कञ्चनपुर– खानेपानीको विकल्प नहुँदा शुक्लाफाँटा नगरपालिका–९ नौखरीको राना परिवारले बस्ती नजिकै भएर बग्ने सनवोरा नदीको पानी पिउनका लागि उपयोग गर्दै आएको छ।
थोरै पैसाले ह्याण्ड पम्प गाड्न नसकिने भएपछि रानाको परिवारले नदीको पानी प्रयोग गर्दै आएको हो। रानाजस्तै यहाँका २० परिवारले एक दशकदेखि नदीको पानी पिउन बाध्य छन्। ‘नदीको पानी अशुद्ध छ भनेर जान्दाजान्दै पनि बाध्यताले पिउनु परेको छ।’, छोटीदेवी रानाले भनिन्,‘थोरै गहिराइमा ह्याण्ड पम्प गाड्दा पानी आउँदैन। गहिरो गाड्नका लागि आर्थिक अवस्थाले भ्याउँदैन।’
नदीको पानी पिउँदा पखाला, आउँलगायत पानीजन्य रोग लाग्ने गरेको छ। विभिन्न निकायमा सुरक्षित पानीको व्यवस्था गरिदिन माग गर्दै आए पनि हालसम्म नभएको सुम्ली रानाले बताइन्। कमैयाबाट मुक्त भएपछि पुनःस्थापन गराइएका परिवार सोही बस्तीमा बस्दै आएका छन्। बस्तीका सबै परिवारसँग साँझ बिहानको खाना जुटाउनका लागि मजदूरी एक मात्रै सहाराको रुपमा रहेको छ।
‘मजदूरीको पैसाले परिवारको खाना जुटाउन निकै गाह्रो छ।’, गोरे खत्रीले भने,‘ह्याण्ड पम्प गाड्नका लागि कम्तीमा पनि ५० हजार रुपैयाँभन्दा बढी खर्च लाग्ने हुन्छ। त्यो जुटाउन बस्तीका बासिन्दाको आर्थिक हैसियतले धान्दैन।’
वर्षातका बेला धेरै परिवारले धमिलो पानीलाई भाँडामा जम्मा गरी थिग्रिएपछि पिउनका लागि प्रयोग गर्दै आएका छन्। केहीले दुई किलोमिटर टाढाको बस्तीबाट बोकेर पानी ल्याई पिउँछन्। लुगा धुन र वस्तुभाउलाई पानी खुवाउन यहाँका बासिन्दाले नदीको पानी नै चलाउँछन्। शुक्लाफाँटा नगरपालिका–९ का वडाध्यक्ष रमेशबहादुर ऐर बस्तीमा पानीको व्यवस्था नभएको कुरा पहिलादेखि नै थाहा भएकाले अब यहाँका बासिन्दाले सास्ती खेप्नु नपर्ने बताउँछन्।
‘पानीको व्यवस्था नभएको सो बस्तीमा छ वटा स्वचालित ह्याण्ड पम्प गाड्ने योजना रहेकाले आउँदो आर्थिक वर्षभित्रै ती कार्य पूरा गर्छौं।’, उनले भने,‘विगतमा पानीकै लागि यहाँका बासिन्दाले निकै सास्ती खेपेका छन्। शुद्ध पिउने पानी उपलब्ध गराई जनप्रतिनिधि आएको विश्वास यहाँका बासिन्दालाई दिन चाहन्छौँ।’ रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770352723.png)
-1764146706.png)
