गुलरिया– ऊर्जा, जलस्रोत तथा सिँचाइमन्त्री वर्षमान पुनले तीन वर्षमा बर्दियालाई बाढीपीडितमुक्त जिल्ला बनाइने घोषणा गरेका छन्।
मन्त्री पुनले दिर्घकालीन रुपमा बबई नियन्त्रण नहुँदा वर्षेनी बस्तीमा नदी पसी जनतालाई दुःख भएको भन्दै गुरुयोजनानुसार नदी नियन्त्रण गर्न बजेट छुट्याइने बताए।
उनले जब्दीघाटस्थित बबई नदीको पुल तत्काल निर्माण गरिने प्रतिबद्धतासमेत व्यक्त गरे।
यहाँ बुधबार गरिएको अनुगमनका क्रममा उनले भौतिक तथा पूर्वाधार मन्त्रालयसँगको समन्वयमा पुल निर्माण अघि बढाइने बताएका हुन्। उनले बबई सिँचाइ आयोजनाको नहर निर्माण तीव्र गतिमा भएकामा सन्तोष व्यत्त गर्दै पूर्व र पश्चिम गरी निर्माणाधीन ४३ किलोमिटर नहरले अन्न उत्पादनमा व्यापक बढोत्तरी ल्याउने आशा व्यक्त गरे। मन्त्री पुनले भेरी बबई डाइभर्सन सम्पन्न भएपछि बर्दियाको ८० प्रतिशत जमीनमा सिँचाइ सुविधा पुग्ने जिकिर गरे।
अनुगमनका क्रममा उनले बबई–भादा–औरही नदी व्यवस्थापन आयोजनाले २१ ठेक्कामा २७ आयोजना ३ अर्ब ९२ करोड रुपैयाँ लागतमा काम गरिरहेकामा सन्तोष व्यक्त गरे। बबई नदीले गर्ने कटान र डुबान नियन्त्रणका लागि सुरु गरिएको तटबन्धनले तीव्रता पाएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
