भदौ तेस्रो सातादेखि लाइसेन्सको परीक्षा सञ्चालन हुँदै

अटो

नेपाल लाइभ सोमबार, भदौ १४, २०७८ ०७:३४

फाइल तस्वीर

काठमाडौं– कोरोना संक्रमणका कारण चार महिनादेखि रोकिएको सवारी चालक अनुमतिपत्रको परीक्षा पुनः सुरु हुने भएको छ। भदौ तेस्रो सातादेखि लिखित र प्रयोगात्मक परीक्षा (ट्रायल) दुवै सुरु हुने यातायात व्यवस्था विभागले जनाएको छ।

विभागले मातहतका कार्यालयलाई भदौ १० गते नै परिपत्र गरी तोकिएको स्वास्थ्य मापदण्ड पूरा गरेर सवारी चालक अनुमतिपत्रको लिखित तथा ट्रायल परीक्षा सञ्चालन गर्न निर्देशन दिएको निर्देशक लोकनाथ भुसाालले बताए।

सात दिनको समया राखेर सूचना प्रकाशन गरी परीक्षा सञ्चालन गर्न निर्देशन दिइएको उनको भनाइ छ। सबै कार्यालय आन्तरिक तयारी पूरा गरी परीक्षा सञ्चालनको तयारीमा रहेको उनले बताए।

ललितपुर सवारी चालक अनुमतिपत्र कार्यालयले २० भदौदेखि परीक्षा सञ्चालन गर्ने गरी आइतबार सूचना प्रकाशित गरेको छ। जसअन्तर्गत प्रयोगात्मक परीक्षाको लागि आवेदन दिई बायोमेट्रिक गरेका लिखित परीक्षामा संलग्न हुने परीक्षा, लिखित परीक्षा दिई प्रयोगात्मक परीक्षामा सहभागी सम्पूर्ण परीक्षार्थी, प्रयोगात्मक परीक्षामा अनुतीर्ण भई पुनः सहभागी हुन बाँकी परीक्षार्थी तथा कार्यालयमा उपस्थित भई वर्ग थपका लागि राजस्व बुझाइसकेका सेवाग्राहीको परीक्षा सञ्चालन हुनेछ।

विभाग अन्तर्गत १९ वटा यातायात सेवा कार्यालयबाट सेवा प्रवाह हुँदै आएको छ। गत वैशाख १४ देखि रोकिएको सवारी चालक अनुमतिपत्रको परीक्षा खुलाउन जनस्वास्थ्यको मापदण्ड पूरा गरी प्रगोगात्मक परीक्षा गर्ने विषयमा भदौ पहिलो साता कोभिड संकट व्यवस्थापन केन्द्र (सीसीएमसी) र विभागबीच छलफल भएको थियो।

विभागले कोभिड–१९ महामारीको बीचमा जनस्वास्थ्यको मापदण्ड अपनाएर ट्रायल परीक्षा सञ्चालन गर्न मापदण्ड नै बनाएको छ। अब अनलाइन आवेदन र लिखित परीक्षा पनि सञ्चालन हुने विभागले जनाएको छ। करिब ४ लाख परीक्षार्थी अनलाइन आवेदन दिएर परीक्षाको प्रतीक्षामा छन्।

विभागले सवारी चालक अनुमतिपत्र परीक्षा सञ्चालन कार्यविधि निर्देशिका–२०७७ पनि लागू हुने जनाएको छ। यसअनुसार प्रयोगात्मक (ट्रायल) परीक्षामा १०० अंकभार मानेर ७० अंक ल्याउने परीक्षार्थी पास हुनेछन् । अब हुने अनुमतिपत्रको परीक्षामा यो नियम लागु हुने विभागका महानिर्देशक नमराज घिमिरेले जानकारी दिए।

विभागका अनुसार अव कार्यान्वयनमा ल्याउन लागिएको व्यवस्थामा मेजर र माइनर दुई क्याटोगरीमा विभाजन गरेर प्रयोगात्मक परीक्षाको अंकभार अनुसार अंक दिनेछ। नयाँ व्यवस्था अनुसार परीक्षार्थीले ट्रायल लिनका लागि आफ्नै सवारीसाधनको प्रयोग गर्न सक्नेछन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सिरहामा मदिरा तस्करी गर्ने गाडीको ठक्करबाट सशस्त्रका सईको मृत्यु

कीर्तिपुरका २० स्थानमा उत्साहपूर्वक मतदान जारी

एसिसी यू-१९ एसिया कपमा‌ नेपालले बंगलादेशसँग खेल्दै