काठमाडौं- पायोनियर मोटो कर्प प्रालिले निसानको विद्युतीय गाडी लिफ ईभी नेपाली बजारमा भित्र्याएको छ। सुरक्षित र दिगो भविष्यको प्रत्याभूतिसहित उक्त गाडी भित्र्याएको कम्पनीको भनाइ छ।
जेरो इमिसन विशेषता भएको निशान लिफ इलेक्ट्रिक भेहीकल (विद्युतीय सवारी साधन) निसानको उत्कृष्ट, भरपर्दो र आकर्षक डिजाइनको नयाँ उत्पादन भएको कम्पनीले जनाएको छ। जापानबाट आयात हुने यो पहिलो विद्युतीय सवारीसाधन हो।
‘निर्माता कम्पनीको उद्देश्य समाजमा सवारीसाधनमा परिवर्तन ल्याउनुका साथै शक्तिशाली र सजिलो सवारीसाधन उपभोक्तासमक्ष पुर्याउनु हो,’ कम्पनीले भनेको छ। यसको मूल्य ५९ लाख ९९ हजार रूपैयाँ तोकिएको छ।
निसान मोटर इण्डियाका अध्यक्ष सिनान ओजकोकका अनुसार विद्युतीय सवारीसाधनको सेगमेन्टको लागि नयाँ अध्याय अंकित गर्दै निसानले नेपालमा दोस्रो जेनेरेसनको निसान लिफ सार्वजनिक गरेको हो। निसानको ‘निसान इन्टेलिजेन्ट मोबिलिटी’ अन्तर्गत हाम्रा ग्राहकहरूले स्मार्ट, आरामदायी, वातावरणमैत्री र सुरक्षित अनुभवको लाभ लिनसक्ने उनको भनाइ छ। ‘दिगो भविष्यप्रति हाम्रो प्रतिबद्धतालाई कायम गर्दै हाम्रा ग्राहकहरूप्रतिको आत्मविश्वास र उत्साहजनक जीवनलाई पनि निरन्तरता दिनेछौं,’ उनले भनेका छन्।
कम्पनीका अनुसार यसको इन्टेलिजेन्ट पावरअन्तर्गत यसमा ४० किलोवाट आवरको ब्याट्री जडान गरिएको छ। र, एकपल्ट चार्ज गर्दा ३११ किलोमिटरसम्म चलाउन सकिन्छ। यसको अधिकतम गुड्ने क्षमता प्रतिघन्टा १४० किलोमिटर रहेको छ।
निसान लिफ ११ वटा विभिन्न कलर अप्सनमा उपलब्ध हुनेछ जसमा छ वटा सिंगल-टोन कलर रहेको छ भने पाँच वटा डुअल-टोन कलर रहेको छ। निसान लिफ ईभीबाट एउटा गाडीबाट अर्को गाडीमा चार्ज गर्न सकिन्छ भने पावर होममासमेत पठाउन सकिन्छ।
निसान लिफको ब्याट्रीमा कम्पनीले आठ वर्ष (एक लाख ६० हजार किलोमिटर)सम्मको वारेन्टी प्रदान गर्ने कम्पनीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
