क्यारेबियन सागरमा बेपत्ता ७ नेपालीको कथा : श्रीमान युक्रेन र श्रीमती नेपालमा बसेर मानव बेचबिखनमा संलग्न

सुरक्षा/अपराध

नारायण अधिकारी बिहीबार, असार ३१, २०७८ १८:३५

उद्धार गरिएका म्याग्दीका प्रकाश बिक र उपचाररत व्यक्ति (बाँयाबाट)।

काठमाडौं- अवैध बाटो हुँदै अमेरिका हिँडेका ७ नेपाली कोलम्बियास्थित क्यारेबियन सागरमा डुंगा दुर्घटना हुँदा बेपत्ता भएको घटनामा संलग्न भएको आरोपमा दाङकी गोमा जिसी पक्राउ परेकी छिन्। जिसीलाई मानव बेचबिखन अनुसन्धान ब्यूरोको टोलीले दाङबाट पक्राउ गरी बिहीबार काठमाडौं ल्याइपुर्‍याएको छ।

असार ७ गते डुंगा दुर्घटना भएर ७ नेपाली बेपत्ता भएको घटना बाहिरिएपछि उनीहरुलाई अमेरिका पठाउने एजेन्टको खोजी सुरु भएको थियो। सो क्रममा गोमा सिनमा देखिएकी थिइन्। विभिन्न प्राविधिक पाटोबाट अनुसन्धान गर्दा काठमाडौंका विभिन्न स्थानमा देखिए पनि उनी पक्राउ पर्न सकेकी थिइन्।

काठमाडौंबाट जहाज चढी दाङ पुगेको सूचना पाएपछि प्रहरीले उनलाई दाङबाट पक्राउ गरी आज काठमाडौं ल्याएको हो। उनीमार्फत् नै अवैध तरिकाले अमेरिका जान लागेकाहरुमध्ये ७ जना कोलिम्बयाको क्यारेबियन सागरमा डुंगा दुर्घटना हुँदा बेपत्ता भएका थिए। बेपत्ता हुनेहरुमा दाङका एन्जल बुढामगर, दाङ पश्चिम हापुरेका रेशम डिंगामगर, दाङ तुलसीपुरकै हेमराज अधिकारी, पर्वत कुश्माका दिनेश गौतम, राजु गुरुङलगायत छन्। म्याग्दीका प्रकाश विकको भने सकुशल उद्धार भएको थियो।

एन्जलले २७ लाख ७२ हजार, हेमराजले २५ लाख रुपैयाँ गोमाका पति टोपबहादुरलाई बुझाएको देखिएको ब्यूरोका एक अधिकारीले बताए। रकम बुझाएको रसिद समेत फेला परेको ब्यूरो स्रोतले जानकारी दिएको छ।

उनीहरुलाई भिजिट भिषामा दुबई पुर्‍याई विभिन्न देश हुँदै कोलम्बिया पुर्‍याइएको थियो। दुबईमा जिसीकै फ्ल्याटमा उनीहरुलाई १ महिना राखिएको थियो।

श्रीमान युक्रेन, श्रीमती नेपाल बसेर मानव बेचबिखन
यस घटनामा संलग्न रहेका भनिएका टोपबहादुर जिसी र गोमा जिसी श्रीमान श्रीमती हुन्। उनीहरु दुवै जनाको मिलेमतोमा मानव बेचबिखनको घटना भएको प्रहरी अनुसन्धानबाट खुलेको छ। नेपालबाट विभिन्न प्रलोभन देखाएर अमेरिकाको आकर्षण देखाउने काममा गोमाले सहयोगी भूमिका खेल्ने गरेको ब्यूरोका प्रवक्ता तथा एसपी अनुरागकुमार द्विवेदी बताउँछन्।

अवैध बाटो हुँदै अमेरिका जानेहरुबाट लिएको रकम समेत गोमाको बैंक खातामा जम्मा भएको प्रहरी अनुसन्धानबाट खुलेको छ। उनको बैंक खातामा ७ लाख रुपैयाँ भन्दा बढी जम्मा भएको देखिएको ब्यूरोले जनाएको छ। पीडित परिवारका आफन्तले पनि विभिन्न व्यक्तिमार्फत् गोमालाई रकम दिएको र अनुसन्धानबाट पनि रकम लिएको खुलेपछि उनलाई पक्राउ गरिएको द्विवेदीले जानकारी दिए।

नेपाल भन्दा बाहिरको बन्दोबस्त भने गोमाका श्रीमान टोपबहादुरले गर्ने गरेको अनुसन्धानबाट खुलेको छ। विभिन्न देश हुँदै अमेरिका पुर्‍याउने काममा उनको प्रत्यक्ष संलग्नता रहेको पाइएको छ। उनको संलग्नता रहेको पाइएपछि अनुसन्धानमा जुटेको प्रहरीले टोपबहादुर भने हाल युक्रेनमा बसेर मानव बेचबिखनको सञ्जाल चलाउने गरेको पत्ता लगाएको छ।

उनी कहिले युक्रेन पुगे भन्नेबारे यकिन भने भइनसकेको प्रहरी अधिकारी बताउँछन्। इन्टरपोलमार्फत् उनीबारे थप बुझ्ने प्रयास भइरहेको द्विवेदीले बताए।

यसअघि पनि मानव बेचबिखनमा पक्राउ परेका थिए जिसी
हाल युक्रेनमा रहेका भनिएका टोपबहादुर यसअघि पनि मानव बेचबिखनको आरोपमा पक्राउ परेर धरौटीमा छुटी पुन: मानव बेचबिखनमा लागेको पाइएको छ।

दाङकै एक व्यक्तिलाई नेपालबाट अवैध बाटो हुँदै अमेरिका पुर्‍याएको घटनामा उनी पक्राउ परेका थिए। ती व्यक्तिलाई नेपालबाट जमुनाह नाका हुँदै दिल्ली, रसिया, स्पेन, बोलिभिया, पेरु, निकारागुवा, होन्डुरस, ग्वाटेमाला र मेक्सिको हुँदै जिसीले अमेरिका पुर्‍याएका थिए।

मासिक ५ हजार अमेरिकी डलर कमाई हुने र केही समयमा ग्रिनकार्ड समेत पाउने प्रलोभन देखाएर जिसीले ती व्यक्तिलाई अमेरिकाको सपना देखाएका थिए। त्यसपछि ती व्यक्तिले सुरुमा १५ लाख ९७ हजार रुपैयाँ जिसीलाई दिएका थिए। पछि पटक पटक गरी अमेरिका पुग्दासम्म ५५ लाख ९७ हजार रकम ती व्यक्तिले जिसीलाई बुझाएका थिए।

रकम बुझाएपछि २०७३ चैतमा ती व्यक्तिलाई नेपालबाट भारत पुर्‍याइएको थियो। त्यसपछि विभिन्न देश हुँदै अमेरिका पुर्‍याइएको थियो। अमेरिकी प्रहरीले ती व्यक्तिलाई पक्राउ गरी १७ महिनासम्म जेल हालेको थियो। पछि दूतावासमार्फत् रिहा भएर उनी नेपाल डिपोर्ट भएका थिए। नेपाल फर्केपछि जिसीविरुद्ध मानव बेचबिखनमा ती व्यक्तिले जाहेरी दिएका थिए।

जोहरी परेसँगै घोराही उपमहानगरपालिका–१५ का जिसी २०७६ वैशाख ६ गते मानव बेचबिखन मुद्दामै पक्राउ परेका थिए। उनी ३ महिनापछि असार ४ गते १५ लाख धरौटी तिरी रिहा भएका थिए। जिसीले उच्च अदालतमा जिल्ला अदालतले आदेश गरेको १५ लाख धरौटी फिर्ता गरी पाउँ भनि पुनरावेदन समेत दिएका थिए।

यसरी धरौटी तिरेर रिहा भएका जिसी नै अहिले फेरि मानव बेचबिखनको घटनामा संलग्न हुनु गम्भीर रहेको एसपी द्विवेदी बताउँछन्। ‘धरौटीमा रिहा नभएको भए सायद अहिले कोलम्बिया डुंगा दुर्घटनामा नेपाली पर्दैनथिए होला। तर, धरौटीमा रिहा भएकै व्यक्ति पुन: मानव बेचबिखनमा संलग्न हुँदा यस्ता गम्भीर घटना दोहोरिए’ द्विवेदीले भने।

१५८ नेपाली अमेरिकाबाट डिपोर्ट
लाखौं खर्च गरेर र अनेक चुनौती मोल्दै अवैध तरिकाले अमेरिका जाने क्रम रोकिएको छैन। अमेरिकाबाट डिपोर्ट भएकाहरुको तथ्यांकले यो पुष्टि गर्छ। आर्थिक वर्ष २०७५/७६ मा मात्रै ४५ जना नेपाली अमेरिकाबाट डिपोर्ट भएका थिए। डिपोर्ट भएका सबै ४५ जना पुरुष हुन्। उनीहरु विभिन्न मुलुक हुँदै अवैध तरिकाले अमेरिका छिरेका थिए।

त्यसैगरी आर्थिक वर्ष २०७६/७७ मा डिपोर्ट हुनेको संख्या बढेर ८३ पुगेको थियो। डिपोर्ट हुनेमध्ये २ जना महिला थिए। आर्थिक वर्ष २०७७/७८ मा भने ३० जना डिपोर्ट भएको तथ्यांक छ। डिपोर्ट भएकामध्ये २ जना महिला छन्। सोही आर्थिक वर्षमा अमेरिका छिर्न लागेका ७ जना कोलम्बियामा डुंगा दुर्घटना भएर बेपत्ता भएका छन्। एक जनाको उद्धार गरी कोलिम्बयामै उपचार भइरहेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।