अखिल नेपाल फुटबल संघ (एन्फा) का वरिष्ठ उपाध्यक्ष पंकजविक्रम नेम्वाङ र मुख्य प्रशिक्षक अब्दुल्लाह अलमुताइरीबीचको विवादले नयाँ मोड लिएको छ। एन्फाले टुंग्याउन नसकेपछि यो विवाद युवा तथा खेलकुद मन्त्रालयतिर सारिदिएको थियो। अर्को सूचना नदिइएसम्म प्रशिक्षणमा सहभागी नहुन प्रशिक्षक अलमुताइरीलाई निर्देशन पनि दिएको थियो।
तर, अलमुताइरी भने प्रशिक्षणमा सहभागी भएका छन्। उनले आफ्ना माग पूरा नगरे नेपाल छाड्ने धम्की पनि दिएका छन्। यसपछि विवाद झनै बढ्ने देखिएको छ।
एन्फा स्रोतका अनुसार गएको शुक्रबारको बैठकमा मुख्य प्रशिक्षक र वरिष्ठ उपाध्यक्षबीचको विवादको छानबिन नसकिएसम्म अलमुताइरीलाई प्रशिक्षणमा सहभागी नगराउने सहमति भएको थियो। तर, शनिबार नै प्रशिक्षणका क्रममा दुई टीमबीच भएको खेलमा अलमुताइरी सहभागी भएका हुन्।
सातदोबाटोस्थित एन्फा मैदानमा दुई युवा खेलाडी पुजन उपरकोटी र नितिन थापाले प्रशिक्षण सम्हालेको टोलीबीच मैत्रिपूर्ण खेल खेलाइएको थियो। दोस्रो हाफमा वैकल्पिक खेलाडीका रुपमा अलमुताइरी पनि मैदान प्रवेश गरेर खेलेका थिए। अलमुताइरीले नै खेलाडीलाई रणनीतिक रुपमा अब्बल बनाउने लक्ष्यसहित हप्ताको एक दिन मैत्रीपूर्ण खेलमा प्रशिक्षणको जिम्मेवारी दिँदै आएका छन्।
प्रशिक्षक अलमुताइरी। फाइल तस्वीर
वरिष्ठ उपाध्यक्ष नेम्वाङका अनुसार प्रशिक्षक अलमुताइरीलाई प्रशिक्षणमा सहभागी नहुन एन्फाले पत्र नै पठाएको छ। ‘विवादित मुद्दा किनारा नलगाउँदासम्म उहाँलाई प्रशिक्षणमा सहभागी नहुन एन्फाले पत्र पठाएको छ। यसरी विवाद सतहमा रहँदै गर्दा उहाँ मैदान उत्रिन पाउनु हुन्न,’ उनले भने।
एन्फा प्रवक्ता किरण राईले पनि आफूले प्रशिक्षक अलमुताइरीलाई पत्र पठाएको बताए। ‘प्रशिक्षक मैदान उत्रिएको देखेपछि राष्ट्रिय टोलीका व्यवस्थापक मधुसुदन उपाध्यायलाई पत्र काटेका छौं। अर्को सूचना जारी नभएसम्म प्रशिक्षण नगराउनु भनेर पत्र पठाएका हौं,’ उनले भने। सहमति विपरीत अलमुताइरी प्रशिक्षणमा सहभागी भएकोमा एन्फा प्रवक्ता राई पनि असन्तुष्ट छन्। उपाध्यायले भने आफूले पत्र पाइनसकेको बताए।
यसैबीच, एन्फाले राष्ट्रिय टोलीका खेलाडीलाई १० दिन विश्राम दिएको छ। पूर्वनिर्धारित तालिका अनुसार नै खेलाडीलाई विश्राम दिएको एन्फाले जनाएको छ। साफ च्याम्पियनसिप सरेकाले अघिल्लो साता नै एन्फाले लामो समयदेखि घरबाहिर रहेका कारण खेलाडीलाई विश्राम दिने योजना बनाएको थियो।
नेपाल छाड्ने धम्की
प्रशिक्षक अलमुताइरीले एन्फामा निवेदनसँगै घटनासँग सम्बन्धित प्रमाणहरु बुझाएको बताएका छन्। एन्फाकै आग्रहअनुसार आफूले राजीनामा पनि स्थगित गरेको उनले बताएका छन्।
तर, १० अगस्ट २०२१ सम्म आफ्नो माग पूरा नभए राजीनामाको प्रक्रिया पूरा गरेर नेपाल छाड्ने उनले बताएका छन्। फिफा र एएफसीको छानबिन समितिमा आफूले दर्ता गराएको निवेदन र उपलब्ध गराएको सबुत प्रस्तुत गर्नुपर्ने उनको माग छ। यस्तै, उक्त घटनाबारे सरकारी निकायबाट छानबिन हुनुपर्ने र उक्त रिपोर्ट सार्वजनिक गरिनुपर्ने उनको भनाइ छ।
प्रशिक्षक अलमुताइरी
आफूलाई असुरक्षाको महसुस भएको तथा आफ्नो समर्थनमा एन्फा अगाडि नआएको प्रशिक्षक अलमुताइरीले गुनासो गरेका छन्। उनी शुक्रबारको बैठकका लागि एन्फा परिसरमा प्रवेश गर्दा त्यहाँ सुरक्षा व्यवस्था कडा पारिएको थियो। उनी मिडियासामु पनि प्रस्तुत भएनन्। सहायक प्रशिक्षक किरण श्रेष्ठ र गोलकिपिङ प्रशिक्षक विकास मल्लसँगै गाडी चढेर बाहिरिएका थिए।
उनले राजीनामा घोषणा गरेदेखि शुक्रबारसम्म फेसबुक पनि चलाएका थिएनन्। ‘उहाँ तनावमा हुनुहुन्थ्यो। त्यसैले सामाजिक सञ्जालबाट टाढा बस्नुभएको थियो। त्यसमाथि एन्फा बैठकमा आफ्नो कुरा नराखेसम्म सामाजिक सञ्जालमा आउने प्रश्नको उहाँले जवाफ दिन थियो,’ उनी निकट एक एन्फा पदाधिकारीले भने।
यसअघि प्रशिक्षक अलमुताइरीले दुई पत्रकारसहित एन्फा पदाधिकारीले आफूविरुद्ध समाचार प्रकाशित गराएको भन्दै निवेदन दिएका थिए। ‘म प्रशिक्षक भएर आएदेखि नै एन्फाका पदाधिकारी र कर्मचारीलाई सम्मान गर्दै आएको छु। तर, एन्फाकै जिम्मेवार पदाधिकारीको संलग्नतामा लगातार मेरो प्रतिष्ठा र विश्वासमा आघात पुग्नेगरी समाचार लेखिएको छ। उनीहरुले मेरो व्यक्तिगत स्वतन्त्रताको हनन गर्दै निजी विषयमा दखल दिएका छन्,’ पत्रमा भनिएको छ।
एकपक्षीय रुपमा एसियाली फुटबल र नेपाली समर्थकमाझ आफ्नो छवी धुमिल्याउने प्रयास भइरहेको उनको भनाइ छ। ‘एक व्यावसायिक फुटबल प्रशिक्षकको नाताले मेरो पेशामै प्रश्न उठेको छ। यस घटनामा वरिष्ठ उपाध्यक्ष संलग्न छन्। एन्फासँग उनको व्यावसायिक सम्बन्ध सुरक्षित छैन। उनले गरेको कार्य अपमानजनक छ। यसले फिफाको कोड अफ एथिक्स र एएफसीको कोड अफ कन्डक्ट पनि उल्लङ्घन भएको छ,’ उनले लेखेका छन्।
खेलाडीलाई प्रशिक्षण दिँदै प्रशिक्षक अलमुताइरी। फाइल तस्वीर
साफ च्याम्पियनसिपको तयारी प्रभावित हुने चिन्ता
वरिष्ठ उपाध्यक्ष र मुख्य प्रशिक्षकबीचको विवाद मन्त्रालयमा पुग्दा यसको प्रभाव खेलाडीहरुलाई पर्ने निश्चित छ। मन्त्रालय स्रोतका अनुसार एन्फाबाट पठाएको पत्र शनिबार मात्र पुगेको छ। एन्फाका प्रवक्ता राईले पनि छानबिन समिति बनाउन पत्र पठाएको पुष्टि गरे। उनले भने, ‘हामीले शुक्रबार छानबिन गर्न पत्र पठाउने निर्णय गरेका हौं। आजको आजै त मन्त्रालय पनि छानबिन गर्न समिति बनाउन सक्ने स्थितिमा छैन र हुँदा पनि हुँदैन। केही दिन समय लाग्ला।’
साफ च्याम्पियनसिप अक्टोबरको पहिलो साता आयोजना हुने तय छ। एन्फा कार्यसमितिको शुक्रबार बसेको आकस्मिक बैठकले प्रतियोगिता नेपालमा गर्ने निर्णय गरेको छ। बंगलादेशले कोरोना माहामारीका कारण प्रतियोगिता आयोजना नगर्ने भएपछि नेपालसहित श्रीलंका, माल्दिभ्स र भारतले दाबेदारी प्रस्तुत गरेका छन्। माल्दिभ्सले श्रीलंकासँग मिलेर संयुक्त रुपमा आयोजनाको दाबी प्रस्तुत गरेको छ। भारत र नेपालले एकल रुपमा प्रतियोगिता आयोजना गर्न चाहेका छन्।
एन्फा बैठकले अक्टोबर पहिलो साता हुने प्रतियोगिता नेपालमा आयोजना गर्न आवश्यक पर्ने १० करोड रुपैयाँ बराबरको विस्तृत प्रस्तावसहित साफमा अनुरोध गर्ने निर्णय गरेको छ। यस्तै, साफ च्याम्पियनसिप नेपालमा आयोजना गर्न सरकारले पनि ५ करोड रुपैयाँ प्रदान गर्ने निर्णय गरेको छ।
प्रशिक्षणमा रहेका खेलाडी
साफको तयारीका लागि नेपालले बंगलादेश, भारत र सिंगापुरको राष्ट्रिय टिमसँग मैत्रीपूर्ण खेल खेल्न एन्फाले पत्राचार गर्ने निर्णय पनि गरेको छ। राष्ट्रिय टिमलाई आवश्यकता अनुसार मैत्रीपूर्ण खेल खेलाउने एन्फाको निर्णय छ। तर, प्रशिक्षक नै विवादमा फसेपछि अब नेपालको तयारी कमजोर हुने चिन्ता गर्न थालिएको छ।
एन्फा पदाधिकारी आफ्नै अडानमा
वरिष्ठ उपाध्यक्ष नेम्वाङले पनि आफू अनुकूल छानबिनको निर्णय नआए प्रतिवेदन अस्वीकार गर्ने बताएका छन्। ‘एन्फा नेपाली फुटबलको सर्वोच्च संस्था हो, यसबाट हामीले जुन अपेक्षा राखेका छौं, त्यो पूरा भएन,’ उनले भने, ‘प्रशिक्षकले अनुशासन तोडेका छन् र वरिष्ठ उपाध्यक्षमाथि गम्भीर आरोप लगाएका छन्। उनीमाथि कारबाही हुनैपर्छ।’
एन्फा आफूले गर्नुपर्ने निर्णय तथा काममा चुकेको पनि उनको आरोप छ। ‘कर्मचारीले संस्थाको वरिष्ठ उपाध्यक्षलाई विनाआधार आरोप लगाउनु अनुशासनहीन काम हो। संस्थाले बोल्ड निर्णय गर्न सक्नुपर्छ। प्रशिक्षकको दबाबमा आएर संस्थाका मान्छेहरुले केही नबोल्ने अवस्था भयो,’ उनले भने।
पंकजविक्रम नेम्वाङ, एन्फा वरिष्ठ उपाध्यक्ष
यता, प्रशिक्षकले सामाजिक सञ्जालमार्फत् राजीनामाको घोषणा गरेको घटनाबाट प्रवक्ता राई पनि खुसी नभएको बताइएको छ। उनले शनिबार राति फेसबुकमा स्टेटस लेख्दै प्रवक्ताको जिम्मेवारी त्याग्ने संकेत गरेका थिए। ‘म मर्छु होला बरु, तर फुटबल खेलको राष्ट्रिय तथा अन्तररास्ट्रिय मान्यता र सिद्वान्तविरुद्ध पाइला चाल्न सक्दिनँ,’ उनले लेखेका छन्, ‘नेपाली गरीब भएको प्रचार गरेर सहयोग प्राप्त भयो भन्दैमा सबै मान्यता र स्वाभिमान नै झुक्ने गरि सम्झौता गर्न मिल्ला र?’
किरण राई, प्रवक्ता
राईले आइतबार दिउँसो १ बजे पत्रकार सम्मेलन गर्ने जानकारीसमेत दिएका थिए। तर, एक घण्टा अगाडि पुनः सूचना दिएर कार्यक्रम स्थगित भएको जनाए। ‘मेरा केही विषय र एन्फाका केही विषयहरुबारे जानकारी दिन पत्रकार सम्मेलन गर्न खोजेको थिएँ। तर, केही तयारी पुगेन र स्थगित गरेको हो,’ उनले भने।
यद्यपि, शनिबार उनले आफू निकट जिल्ला नेतृत्व र सहकर्मीसँग प्रवक्ताको जिम्मेवारीबाट राजीनामा दिने बताएका थिए। तर, निर्धारित कार्यक्रमको केही घण्टा अघिमात्र उनी राजीनामा दिने निर्णयबाट पछाडि हटेको बताइन्छ। ‘राजीनामाको तयारी गरेपछि अध्यक्षज्यूले बिहान उहाँसँग लन्च मिटिङ गरेर सम्झाउनु भएको भन्ने सुनेको छु,’ एक एन्फा पदाधिकारीले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
