कैलाली- सम्झौता गरेको १० वर्षसम्म पनि पुल नबन्दा हुलाकी राजमार्ग भएर यात्रा गर्ने यात्रुले सास्ती व्यहाेर्नु परेको छ। धनगढीदेखि नेपालगञ्ज जाने सडक पिच भएपनि बर्सातको बेला सो सडक खण्ड अवरुद्ध हुने गरेको छ।
भजनी नगरपालिकास्थित कान्द्रा नदीमा निर्माणाधीन पुल १० वर्षदेखि अलपत्र अवस्थामा छ। पुलका चारवटा स्पानमध्ये हालसम्म दुईवटाको काम मात्र सकिएको छ।
पटक-पटक म्याद थप्ने तर काम सम्पन्न नगर्ने निर्माण कम्पनीको तेस्रोपटक थपिएको म्याद समेत यही साउनमा सकिँदै छ। तर पुल कहिले बन्ने हो अझै अनिश्चित छ।
हुलाकी राजमार्ग अन्तर्गत पर्ने भजनी नगरपालिकाको वडा नम्बर ३ र ५ जोड्ने यो पुल निर्माणका लागि सरकारले ३१ जेठ २०६८ मा लामा–शाल्पा–शेर्पा–बिरुवा जेभीसँग सम्झौता गरेको थियो। सम्झौता गरेको १० वर्ष बित्दा समेत भने अहिलेसम्म ७० प्रतिशत मात्रै काम सम्पन्न भएको हुलाकी सडक आयोजना कार्यालय धनगढीका प्रमुख रामपुकार जैसवालले बताए।
४ करोड ४३ लाख रुपैयाँमा ठेक्का सम्झौता गरेको उक्त पुलको लम्बाइ १ सय मिटर र चौडाइ ७ दशमलव २ मिटर रहेको आयोजना प्रमुख जैसवालले बताए।
आर्थिक वर्षको अन्त्यतिर बेला बेलामा ठेकेदारले केही समान र मान्छे पठाएर काम गरेको जस्तो मात्रै गर्ने र फेरि काम रोक्ने गरेको स्थानीयले बताएका छन्। स्थानीयले ठेकेदारले एक दशकसम्म पनि काम अलपत्र पार्दा सम्बन्धित निकायले भने पुल निर्माणमा चासो नदेखाएको भन्दै आक्रोश पोख्ने गरेका छन्।
भजनी नगरपालिका–५, का पदम साउदले वर्षाैंदेखिको खोला तर्नुपर्ने पीडा पुल बनेपछि हट्ने सपना सपनामात्रै भएको बताए। उनले पुल निर्माण नहुनुमा ठेकेदार मात्रै दोषी नभई ठेक्का दिने सरकारी निकायको समेत लापरवाही रहेको बताए।
पुल निर्माण नहुँदा वर्षायाममा जोखिम मोलेर नदी तर्नुपर्ने बाध्यता छ। कान्द्रा नदी किनारमै कृषि व्यवसाय गरिरहेका जय बुढाले पुल बन्न लागेको हेर्दै १० वर्ष बितेको बताए। उनले भजनीबाट हुलाकी सडक हुँदै सदरमुकाम धनगढी पुग्न निक्कै छोटो पर्ने भएपनि वर्षा लागेपछि लामो बाटो तय गर्नु पर्ने बताए।
पुल बन्न सुरु हुँदा नदी पार गर्दाका दुःखका दिन जाने भए भनेर खुशी भएका स्थानीय ढिलासुस्तीले निराश र आक्रोशित छन्।
जोखिम मोलेर नदी तर्नुपर्ने बाध्यता
कान्द्रा नदीमा निर्माणाधीन पुलले भजनी नगरपालिका–३, ठेकी र वडा नम्बर ५ नयाँबस्तीलाई जोड्छ। नौवटा वडा रहेको भजनी नगरपालिकाका ५, ७, ९ नम्बर वडा कान्द्रा नदीपारी पर्छन्। नदीमा पुल नहुँदा ५ र ७ वडाका बासिन्दाले वर्षायाममा भजनी बजार, नगरपालिका कार्यालय र नगरका अन्य गाउँ पुग्न सास्ती खेप्नुपर्छ। हुलाकी राजमार्गको निर्माणाधीन पुल हेर्दै डुंगा तर्नुपर्ने बाध्यता स्थानीयहरुको रहेको छ। एक पटक नदी तरेको मान्छे र साइकलको १०/१० र मोटरसाइकलको ४० रुपैयाँ तिर्नु पर्छ।
तेश्रोपटक थपिएको अवधि सकिँदै
पुलको काम सक्न तेस्रोपटक थप भएको अवधि समेत यही साउनमा सकिँदैछ। सुरुमा ठेक्का भएपछि पुलको डिजाइन परिवर्तन गरिँदा र पछि ठेकेदारका कारण काममा ढिलाइ भएको हुलाकी सडक आयोजना कार्यालय धनगढीका प्रमुख जैसवालले बताए।
डिजाइन परिवर्तन भएपछि २०७२ मा निर्माण कम्पनीलाई साढे दुई वर्षको समय दिइएको थियो। उक्त अवधिमा ठेकेदार कम्पनीले पिलर राख्ने काम पनि गर्न सकेन। २५ असार २०७५ मा निर्माण अवधि सकिएपछि ठेकेदार सम्पर्कविहीन भएको जैसवालले बताए।
कोरोनाले काम प्रभावित भएपछि आयोजनाहरूमा ६ महिना म्याद थप गर्ने सरकारको निर्णयअनुसार यो पुल निर्माणको अवधि पनि साउनमा सकिँदै छ।
पटक-पटक ठेकेदार कम्पनी र आयोजनालाई झक्झकाएको बताउँदै भजनी नगरपालिकाका मेयर शेरबहादुर चौधरीले काम गरेजस्तो गर्ने तर, फेरि ठेकेदार नै बेपत्ता हुने गरेको बताए। उनले यो पुलले भजनी नगरपालिकाको विकास निर्माणमा समेत बाधा पुर्याएको उनले बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।