काठमाडौं– ‘तपाईंहरु २ मिनेटभित्र सबैजना बाहिर निस्किनुहोस्। हामीले बम राखेका छौं।’ भदौ २४ गते बिहान सवा १० बजे पुरानो बानेश्वरस्थित मातृका आँखा अस्पतालका रिसेप्सनिष्ट पूर्णबहादुर दोङको मोबाइलमा फोन गरेका व्यक्तिले भने। दोङले प्रतिप्रश्नसहित जवाफ फर्काए, ‘तपाईंले ठट्टा गर्नु भएको हो?’
‘नपत्याए तेस्रो तलाको बाथरुममा हेर्न जा’ दोङलाई अपरिचित व्यक्तिले फोनमा भने। उक्त फोनबारे दोङले तत्कालै अस्पतालका अध्यक्ष सुरज श्रेष्ठ र मेडिकल डाइरेक्टरलाई जानकारी गराए। उनीहरु बाथरुममा हेर्न जाँदा रातो बत्ती पिलिक पिलिक बलिरहेको थियो। त्यसपछि अध्यक्ष श्रेष्ठले प्रहरीलाई फोन गरेर घटनाबारे जानकारी गराए।
प्रहरी र नेपाली सेनाको टोली गएर डिस्पोज गर्दा उक्त वस्तु तर्साउन राखिएको नक्कली बम रहेको पाइएको थियो। यता बम राखेको भनेर दोङलाई फोन गर्ने व्यक्ति भने पहिचान भएको थिएन। उनीहरुको बारेमा अनुसन्धान गरेको प्रहरीले अन्तत: तीन जनालाई पक्राउ गरेर सार्वजनिक गरेको छ।
प्रहरी परिसर काठमाडौंले बम राख्ने समूहका सदस्यहरु धादिङको त्रिपुरासन्दरी गाउँपालिका–५ घर भई हाल काठमाडौं फुटुङ बस्ने २५ वर्षीय आशिष कुँवर र उनका सहोदर भाइ २० वर्षीय अभिषेक कुँवर र रोल्पाको परिवर्तन गाउँपालिका–१ खोलावाङका ४० वर्षीय अम्मरबहादुर रोक्का मगरलाई पक्राउ गरेको छ।
सिसीटिभीमा कैद भएका कुँवर दाजुभाइ।
उनीहरुले बम राखेको सिसीटिभी फुटेज समेत पाइएको थियो। सिसीटिभी फुटेज, मोबाइल लोकेसनलगायत प्राविधिक विश्लेषण गरी उनीहरुलाई पक्राउ गर्न प्रहरी सफल भएको थियो। बम राख्दा सिसी टिभी फुटेजमा देखिएका कपडा (उनीहरुले लगाएका लुगा) समेत प्रहरीले बरामद गरेको छ।
आशिष बिजुलीको काम गर्ने व्यक्ति हुन् भने उनका भाई अभिषेक होटल मजदुर हुन्। अर्का अम्मरबहादुर भने होटल व्यवसायी रहेको पाइएको छ।
युट्युब हेरेर बम बनाउन सिके
पक्राउ परेकाहरुसँग सोधपुछ गर्ने क्रममा उनीहरु युट्युबबाट बम बनाउन सिकेको प्रहरीसमक्ष बयान दिएका छन्। परिसरका प्रहरी वरिष्ठ उपरीक्षक तथा एसएसपी अशोक सिंह भन्छन्, ‘पक्राउ परेकाहरुले युट्युब हेरेर बम बनाउन सिकेको बताएका छन्। थप अनुसन्धान भने हुन बाँकी नै छ।’
अस्पतालमा राखिएको नक्कली बम।
पक्राउ परेकामध्ये एक जना बिजुलीको काम गर्ने भएकाले इलेक्ट्रिसिटीसँग पनि राम्रो ज्ञान भएकाले नक्कली बम बनाउन सहज भएको प्रहरीले जनाएको छ।
ट्वाइलेटमा राखिएको उक्त बममा टाइम समेत फिट गरिएको थियो। झट्ट हेर्दा सक्कली नै जस्तो बनाएर यो समूहले बम राखेको थियो।
३ करोड फिरौती माग
नक्कली बम राख्नुको उद्देश्य भने फिरौतीसँग जोडिएको प्रहरी अनुसन्धानबाट खुलेको छ। यो समूहले नक्कली बम राखेर तीन करोड रुपैयाँ फिरौती समेत माग गरेको एसएसपी सिंहले बताए।
नक्कली बम राखेपछि उनीहरुले दोङलाई मेसेज गर्दै '३० मिनेटभित्र सटर बन्द गरेर सबै बाहिर निस्की प्रहरीलाई खबर गरिस् भने ब्लास्ट गर्दिन्छु, तिमारु कोही बाँच्दैन' भनेका थिए।
चिकित्सकलाई पठाइएको धम्कीपूर्ण मेसेज।
उक्त मेसेज गर्दै बम राख्नुको पछाडि फिरौतीका लागि भएको बुझिएको छ। बम राखिसकेपछि अस्पतालका एक डाक्टरलाई आशिषले बारम्बार फोन गर्दै ३ करोड रुपैयाँ फिरौती समेत माग गरेका थिए। नदिए घरमा समेत बम राखेर उठाइदिनेसम्मको धम्की दिएका थिए।
अस्पताल र घरपरिवार सुरक्षित राख्ने भए ३ करोड लिएर नागढुंगामा आउनु भनेर फोन गरेका थिए।
सहकारीको ऋण तिर्न बम राखेर फिरौती माग
बम राख्नुको कारण भने सहकारीको ऋण तिर्न भएको पक्राउ परेकाहरुले बताएका छन्। पक्राउ परेकामध्ये आशिषले केही समयअघि सोही अस्पतालमा आँखाको शल्यक्रिया गरेका थिए। जसकारण अस्पताल र त्यहाँ कार्यरत केही डाक्टरका बारेमा उनलाई राम्रोसँग जानकारी थियो।
उनै आशिषले एक सहकारीमार्फत् १७ लाख रुपैयाँ ऋण समेत लिइएको पाइएको छ। सोही ऋण तिर्न नक्कली बम राखेर फिरौती माग गर्नु परेको उनीहरुले प्रहरीसमक्ष बताएका छन्।
पक्राउ परेकाबाट बरामद गरिएको सामान।
अर्कोतर्फ उनीहरुले बेल्जियम जानका लागि भिसा अप्लाई समेत गरेको र त्यसका लागि तत्काल चाहिने रकम समेत नभएकाले नक्कली बम राखेर तर्साइ पैसा उठाउने योजना बनाएको बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769055728.png)
-1764146706.png)
