काठमाडौं- सुदूरपश्चिम प्रदेश सभामा नेकपा (एकीकृत समाजवादी) सबैभन्दा ठूलो दल बनेको छ। नेकपा (एमाले) परित्याग गरेर १४ जना प्रदेश सभा सदस्यले एकीकृत समाजवादी रोजेपछि सबैभन्दा ठूलो दल बनेको हो।
सातवटा प्रदेशमध्ये सबैभन्दा धेरै सांसद यो प्रदेशमा एमाले छाडेर एकीकृत समाजवादीमा लागेका छन्। तर, ठूलो दल बनेको उक्त पार्टीले सुदूरपश्चिम प्रदेश इञ्चार्ज भने तोक्न सकेको छैन।
केही दिनअघि पार्टीले छ वटा प्रदेशका इञ्चार्ज र विभिन्न जनवर्गीय संगठनका प्रमुखको जिम्मेवारी बाँडफाँट गरेको थियो। भदौ ९ गते निर्वाचन आयोगमा औपचारिक रूपमा दर्ता भएपछि प्रदेशमा पार्टी संगठनका कामलाई अघि बढाउन इञ्चार्ज तोकिएको थियो। छ वटा प्रदेशमा इञ्चार्ज तोकिए पनि सुदूरपश्चिममा भने केन्द्रले तत्कालका लागि खाली राखेको छ।
केही दिनअघि एकीकृत समाजवादीका केन्द्रीय सदस्य जीवनराम श्रेष्ठले सुदूरपश्चिममा इञ्चार्ज पछि तोक्ने गरी खाली राखिएको बताएका थिए।
इञ्चार्जमा वरिष्ठदेखि कनिष्ठसम्मका नेताहरू आकांक्षी
नवगठित नेकपा (एकीकृत समाजवादी)को सुदूरपश्चिम प्रदेश इञ्चार्ज बन्नका लागि वरिष्ठदेखि कनिष्ठसम्मका नेताहरूले इच्छा देखाएका छन्।
प्रदेश सभा र स्थानीय तहका जनप्रतिनिधिहरूले दल रोज्न पाउने समय मंगलबारसम्म भएको र पहिले नै इञ्चार्ज तोक्दा असन्तुष्टि हुनसक्ने भन्दै तत्काल नतोकिएको नेताहरूको बुझाइ छ। एकीकृत समाजवादीकी केन्द्रीय सदस्य एवं सुदूरपश्चिम प्रदेश सरकारका आन्तरिक मामिला तथा कानुनमन्त्री पूर्णा जोशीले इञ्चार्ज तोक्न अहिले नै हतार गर्न नहुने बताइन्।
‘पार्टी रोज्ने क्रम चलिरहेको छ। अध्यक्षले एक जनालाई टीका लगाएर इञ्चार्ज, अध्यक्ष, सहअध्यक्ष हामी बनाउँदैनौं,’ उनले भनिन्, ‘कामको मूल्यांकनको आधार, सबै जिल्लासँगको समन्वयका आधारमा हुन्छ।’ उनले नौ वटै जिल्लाको कमाण्ड गर्नसक्ने र कार्यकर्ता चिन्नसक्ने व्यक्तिलाई इञ्चार्ज बनाउनुपर्छ भन्ने आफूहरूको धारणा रहेको बताइन्।
‘हामीले जसरी सुदूरपश्चिम प्रदेश सभामा प्रभाव देखायौं, त्यो प्रभाव राजनीतिक तहमा देखाउनसक्नेलाई जिम्मेवारी दिनुपर्छ भन्ने हो,’ उनले भनिन्, ‘वरिष्ठ नेताहरू छलफलमा हुनुहुन्छ, उहाँहरूको निर्णयपछि टुंगो लाग्छ।’
नेकपा एकीकृत समाजवादीको प्रदेश इञ्चार्जका लागि गरिमा शाहको नाम प्रस्ताव गरिएको थियो। तर, केन्द्रमा उनको नाम टुंगो लाग्न सकेन। उनीसहित एकीकृत समाजवादीमा लागेका उर्वादत्त पन्त, रामकुमार ज्ञवाली, विक्रम शाही, दीर्घ सोडारी, प्रेम आले, तारा लामा तामाङ, पूर्णा जोशीलगायतको चर्चा भइरहेको छ।
तर, इञ्चार्जको जिम्मेवारी दिँदा तत्कालीन एमालेमा हुँदाको जिम्मेवारी लगायतका मापदण्डसमेत हेर्नुपर्ने भएकाले नेतृत्वले प्रदेशमा रहेका नेताहरूसँगको छलफलकै आधारमा इञ्चार्ज तोक्ने बुझिएको छ।
एकीकृत समाजवादी रोजे भानुभक्त इञ्चार्ज, नभए गरिमा शाह
नेकपा एमालेमै हुँदा २०७७ फागुन २३ को सर्वोच्च अदालतको फैसलापछि असन्तुष्ट पक्षको नेतृत्व गरिरहेका माधवकुमार नेपाल समूहले केन्द्रदेखि देशैभर समानान्तर कमिटी गठन गर्यो।
उक्त समयमा भानुभक्त जोशीलाई सुदूरपश्चिम प्रदेश कमिटीको अध्यक्षको जिम्मेवारी दिइएको थियो। एमालेभित्रको संघर्षका क्रममा साथ दिँदै आएका जोशीले भदौ २ गते एमाले विभाजन गरेर एकीकृत समाजवादी गठन गर्ने निर्णयमा भने नेपाललाई साथ दिएनन्।
तर, उनले अध्यक्ष नेपाललाई भेटेर आफू एकीकृत समाजवादीमा नै लाग्ने बताएका कारण अहिले नै सुदूरपश्चिमको इञ्चार्ज कसैलाई नतोकिएको सो पार्टीका एक केन्द्रीय सदस्य बताउँछन्। ‘भानुभक्तजीले बीचमा अध्यक्ष कमरेडसँग एकीकृत समाजवादीमा आउँछु भनेर कुरा गर्नुभएको रहेछ,’ उनी भन्छन्, ‘उहाँ आजसम्म खुल्नुभएको छैन। एकीकृत समाजवादीमा आउनुभयो भने उहाँ नै प्रदेशको इञ्चार्ज हुनुहुन्छ, नभए गरिमा शाह नै हुने सम्भावना छ।’
शाह एमालेको आठौं र नवौं महाधिवेशनमा केन्द्रीय सदस्य बनेकी थिइन्। त्यसैले पनि उनी अरू नेताहरूभन्दा वरिष्ठ मानिन्छिन्।
जोशी आठौं महाधिवेशनमा निर्वाचित र नवौंमा केन्द्रीय सदस्यमा पराजित भएका थिए। पछि उनी केन्द्रीय सदस्यमा मनोनीत भएका थिए। उनले विगतमा सेती अञ्चल इञ्चार्जको जिम्मेवारी पनि सम्हालिसकेका छन्।
अर्का नेता पन्तले छैठौंदेखि नवौं महाधिवेशनसम्म केन्द्रीय सदस्य रहँदै महाकाली इञ्चार्जको जिम्मेवारी सम्हालिसकेका थिए। नवौं महाधिवेशनमा भने उनी पराजित भएका थिए। पछि मनोनीतमासमेत उनी परेनन्।
एकीकृत समाजवादीका केन्द्रीय सदस्य ज्ञवाली नवौं महाधिवेशनपछि केन्द्रीय सदस्यमा मनोनीत भएका थिए। उनी एमालेको महाकाली अञ्चल इञ्चार्जसमेत बनेका थिए।
एकीकृत समाजवादी रोजेका नेता शाही एमालेमा हुँदा केन्द्रीय सदस्य र कञ्चनपुरको इञ्चार्ज थिए। सुदूरपश्चिमबाट प्रत्यक्ष निर्वाचित एक मात्र सांसद आलेले एमाले परित्याग गरेर एकीकृत समाजवादी रोजेका छन्। उनले पनि सुदूरपश्चिम इञ्चार्ज बन्ने आकांक्षा देखाएका छन्। तर, उनले अहिले नै जिम्मेवारी पाउने सम्भावना नरहेको नेताहरू बताउँछन्।
प्रदेश सभामा एकीकृत समाजवादीलाई सबैभन्दा ठूलो दल बनाउन महत्त्वपूर्ण भूमिका खेलेका सुदूरपश्चिम प्रदेशका भौतिक पूर्वाधार विकासमन्त्री सोडारी र आन्तरिक मामिला तथा कानुनमन्त्री जोशीले पनि प्रदेश इञ्चार्ज बन्न आकांक्षा देखाएको उनीहरूनिकट स्रोतले बताएको छ।
यसैगरी एमालेमा हुँदा सुदूरपश्चिम प्रदेश सभाको प्रमुख सचेतकको जिम्मेवारी सम्हालेका तत्कालीन एमालेको कञ्चनपुर जिल्ला अध्यक्ष तामाङ पनि प्रदेश इञ्चार्जको आकांक्षी देखिएका छन्।
एकीकृत समाजवादीका स्थायी कमिटी सदस्य बेदुराम भुसालले हाल छलफलमै रहेकाले तत्काल प्रदेश इञ्चार्ज नतोकिएको बताए। एक/दुई दिनमै सुदूरपश्चिममा पार्टीको इञ्चार्ज टुंगो लाग्ने उनको भनाइ छ।
एकीकृत समाजवादीले प्रदेश १ मा घनेन्द्र बस्नेत, प्रदेश २ मा धर्मनाथ साह, बागमतीमा केदार न्यौपाने, गण्डकीमा केशवलाल श्रेष्ठ, लुम्बिनीमा भागवत विश्वासी र कर्णाली प्रदेशमा प्रकाश ज्वालालाई प्रदेश इञ्चार्ज तोकिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
