काठमाडौं– बिहान साढे ९ बजेदेखि बसेको सत्ता गठबन्धनको कार्यदल बैठक १२ बजे सकिएको छ। प्रधानमन्त्री निवास बालुवाटारमा बसेको कार्यदल बैठक संसद बैठक भएकाले पुनःअपराह्न ४ बजे बस्नेगरी विनानिष्कर्ष सकिएको कार्यदलका एक सदस्यले बताए।
सरकारले गर्ने न्यूनतम साझा कार्यक्रमलाई अपराह्न बस्ने बैठकले अन्तिम रुप दिएर शीर्ष नेतालाई प्रतिवेदन बुझाइने उनकाे भनाइ छ।
सरकारका काम कारवाहीलाई प्रभावकारी बनाउन तीन दलका नेता सम्मिलित कार्यदल बनाइएको छ।
कार्यदलको संयोजकमा पूर्णबहादुर खड्का रहेका छन्। कार्यदलले सत्ता साझेदार पाँच दलसँग परामर्श गरेर साझा कार्यक्रम बनाउने कार्यादेश पाएको छ। कार्यदलमा भने कांग्रेस, माओवादी र जसपाका नेतामात्रै सहभागी छन्।
सरकारले अंगाल्ने न्यूनतम साझा कार्यक्रम तय भइसकेपछि मात्रै मन्त्रिपरिषद विस्तार हुने जनाइएकाे छ।
प्रधानमन्त्री शेरबहादुर देउवा प्रधानमन्त्री भएको झण्डै महिना दिनसम्म मन्त्रिपरिषद्ले पूर्णता नपाएको भन्दै विरोध हुँदै आएको छ। देउवा सरकारमा चार मन्त्री र एक राज्य मन्त्री मात्रै छन्।
कार्यदलमा कांग्रेसबाट मिनेन्द्र रिजाल र रमेश लेखक, माओवादी केन्द्रबाट वर्षमान पुन र देव गुरुङ, जनता समाजवादीबाट महेन्द्र राय यादव र राजेन्द्र श्रेष्ठ सदस्य छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
