काठमाडौं- गृहमन्त्री बालकृष्ण खाँणले विपद् घटनाका कारण मृत्यु भएका व्यक्तिका परिवारलाई तत्काल राहत उपलब्ध गराउन, घाइतेको उपचारको व्यवस्था मिलाउन र घरवार विहीन भएकाहरुलाई सुरक्षित स्थानमा राखि क्षति भएका आवासको पुनर्निर्माणको प्रक्रिया आरम्भ गर्न निर्देशन दिएका छन्।
शुक्रबार बसेको विपद् व्यवस्थापनसँग सम्बन्धित गृह मन्त्रालय, नेपाली सेना, नेपाल प्रहरी, सशस्त्र प्रहरी बल, नेपाल, विपद् जोखिम न्यूनीकरण तथा व्यवस्थापन प्राधिकरण, सडक विभाग, जलस्रोत तथा सिंचाई विभाग, खानी तथा भूगर्भ विभाग, खानेपानी तथा ढल व्यवस्थापन विभाग लगायतका निकायका प्रतिनिधिहरु सम्मिलित वैठकमा गृहमन्त्री खाँणले मनसुनजन्य विपद्को प्रभावकारी प्रतिकार्य, पीडित परिवारलाई राहत, घाइतेहरुको उपचार र क्षति भएका भौतिक संरचना/पूर्वाधारहरुको पुनर्निर्माण पुनर्स्थापनाका लागि निर्देशन दिएका हुन्।
बैठकमा मन्त्रालय, सुरक्षा निकाय तथा अन्य निकायका प्रतिनिधिहरुबाट हालैका दिनमा मनसुनजन्य विपद् (वाढी, पहिरो र डुवान) बाट भएको क्षति, खोज तथा उद्दार र पुनर्निर्माण र पुनर्स्थापनाका लागि भएका प्रयासहरुबारे जानकारी गराएको गृहमन्त्रालयका सहसचिवसमेत रहेका प्रवक्ता फणिन्द्रमणि पोखरेलले जानकारी दिए।
विगत २ दिनको अविरल वर्षाका कारण डुवान भई कञ्चनपुर, कैलाली, दाङ, रुपन्देही, नवलपरासी (बर्दघाट सुस्ता पूर्व), नवलपरासी (बर्दघाट सुस्ता पश्चिम), चितवन, महोत्तरी लगायतका जिल्लाहरुमा करिव ४०० (चार सय) जनालाई सुरक्षित स्थानमा स्थानान्तरण गरिएको छ।
वैठकमा गृह सचिब टेकनारायण पाण्डेले मनसुनजन्य विपद्का कारण जोखिममा रहेका मानिसहरुको प्राथमिकताका साथ उद्धार गरी सुरक्षित स्थानमा राख्न पर्ने, अवरुद्ध सडक, खानेपानी लगायतका सेवाहरु तत्काल सुचारु गर्न सबै जिम्मेवार निकायहरुले समन्वयात्मक रुपमा कार्य गर्नु पर्ने विषयमा जोड दिएका थिए।
मन्त्री खाँणले मनसुनजन्य विपद्का कारण मृत्यु भएका व्यक्तिहरुका प्रति हार्दिक श्रद्धाञ्जली र परिवार तथा आफन्तजनमा समवेदना व्यक्त गरे।
बाढीका कारण विभिन्न स्थानको सडक पल लगायतका भौतिक संरचनाहरुमा क्षति भएकोले सम्बन्धित निकायलाई उपलब्ध सबै विकल्पको उपयोग गरी त्यस्ता क्षतिग्रस्त संरचनाको पुनर्निर्माण र पुनर्स्थापना गरी सेवा सुचारु गर्न समेत गृहमन्त्री खाँणले निर्देशन दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
