काठमाडौं- नेकपा एमालेका अध्यक्ष केपी शर्मा ओली र वरिष्ठ नेता माधवकुमार नेपालपक्ष पार्टी एकताका लागि भन्दै आफूहरुबीच निकै बढिसकेको दुरी घटाउने प्रयासमा देखिएका छन्।
सोमबार दुवैपक्षको छुट्टाछुट्टै स्थायी कमिटी बैठकपछि नेताहरुबाट व्यक्त प्रतिक्रियालाई विश्वास गर्ने हो भने अब ओली र नेपाल दुवै एकापसमा संवाद गर्नसमेत तयार भएका छन्।
एमालेभित्रको संघर्षलाई निकास दिने भन्दै दशबुँदे सहमति जुटाएको र त्यसपछि विघटन भइसकेको एकता कार्यदलमा रहेका दुवैपक्षका नेताहरुबीचको भेटघाट, छलफल र उनीहरुको संयुक्त दौडधुपले यो अवस्थामा पुर्याएको हो। तर, यसको औपचारिक संकेत भने एक दुई दिनमा मात्र देखिनेछ।
गत फागुन २३ गते सर्वोच्च अदालतले तत्कालीन नेकपालाई वैधता नदिई एमाले र माओवादीलाई ब्युँताइदिएपछि सम्भवतः पहिलो पटक ओली र नेपालपक्षले एक अर्काप्रति नरम बन्ने संकेत देखाएका छन्।
सोमबार आफ्नोपक्षको स्थायी कमिटी बैठकमा बोल्दै एमाले वरिष्ठ नेता नेपालले पार्टीमा आफूले सम्मानजनक एकता चाहेको बताएका थिए। बैठकलाई सम्बोधन गर्नेक्रममा उनी अरु दिनभन्दा नरम रुपमा प्रस्तुत भएका थिए र पटकपटक पार्टी एकताको कुरा गरेका थिए।
आफू पार्टी एकताविरोधी नभएको बताउँदै नेपालले पार्टी अध्यक्ष ओलीसहितका नेताहरुसँग सम्माजनक र यथार्थपरक एकताको पक्षमा रहेको उल्लेख गरे।
‘हामी यस बैठकमा एकता र समन्वयकै विषयमा छलफल गर्न उपस्थित भएका छौं। हाम्रो प्रयत्न एकता होस भन्ने छ। कमरेडहरुको एकताको भावनासँग मेरो पनि एकरुपता छ’, नेपालको भनाई उदृढ गर्दै स्थायी कमिटी सदस्य रघुजी पन्तले भने, ‘पार्टीमा सम्मानजनक एकताको पक्षमा छु। त्यसलाई ख्याल गरेर छलफल गर्नुस्।’
बैठकमा बोल्दै नेपालले कार्यदलका सदस्यहरुले सहमति कायम गर्न सक्ने हो भने आफू तयार रहेको समेत उल्लेख गरेका छन्। नेपालले त्यसक्रममा पार्टीमा दुईटा अध्यक्षको प्रसंग उठाएका छन्।
‘त्यो अध्यक्ष पहिलो र दोस्रो अध्यक्ष भन्ने जस्तो अमूर्त कुरा होइन’, नेपाललाई उद्धृत गर्दै विघटित कार्यदलका एक सदस्यले भने, ‘त्यो भनेको संयुक्त अध्यक्ष हो, बैठकको अध्यक्षता आलोपालो गर्ने अध्यक्ष हो, पार्टीका निर्णयमा संयुक्त हस्ताक्षर चल्ने अध्यक्ष हो।’ नेपालले यति हुन सकेमा सम्मानजनक एकताको आधार तयार हुनेसमेत बताएका थिए।
‘विघटित कार्यदलले गरेको १० बुँदे सहमतिको मर्म अक्षरशः पालना हुन्छ र अध्यक्षका रुपमा यस्तो भूमिका सुनिश्चित हुन्छ भने म तयार छु, तपाईंहरु त्यहीअनुसार सहमति गर्नुस्’, नेपालको भनाई उद्धृत गर्दै ती सदस्यले भने।
नेपालपक्षको स्थायी कमिटी बैठकले सार्वजनिक अभिव्यक्ति दिँदा शब्द चयन गर्दा मर्यादा र शिष्टतालाई ध्यान दिने निर्णय गरेको छ। ‘सार्वजनिक रुपमा अभिव्यक्ति दिँदा शब्द चयनमा मर्यादा र शिष्टतामा ध्यान दिनुपर्ने विषयमा छलफल भयो,’ नेता पन्तले भने, ‘पार्टी एकता टुंगोमा पुर्याउन दुवै पक्ष संयमित, जिम्मेवार, संवेदनशील भएर गम्भीर हुने कुरा भएको छ।’
अब पार्टी एकताका विषयमा ओली र नेपालले छिट्टै भेटघाट गर्ने तयारी गरिएको पन्तले बताए। तर, उनीहरुबीच भेटको मिति, समय र स्थान भने तय भइसकेको छैन।
अहिले नेपालपक्षलाई सरकारमा सहभागी गराउन कांग्रेस र माओवादी नेताहरु सक्रिय छन्। सरकारमा जान नेपाललाई उनीपक्षकै सांसदहरुले पनि दबाब बढाइरहेका छन्। तर, नेपाल पहिलो प्राथमिकता पार्टी एकताको पहल भएकाले सरकारका विषयमा अघि बढ्न चाहिरहेका छैनन्।
नेपालपक्षमा अहिले पनि एक पक्षले अलग पार्टी बनाएर जानुपर्ने लबिइंग गरिरहेको छ। सरकारमा जान दबाब दिइरहेको त्यही पक्षले हो। तर, अहिलेकै अवस्थामा नेपाललाई पार्टी विभाजन गर्न समेत केन्द्रीय सदस्य र संसदीय दलको ४० प्रतिशत पुर्याउन कठिन छ। त्यो अवस्थामा सांसद पद नरहने भएकाले आफ्नोपक्ष भनिएका नेताहरुले समेत साथ छोड्न सक्ने भएकाले सरकारमा जाने विषयलाई नेपालले प्राथमिकतामा राखेका छैनन्।
ओलीले पनि अब नेपालपक्षलाई कारवाही गरेर पार्टीबाट निष्काशन गर्ने आकलन भइरहेको थियो। तर, ओलीले सोमबारको बैठकबाट नेपालपक्षलाई कारवाही गर्ने भन्दा पनि उनीहरुका लागि स्पेस राखेर आफ्ना गतिविधि गरेर जाने नीति अख्तियार गरेका छन्। स्थायी कमिटी बैठकपछि प्रवक्ता प्रदीपकुमार ज्ञवालीले पत्रकारसँग नेपालपक्ष समेत यही पार्टीमा समाहित हुने भन्दै नरम टिप्पणी गरे।
आफ्नो पक्षका गतिविधि भने नरोकिने भन्दै उनले पार्टीमा जहाँ सहमति हुन्छ, त्यहीँबाट माधव नेपालपक्ष समाहित हुने बताए। ‘पार्टीभित्र उत्पन्न समस्याको समाधानका निम्ति छलफलहरु जारी छन्। परिणाम के हुन्छ भन्नेबारे अहिले नै भन्न नसकिएला। हामीले पार्टीको गतिलाई अगाडि बढाएका छौ’, ज्ञवालीले भने, ‘पार्टीमा एकतावद्ध भएर अगाडि बढ्ने साथीहरुका लागि पर्याप्त स्पेस पनि सुरक्षित गरिएको अवस्था छ। पूर्ण विभाग नबनाउनुको कारण त्यस्तो हो। भोलि काममा फर्किने साथीहरुको लागि ठाउँ सुरक्षित राखिएको हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
