काठमाडौं- नेकपा (माओवादी केन्द्र)का सांसद मातृका यादवले अहिलेको सरकारलाई परमादेशको सरकार भन्नेहरू राजीनामा दिनुपर्ने बताएका छन्।
उनले पूर्वप्रधानमन्त्री केपी शर्मा ओली र परमादेश भन्ने टिप्पणी गर्नेहरूलाई सांसद पदबाट राजीनामा दिन माग गरेका हुन्। बिहीबार प्रतिनिधि सभाको विशेष समयमा बोल्दै उनले पूर्वप्रधानमन्त्री ओलीमाथि 'मानसिक रुपमा समस्याग्रत' रहेको भनी टिप्पणी समेत गरे।
उनको उक्त टिप्पणीप्रति एमालेले नियमापत्ति नै गरेको थियो। ‘प्रतिगमन र अग्रगमनका बीचमा बहस चलिरहेको छ। प्रतिगमन र अग्रगमनको लडाइँको बीचमा शेरबहादुर देउवा प्रधानमन्त्री हुनु भएको छ’, यादवले भने ‘बहस राम्रै चलेको छ। परमादेश र जनादेश। परमादेशको कुरा गर्नेलाई मेरो सुझाव यो संसदमा हामी जनतादेशबाटै आएका हौं। परमादेश भन्नेले राजीनामा दिनुस्।’
संविधानले दिएको अधिकारलाई उचित र अनुचित रुपमा प्रयोग गर्ने कुरामा मात्र विवाद भएको भन्दै उनले संविधानमा विवाद भयो भने कसले समाधान गर्ने वा व्याख्या गर्ने भनी उल्लेख भएको ख्याल गर्न उनले आग्रह गरे।
‘यो संविधान लेखनमै सक्रिय, उत्सव मनाउने र हस्ताक्षर गर्नेहरुले नमान्दा वा आफूअनुकुल व्याख्या गर्दा ठीक हुने’ उनले भने, ‘आफू अध्यादेश ल्याउने अनि संविधानमा उल्लेख नै नभएको विघटन गर्ने। अदालतले विघटन गैरकानुनी छ भनेपछि अरुलाई परमादेशको सरकार भन्ने पूर्वप्रधानमन्त्री केपी शर्मा ओलीले यो हाउसमै नआएर राजीनामा दिए हुन्छ। जस जसलाई परमादेश भन्ने लागेको छ उहाँहरुले राजिनामा दिए हुन्छ। यो प्रतिनिधि सभा निर्वाचित भएर आएको हो। जनताको मतले आएको हो।’
आफूहरु जनताबाट निर्वाचित भएकाले जे मन लाग्यो त्यही बोल्ने र जुन सदनमा उभिएको छ त्यसैको अपमान गर्न नहुने बताए। उनले दुई तिहाईको कम्युनिष्ट सरकार समाप्त भएर गठवन्धनको सरकार बनेको ओलीलाई सम्झाउन आग्रह गरे।
उनले यसलाई अप्राकृतिक भन्न नमिल्ने बताए। उनले आफ्नो सरकार पनि कसैसँग मिलेर बनेको र अहिले अरुले मिलेर बनाउँदा कसरी अपवित्र भयो भनी ओलीलाई प्रश्न गरे।
‘आफू त्यही गर्दा ठीक। अनि, अहिले अरुले गर्दा बेठीक?’ यादवले भने ‘थोरै पनि नैतिकता हुनुपर्यो नि। आफू प्रधानमन्त्री बन्न संविधान र सहमति तोड्ने, पदका लागि सबै बर्बाद गर्ने अनि शानले सबै खतम भनेर हुटिट्याउँले संसार थामे झै गर्ने?’
यादवले यसरी टिप्पणी गरिराख्दा एमालेका सचेतक विशाल भट्टराई नियमापत्ति गरे। उनले व्यक्तिप्रति इंगित गरेर मानसिक रुपमा बिग्रेको टिप्पणी गरेको भन्दै आपत्ति जनाए। उनले के आधारमा यस्तो गरेको भन्दै आलोचना गरे। संसद्मा यस्ता अर्मयादित कार्य भएको भन्दै रेकर्डबाट हटाउन माग गरे। सभामुखको स्थानमा रहेका घनश्याम खतिवडाले ध्यानाकर्षण बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
