेता/कार्यकर्तादेखि विभिन्न विभाग, आयोग लगायत जनवर्गीय संगठनका प्रतिनिधि सहभागी छन्।
महाधिवेशनमा अध्यक्ष केपी शर्मा ओलीले पेस गरेको राजनीतिक प्रतिवेदन, महासचिव ईश्वर पोखरेलको संगठनात्मक प्रस्ताव र उपमहासचिव विष्णु पौडेलले पेस गरेको विधान संशोधनसम्बन्धी प्रस्तावमाथि समूहगत छलफल भएको छ।
दशवटा समूहमा सहभागीलाई राखेर तीनवटै प्रतिवेदनमा छलफल भएको छ। देशभरबाट सहभागी भएका प्रतिनिधिहरूले पार्टीलाई एकताबद्ध बनाउनेदेखि संसद् विघटन लगायतका विभिन्न विषयमा सुझाव पेस गरेका छन्।
अधिकाशं सहभागीहरुले पार्टी विभाजन भएको विषयलाई पनि उल्लेख गर्दै यसमा नेतृत्व गम्भीर हुनुपर्ने सुझाव पेस गरेका छन्।
दाङबाट महाधिवेशनमा सहभागी हुन आएका नारायण डाँगी अबको एमालेलाई सबल र सक्षम बनाएर जानु आवश्यक रहेको बताउँछन्। ‘पाँच जना उपाध्यक्षको ठाउँमा सात जना राख्नुपर्छ भन्ने हाम्रो सुझाव छ,’ उनले भने, ‘समावेशिता मिलाउन र एकतालाई अघि बढाउन पनि यसमा ध्यान दिनुपर्छ।’
उनले स्थायी कमिटी भन्दा तलका नेता कार्यकर्ता महाधिवेशनमा प्रतिनिधिका लागि गाउँ कमिटीबाट नै चुनाव जितेर आउनुपर्ने व्यवस्था गर्नुपर्ने बताए।
कञ्चनपुरबाट सहभागी भएका नन्दलाल चटौत पनि पार्टीलाई एकताबद्ध बनाएर अघि बढ्नु नै अबको एमालेको कार्यदिशा हुनुपर्ने बताए। ‘केही साथीहरु छोडेर जानुभो। नगएको भए नि हुन्थ्यो। त्यसले राम्रो त गरेको छैन,’ उनले भने।
अछामका भरत बहादुर साउँद नेतृत्वले कार्यकर्ताको सुझाव ग्रहण गरेर अघि बढ्न नसकेका कारण समस्या निम्तिने गरेको भन्दै त्यसतर्फ अबका दिनमा ध्यान दिनुपर्ने बताउँछन्।
‘कम्युनिस्ट आन्दोलनमा चुनौती आएको छ। विभाजन भन्दा एकतालाई जोड दिनुपर्छ छोडेर जानुभएका साथीहरुलाई पार्टीमा फर्काउन पहल गर्नुपर्छ,’ उनले भने, ‘विभाजनले कसैलाई फाइदा हुन्न। अबको महाधिवेशनलाई एकताको महाधिवेशन गर्नुपर्छ। सहमतिमा नेतृत्व चयन गर्नुपर्छ।’
एमालेका पुराना नेता भीमबहादुर कडायत पार्टीलाई सशक्त र बलियो बनाएर लैजान सक्नु नै आजको आवश्यकता भएको भन्दै यसतर्फ अब नेतृत्वले ध्यान दिनुपर्ने बताउँछन। ‘एमाले हिजो पनि विभाजन भयो आज फेरि विभाजन भएको छ। यो विभाजन हुने कुरा राम्रो होइन,’ उनी भन्छन, ‘अबको महाधिवेशनबाट सर्वसम्मत रुपमा नेतृत्व चयन हुनुपर्छ। फेरि पनि गुटउपगुट भयो भने पार्टीलाई राम्रो गर्दैन।’
अध्यक्षमा केपी ओलीको विकल्प अहिले नै खोज्ने बेला नभएको उनी बताउँछन्।
सर्लाहीबाट सहभागी एकावती चौधरी कार्यकर्तामा अलिकति नैराश्यता र केही विभेद गर्ने प्रवृत्ति कायमै रहेको बताउँछिन। ‘समावेशी हिसाबले नै एमालेलाई केन्द्रदेखि तल्लो तहसम्म लैजानुपर्छ,’ उनले भनिन्, ‘पार्टीलाई बलियो बनाउनेतर्फ नै नेतृत्वको ध्यान जानुपर्छ।’
धनुषाका राजेन्द्रविक्रम थापा पार्टी विभाजनको असर अहिले नै देखिएको भन्दै यसमा नेतृत्वको ध्यान जानुपर्ने बताए।
ताप्लेजुङबाट सहभागी पुराना कम्युनिस्ट नेता लक्ष्मीबहादुर याङछु पनि पार्टी फुट्ने र जुट्ने प्रक्रियाले समस्या आएको बताउँछन्। ‘अब विधानमा नै पार्टी टुट्न नदिने हिसाबले राखिनुपर्छ,’ उनले भने, ‘पदको लोलुप्ता हुनु, नेताहरुमा महत्वकाक्षां बढ्नु र पार्टीलाई आफ्नो हातमा लिन खोज्ने सोचले समस्या ल्याएको छ।’ अबको पार्टीलाई विवेकपूर्ण रुपमा एकताबद्व बनाएर लैजान सक्ने नेतृत्व आवश्यक रहेको उनको बुझाइ छ।
माधवकुमार नेपालले पार्टी विभाजन गर्ने निर्णयमा साथ नदिएर एमालेमै रहेका एक जिल्लाका नेता भने महाधिवेशनमा एकै नेताको गुणगान धेरै गाउने काम मात्रै भएको बताउँछन्।
‘पार्टी नेतृत्वले विधि, पद्धति र नीतिलाई कुल्चेर अघि बढेकै कारणले अहिलेको समस्या देखिएको हो,’ उनी भन्छन्, ‘अझै पनि त्यसरी अघि बढ्ने हो भने त एमाले एकताबद्ध भएर जान सक्दैन। तर, अब त्यसो नगरी पार्टीलाई थप क्षति हुन नदिने हिसाबले जानुपर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
