काठमाडौं- नेपाली कांग्रेसको विवादित क्रियाशील सदस्यता टुंग्याउनका लागि बनेको कार्यदलले छानबिन समितिले गरेका कार्यमा केही परिमार्जन गरेको छ।
तीन सदस्यीय कार्यदलले छानबिन समितिले स्थगन गरेका सबै स्थानको क्रियाशील सदस्यता १३औं महाधिवेनको कायम हुने गरी प्रतिवेदन बुझाएको छ। पार्टी सभापति शेरबहादुर देउवा र वरिष्ठ नेता रामचन्द्र पौडेललाई बुझाइएको प्रतिवेदनमा प्रमाण पुर्याएर आएको अवस्थामा नवीकरण भदौ १० सम्म जारी रहने उल्लेख छ।
अन्य दलबाट कांग्रेस प्रवेश गरेका सदस्यहरु नवीकरण गर्नेको संख्याभन्दा बढी हुन नहुने निर्णय भएको छ। बाराको १ र ४ का सबै वडाको क्रियाशील स्थगित गरेर १३ औं महाधिवेशनका कायम गरिने भएको छ। र, धनुषा ४ र सर्लाही २ को विवाद १२ गतेसम्म टुंगो लगाउने निर्णय गरिएको छ।
बाराको १६६ र सोलुखुम्बुको ५१५ फाराम हालको लागि स्थगित गरिएको छ। क्रियाशील सदस्यता टुंगो लागेपछि कार्यान्वयनको अवस्था हेर्ने गरी नेताहरुलाई जिम्मेवारी दिइएको छ। क्रियाशील सदस्यता छानबिन समितिमा रहेका छ जना नेतालाई प्रदेशगत जिम्मेवारी दिइएको छ।
प्रदेश १ र २ मा आनन्द प्रसाद ढुङ्गाना र जीवन परियारलाई जिम्मेवारी तोकिएको छ। बागमती र गण्डकीमा श्याम घिमिरे र प्रदीप पौडेलले क्रियाशील सदस्यताको कार्यान्वयनको अवस्था हेर्नेछन्। लुम्बिनी, कर्णाली र सुदूरपश्चिम जीवन परियार र योगन्द्र चौधरीलाई जिम्मेवारी दिइएको छ।
केन्द्रीय समितिको निर्णयअनुसार क्रियाशील सदस्यताको विवाद टुंगा लगाउन नेता कृष्णप्रसाद सिटौला, डा मिनेन्द्र रिजाल र रमेश लेखकलाई जिम्मेवारी दिइएको थियो।
सोमबार राति बुझाइएको प्रतिवेदनमा उल्लेखित निर्णयहरुः
१. छानबिन समितिले टुंगो लगाएका सबै विषयहरु कार्यान्वयन गर्न बाँकी भएको अवस्थामा कार्यान्वयन गर्ने। छानबिन समितिले स्थगन गरेका सबै स्थानको स्थगन हुने।
२. प्रमाण पुर्याएर आएको अवस्थामा नवीकरण भदौ १० गतेसम्म जारी रहने।
३. अन्य दलबाट कांग्रेस प्रवेश गरेका सदस्यहरुको हकमा नवीकरण गर्ने संख्या ननाघ्ने गरी समायोजन गर्ने।
४. समायोजन समितिले निर्णय गरेको सूची मापदण्ड पूरा गर्न तल जाँदा सूचीमा हेरफेर भएको देखिएमा समायोजन समितिको निर्णयसँग रुजु गरी सोही सूचीअनुसार गर्ने।
५ कैलाली जिल्लाको टीकापुर क्षेत्र नम्बर १ मा वडा र क्षेत्रबीच समन्वय गर्ने। समन्वय हुन नसके स्थगन गर्ने।
६.सप्तरी र बारा जिल्लाका सप्तरीको ३ मा ७ वडा स्थगन, बाँकी क्षेत्रको सदर। सप्तरीको १, २ र ४ क्षेत्र स्थगित। बारा जिल्लामा २ र ३ को २ मा १७ वडा ३ मा ६ वडाको स्थगन। बारा १ र ४ क्षेत्र सबैको स्थगित।
७. धनुषा ४ र सर्लाही २ को विवाद १२ गतेसम्म टुंगो लगाउने।
८. बाराको १६६ फाराम हाललाई स्थगन।
९. सोलुखुम्बुको ५१५ फारम हालको लागि स्थगन।
१०. पछिल्लो निर्वाचनमा जुनसुकै तहमा कांग्रेसबाट निर्वाचित भएको व्यक्ति क्रियाशील सदस्यताबाट वञ्चित नबनाउने।
११. माथि उल्लेखित स्थानबाहेकमा क्रियाशील सदस्यता छानबिन समितिले गरेका निर्णय कार्यान्वयन हुने।
१२. निर्णय कार्यान्वयन गराउनका लागि प्रदेशअनुसार नेताहरुलाई जिम्मेवारी दिने। प्रदेश १ र २ मा आनन्द प्रसाद ढुङ्गाना र जीवन परियार, बागमती र गण्डकी श्याम घिमिरे र प्रदीप पौडेल, लुम्बिनी, कर्णाली र सुदूरपश्चिम जीवन परियार र योगन्द्र चौधरी।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768291693.png)
-1764146706.png)
