काठमाडौं- यतिबेला कलाकारहरु फिल्मको सुटिङमा व्यस्त हुनुपर्ने हो। तर, कोरोना महामारीका कारण दुई वर्षयता सहज र खुलस्त रुपमा फिल्मको सुटिङ हुन पाएको छैन। केही कलाकारहरुले म्युजिक भिडियोमा अभिनय गरे पनि अधिकांश कलाकार फुर्सदमा छन् यतिबेला।
महमारीको यो फुर्सदिलो समयबीच केही अभिनेत्रीहरु भने युट्युबमा प्रवेश गरेका छन्। केहीले ‘भ्लग’ त केहीले आफूले अभिनय गरेका गीत छयांकन गर्ने बेलाका भिडियोहरु आफ्नो च्यानलमा अपलोड गर्दै आएका छन्। सिनेमा बन्ने समयमा व्यस्त रहने अभिनेत्रीहरुले नै अहिले आफूलाई युट्युबमा प्रस्तुत गरिरहेका छन्।
केकी अधिकारी, प्रियंका कार्की, वर्षा राउत, स्वस्तिमा खड्का, आँचल शर्मालगायत सिनेमाको छायांकनमा व्यस्त रहने अभिनेत्रीहरुको व्यस्तता अहिले युट्युबमा देखिन्छ। केहीले आफ्नो दैनिकीको 'भ्लगिङ' भिडियो बनाइरहेका छन् भने केही आफ्नो किचेनमा रमाइरहेका भिडियो बनाइरहेका छन्। कोही दर्शकसँग प्रश्नोत्तरमा रमाएर भिडियो बनाइरहेका छन्।
प्रियंका कार्की : खाना पकाउनेदेखि टक शोसम्म
युट्युबमा प्रवेश गरेकामध्ये सबैभन्दा पहिले भिडियो राख्ने अभिनेत्री हुन् प्रियंका कार्की। २०७६ असारमा उनले युट्युबमा पहिलो भिडियो राखेकी थिइन्। त्यसयता उनी निरन्तर युट्युबमा सक्रिय छिन्। उनले सुरुमा आफ्नै निर्माणमा बनेको वेब सिरिज ‘जस्ट अनोदर लभ स्टोरी’ अपलोड गरेकी थिइन्। त्यसपछि केही समय उनले खानपिनसँग सम्बन्धित भिडियो राखेकी थिइन्।
कहिले खानपिनसँग सम्बन्धित त कहिले अन्य कलाकारसँगको गफगाफका भिडियोहरु हालिरहन्छिन् प्रियंका आफ्नो युट्युब च्यानलमा। ‘चिटच्याट’ नाम दिएर त उनले शृङ्खलाबद्ध रुपमा विभिन्न कलाकारसँगको कुराकानीलाई प्रस्तुत गरिरहेकी छन्। त्यसबाहेक आफ्नो व्यक्तिगत कुरा समेटिएको भिडियो पनि राखेकी छन्। पछिल्लो समय उनले आफ्नो ‘प्रेग्नेन्सी’सँग सम्बन्धित भिडियोहरु राखेकी छन्।
केकी अधिकारी : दर्शकसँगको प्रश्नोत्तरमा रमाउँदै
अर्की अभिनेत्री केकी अधिकारी पनि युट्युबमा सक्रिय छिन्। गत वर्ष जेठ महिनाबाट उनले युट्युबमा भिडियो अपलोड गर्न थालेकी हुन्। उनको पहिलो भिडियो न्यूयोर्कको यात्राबारे ‘भ्लगिङ’ रहेको छ। भ्लगिङसँगै कहिलेकाँही उनी टक शो, समसामयिक विषयमा टिप्पणी पनि गर्छिन्। उनले पछिल्लोपटक आफ्नो च्यानलमार्फत् दर्शकसँग कुराकानी गरेकी थिइन्। पछिल्लो भिडियोमा केकीले रमाइलो शैलीमा दर्शकका प्रश्नहरुको जवाफ दिएकी छन्।
त्यसबाहेक उनले कोरोना महामारी नियन्त्रणका लागि गरिएको लकडाउनको समयमा विभिन्न चिकित्सकसँग संवाद गर्दै भिडियो राखेकी थिइन्। साथै, जनचेनतामूलक विषयमा गरिएका कुराकानी र कमेन्ट्री भिडियोहरु पनि उनले आफ्नो च्यानलमा राखेकी छन्।
वर्षा राउत : धेरै फलोअर भएको च्यानल
अभिनेत्री वर्षा राउत अहिले म्युजिक भिडियोमा व्यस्तमध्येकी अभिनेत्री हुन्। हाल उनी युट्युबको ट्रेण्डिङमा पर्ने भिडियोहरुमा अभिनय गरिरहेकी हुन्छिन्।
आफ्नो अभिनयबाहेक उनी आफ्नो युट्युब च्यानलमा पनि उत्तिकै सक्रिय छिन्। दुई लाखभन्दा धेरै सदस्य जोडिएको च्यानलमा वर्षाले आफ्नो दैनिक जीवनसँग जोडिएका भिडियोहरु राख्ने गरेकी छन्। विभिन्न ठाउँको यात्रादेखि आफ्ना प्रशंसकसँग प्रश्नोत्तरमा रमाएका भिडियोहरु उनले युट्युबमा राखेकी छन्।
श्रीमानको नाम जोडेर जुराइएको ‘शान्सा’ नाम दिएर खोलिएको उनको युट्युब च्यानलमा डेढ वर्षअघिबाट भिडियो राख्न थालिएको थियो। उनको युट्युब च्यानल अन्य अभिनेत्रीहरुको तुलनामा बढी चलेको छ। तर, तीन महिनायता भने उनी युट्युबमा निस्क्रियजस्तै देखिएकी छन्।
स्वस्तिमा खड्का : पहिले सक्रिय, अहिले निस्क्रिय
अभिनेत्री स्वस्तिमा खड्कालाई अहिले फुर्सद छैन। फिल्ममा जस्तै म्युजिक भिडियोमा पनि उत्तिकै माग भएकी अभिनेत्री हुन् उनी। लगातार उनका म्युजिक भिडियोहरु सार्वजनिक भइरहेका छन्।
एक वर्षअघि सुरु भएको उनको युट्युब च्यानलमा हालसम्म ६ वटा भिडियो मात्रै राखिएका छन्। उनको भिडियो कुनै निश्चित विषयमा छैन। स्वस्तिमाले आफूसँग जोडिएका जुनसुकै विषयमा पनि भिडियो राखेको देखिन्छ। कहिले भ्लग पनि बनाउँछिन्, कहिले फोटो सुटको भिडियो राख्छिन्। आफूले अभिनय गरेको म्युजिक भिडियोको पृष्ठभूमिका भिडियोसमेत राख्न भ्याएकी छिन्।
तर, सुरुआती चरणमा सक्रिय रहेकी स्वस्तिमा अहिले युट्युबमा सक्रिय छैनन्। सात महिनायता उनले कुनै भिडियो राखेकी छैनन्।
आँचल शर्मा : विवाहको भिडियोमा सीमित
अभिनेत्री आँचल शर्माले पनि आफ्नो छुट्टै युट्युब च्यानल बनाएकी छन्। तर, उनले अन्य अमिनेत्रीले जस्तो युट्युबकै लागि भिडियो बनाएको देखिँदैन।
उदीप श्रेष्ठसँग वैवाहिक बन्धनमा बाँधिएकी आँचलले आफ्नो विवाहका भिडियोहरु आफ्नो च्यानलमा राखेकी छन्। त्यसबाहेक कुनै पनि भिडियो राखेकी छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
