काठमाडौं– दीपा नेपालीमाथि भएको जातीय विभेदको घटनामा गृह मन्त्रालय मातहतका कर्मचारी श्रीकृष्ण बिडारीसहित चार जनाले सफाइ पाएका छन्। दुई वर्षभन्दा पहिलाको जातीय विभेदको घटनामा बिडारीसँगै उनकी पत्नी राधिका बिडारी, जनकराज ढुंगाना र सन्तोषी ढुंगानालाई जिल्ला अदालतले काठमाडौंले सफाइ दिएको हो।
न्यायाधीश नवराज दाहालको इजलासले चारै जनाविरुद्ध लागेको जातीय र अन्य सामाजिक छुवाछुत र भेदभावको अभियोगमा दाबी नपुग्ने ठहर गर्दै असार २९ गते सफाइ दिएको हो।
उनीहरु चार जनाविरुद्ध मुलुकी फौजदारी अपहराध संहिताको दफा १६६ अनुसार जातिपातीको आधारमा छुवाछुत तथा अन्य भेदभावपूर्ण व्यवहार गरेको कसूरमा मुद्दा चलेको थियो।
कैलाली सुख्खडकी नेपाली उच्च शिक्षाका लागि काठमाडौं आएकी थिइन्। सुरुमा उनी त्रिभुवन विश्वविद्यालयको छात्राबासमा बसेर पढिन्। पछि भाइबहिनी पनि काठमाडौं पढ्न आउने भएपछि उनले डेरामा बस्नु पर्ने भयो। डेराका लागि कोठा खोज्दै उनी तारकेश्वर नगरपालिका–१० स्थित श्रीकृष्ण बिडारीको घरमा पुगेकी थिइन्।
२०७६ फागुनमा उनले बिडारीको घरमा भाडामा बस्ने निधो गरिन्। त्यसबेला बिडारीले उनको जात सोधेनन्। गृह मन्त्रालय मातहतका कर्मचारी समेत रहेका बिडारीले दीपा बिडारीको घरमा बस्नलाई सरेकै दिन उनकी छोरी शर्मिलाले दीपासँग परिचय गरेकी थिइन्। दीपाले आफ्नो नाम थर बताएपछि उनीहरुले तत्काल कोठा खाली गर्न भनेका थिए। त्यसबेला बिडारीले आमाको मृत्यु भएकाले ‘घर बिटुलो हुनसक्ने’ भन्दै ‘दलितलाई घरमा राख्न नसकिने’ बताएका थिए।
दीपाले तत्काल कोठा नछाड्ने बताएपछि घर मर्मत गर्नुपर्ने भन्दै सरकारी कर्मचारी समेत रहेका बिडारीले त्यसबेला ३५ दिने सूचना नै टाँस गरेका थिए। दीपाले प्रहरीमा उजूरी गरेर यी सबै विषय खुलाएकी थिइन्।
सूचना टाँस गरेर आफूलाई दबाब दिने काम भएपछि दीपाले त्यसबेला राष्ट्रिय मानवअधिकार आयोगलाई समेत गुहारेकी थिइन्। घटना यतिसम्म भयो कि दीपा क्याम्पस गएका बेला बिडारीकी श्रीमतीले उनको कोठामा नै ताला लगाइदिइन्। विभेद अति भएपछि दीपाले प्रहरीमा जाहेरी दिएकी थिइन्।
तर, प्रहरीमा जाहेरी दर्ता गर्न पनि उनले ठूलै सकस बेहोर्नु परेको थियो। उजूरी दर्ता भएपछि भने सरकारी कर्मचारी बिडारी जातीय विभेद गरेको आरोपमा पक्राउ परे। पछि काठमाडौं जिल्ला अदालतबाट उनी ३५ हजार रुपैयाँ धरौटीमा रिहा भएका थिए। सोही मुद्दामा अहिले अदालतले चारै जनालाई अभियोगमा दाबी नपुग्ने भन्दै सफाइ दिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
