काठमाडौं- नेपाली कांग्रेसका वरिष्ठ नेता रामचन्द्र पौडेल पक्षले डडेल्धुराको वडा अधिवेशन फेरि गर्नुपर्ने माग गरेको छ। पौडेल पक्षले यसअघि भएको अधिवेशनलाई अमान्य ठहर गरेको छ।
जिल्ला सभापति कर्णबहादुर मल्लले स्थगितका लागि गरेको आग्रहलाई सुनुवाइ नगरी भदौ २५ मा वडा अधिवेशन भएको थियो। संस्थापनइतरको असहमति रहँदारहँदै वडा अधिवेशन भएको भन्दै अस्वीकार गर्ने पौडेल पक्षले जनाएको छ।
पौडेल पक्षका शीर्ष नेताको बैठकपछि जारी विज्ञप्तिमा भनिएको छ ‘डडेल्धुरा जिल्लाको जस्तै अनियमितता र स्वेच्छाचारको पुनरावृत्ति अन्य २० जिल्लाहरुमा पनि हुन नपाओस्।’
शीर्ष नेताको बैठकपश्चात् वरिष्ठ नेता पौडेलले भने, ‘निष्पक्ष र पारदर्शी महाधिवेशन हुनेमा शंका पैदा भएको छ। जिल्ला कार्यसमितिको सहमतिबेगर वडा अधिवेशन भएको छ। जिल्ला र वडा कार्यसमितिको समर्थन बिना भएको वडा अधिवेशनलाई स्वीकार्न सकिन्न।’
राज्यशक्ति र प्रशासनिक शक्तिको दुरुपयोग गरी एकपक्षीय रुपमा वडा अधिवेशन गरिएको पौडेल पक्षको निष्कर्ष छ। क्रियाशील सदस्यता विवाद साम्य नभएकाले वडा अधिवेशन स्थगित गर्न जिल्ला सभापति मल्लले आग्रह गरेका थिए। निर्वाचन अधिकृतले मल्लको मागको वेवास्ता गर्दै वडा अधिवेशन गराएका थिए। मल्ल पक्षले भने वडा तहको अधिवेशन बहिष्कार गरेको थियो। जिल्ला तहबाट आएका नाममा हेरफेर गरिएको तथा केन्द्रबाट क्रियाशील सदस्य थपिएको संस्थापनइतरको भनाइ छ। डडेल्धुरामा करिब ५ सय क्रियाशील सदस्यता विवाद रहेको पौडेल पक्षको भनाइ छ।
पौडेल पक्षले जारी गरेको विज्ञप्तिको पूर्णपाठः
यतिबेला नेपाली कांग्रेसको साढे सात दशक लामो इतिहास र कांग्रेसको स्थापित मान्यता र परम्परामा कहिल्यै नभोगिएको तिक्त घटना झेल्न पर्दा नेपाली कांग्रेसका साथीहरुले निकै ठूलो तनाव महसुस गरेका छन्। नेपाली कांग्रेसको विधान र देशको संविधानको समयसीमा भित्र महाधिवेशन हुन नसक्नु अत्यन्त दुःखद् कुरा हो। यसले १४औं महाधिवेशनको सिलसिलामा देखिएको अवैधानिक र अलोकतान्त्रिक गतिविधिबाट महाधिवेशन निष्पक्ष हुन्छ भन्ने कुरामा गंभीर आशंका पैदा भएको छ। क्रियाशील सदस्यता वितरणमा डडेलधुरा लगायतका अधिकांश जिल्लामा पार्टी प्रवेशका नाममा निर्धारित विधि, प्रकया र मापदण्ड विपरीत फर्जी नाम समावेश गर्ने, प्रकृयासम्मत तलैबाट आएका नामहरु केन्द्रबाटै थपघट एवं हेरफेर गर्ने र कयाशिल सदस्यता विवाद समाधान नै नगरी नेताहरुको सहमति र संलग्नता वेगरनै प्रहरी प्रशासनको आडमा बडा अधिवेशन भयो भनिन् चरम अराजकता र मनपरितन्त्र यसक्रममा डडेल्धुरा मात्र होइन सुनसरी लगायतका मुलुकका अन्य कतिपय ठाउँमा समेत सत्ता र शक्तिको चरम दुरुपयोग भएका खबरहरु आइरहेका छन्।
देशव्यापी रुपबाट एकैपटक महाधिवेशन हुने परम्परा तोडेर अधिवेशन प्रारम्भ भएको एक हप्तासम्म २० जिल्लाको कृयाशील सदस्य सूची अझै टुङ्गो लगाईएको छैन। विधि–विधान विपरीत अधिकांश जिल्लामा क्रियाशील सदस्यताकै विषयमा गम्भीर विवाद उत्पन्न भएका छन्। क्रियाशील सदस्यता वितरणमा भएको गैरजिम्मेवारी, मनपरि र अराजकताले कांग्रेस लोकतान्त्रिक आदर्श र संस्कार अनुरुपको पार्टी नरहने खतराको लक्षण देखा पर्न थालेको छ।
मुलुकको संविधान र पार्टीको मर्यादा र परम्परामा बलमिच्याई हुन थाल्यो भने पार्टी, लोकतन्त्र, स्वच्छ राजनीतिक वातावरण आदि पक्षहरु दक्षित र कमजोर भएर जाने संभावना हामीले देखिरहेका छौ। यसलाई नेतृत्वले निष्पक्ष र न्यायोचित तरिकाले समाधान गर्नु पर्ने अनिवार्य आवश्यकता र जिम्मेवारी हो। डडेल्धुरा जिल्लाको जस्तै अनियमितता र स्वेच्छाचारको पुनरावृत्ति अन्य २० जिल्लाहरुमा पनि हुन नपाओस् भन्ने तर्फ सम्बद्ध पक्षको ध्यानाकषर्ण र खबरदारी गर्न चाहन्छौं।
पार्टीको आधारभूत र जिवन्त तत्व भनेकै क्रियाशील सदस्यहरू हुन्। तर नेतृत्वले समय छंदै यस्तो आधारभूत मामिलामा कुशलतापूर्वक ध्यान दिन नसक्दा आजको अराजक स्थितितिर पार्टीलाई धकेलेको हो र वर्तमान अराजकता, मनपरि र गैरजिम्मेवारीले हामीलाई निकै चिन्तित र गम्भीर बनाएको छ। पार्टीको स्थापित विधि र प्रक्रिया विरुद्ध खल्ला हस्तक्षेप भएकाले अधिवेशनका दौरानमा लज्जाजनक स्थिति समेत पैदा भएको छ। जसले पारदर्शी र निष्पक्ष रुपमा निर्वाचन सम्पन्न भई नेतृत्व चयन हुने परम्परामा विश्रङ्खलता पैदा भएको छ भन्ने हामो निष्कर्ष छ।
नेपाली कांग्रेसको विधानको धारा ४ अनुसार कयाशील सदस्यताको प्रारम्भ नै वडा समितिबाट प्रस्तावित भई आउने स्पष्ट व्यवस्था छ। विवाद नभए सोही अनुसार गर्ने र विवादित भए सहमतिमा क्रियाशील सदस्यताको टुङ्गो लगाउने, त्यसो पनि हुन नसक्ने अबस्थामा १३ औं महाधिवेशनका क्रियाशील सदस्यको आधारमा अधिवेशन हुने पार्टीको केन्द्रिय कार्यसमितिका निर्णयहरु अनसार विवादमा परेको नामावलीमा विधि र प्रकृया पुर्याएर १५ औं महाधिवेशनमा दिने भनी गरिएको निर्णय विपरित वडा अधिवेशन सुरु भएको हो, तर अहिले पार्टी विधान र केन्द्रिय कार्यसमितिको निर्णय समेतलाई लत्याएर बलपूर्वक प्रकया अगाडि बढाइएको छ। यसप्रति हामी गम्भीर असहमति छ।
१४ औ महाधिवेशनको क्रममा बनाईएका नयाँ क्रियाशील सदस्यहरु जो पार्टीको क्रियाशील सदस्य नै थिएनन् उनीहरुलाई समेत निर्वाचनमा विद्रोही उम्मेदवारका रुपमा उठेको भनी उजुर गर्ने र कारबाहीको लागि दबाब दिने कार्य ठाउँठाउँमा भईरहेको छ। यसबाट अन्य पार्टीबाट आएका नया सदस्यहरूमा के कस्तो मनोवैज्ञानिक असर पर्छ? यो विषय अन्यत्र लागू हुन्छ कि हुँदैन ? यस्ता गम्भीर आशंका र प्रश्न उत्पन्न भएका छन्। नेपाली कांग्रेसको लामो इतिहासका क्रममा पहिलो पटक विधान र परम्परा तोडेर क्रियाशील सदस्यताको टुङ्गो नलगाई अधिवेशन (निर्वाचन) प्रारम्भ गरिएको छ।
देशको संविधान र पार्टीको विधानले तोकेको महाधिवेशनको समय–सीमा नाघेर जानु, काँग्रेसका डडेलधुरा जिल्ला सभापति र कार्यसमिति कै सहभागिता र सहमतिलाई निषेध गरी काँग्रेस सभापतिले नै दिनुभएको वचन विपरीत राज्यशक्ति र प्रशासनिक शक्तिको दुरुपयोग गरी एकपक्षीय रुपमा गरिएको वडा अधिवेशनबाट लोकतान्त्रिक प्रणाली, पार्टीको मर्यादा र मूल्य–परम्पराको खिल्ली उडाइएको छ। यो अमान्य छ, त्यसैले यसको हामी घोर भत्र्सना गर्दछौं र यथाशिघ्र विधि र प्रकृया अनुसार नेतृत्व चयनको लागि पुनः निर्वाचन होस् भन्ने जोडदार आग्रह गर्दछौं।
जय नेपाल !
साथीहरुको तर्फबाट
रामचन्द्र पौडेल, नेपाली कांग्रेस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
