काठमाडौं- चितवनको राप्ती नगरपालिका-३ कि २३ वर्षीया युवती सुजिता भण्डारीको मृत्यु घटनाको अनुसन्धानमा समस्या भएको जिल्ला प्रहरी कार्यालय चितवनले जनाएको छ। बिहीबार पत्रकार सम्मलेन गर्दै चिवतन प्रहरी प्रमुख, एसपी ओम अधिकारीले भिड, अभियन्ता र युट्युबरका गतिविधिका कारण अनुसन्धानमा समस्या भएको दाबी गरे।
अनुसन्धान गर्नुपर्ने बेलामा भिड नियन्त्रण गर्नुपरेको, कर्फ्यू लगाउनु परेको, भिडकै कारण मृतकको आफन्तलाई समेत भेट्न मुस्किल परेको र युट्युबरको गतिविधिका कारण अनुसन्धानमा समस्या भएको उनको भनाइ छ।
असार ११ गते गतेदेखि बेपत्ता भण्डारी १० दिनपछि मृत भेटिएकी थिइन्। राप्ती नगरपालिकाकै ब्रम्हस्थानी सामुदायिक जंगलमा च्याउन टिप्न गएका स्थानीयले आइतबार मृत व्यक्ति देखेपछि प्रहरीलाई खबर गरेका थिए। शव भेटिएपछि अनुसन्धानमा खटिएको प्रहरीले अहिलेसम्म अनुसन्धानमा उल्लेख्य प्रगति गर्न सकेको छैन।
पोष्टमार्टम रिपोर्टमा समेत उनको मृत्युको कारण खुल्न सकेको छैन। राष्ट्रिय विधि विज्ञान प्रयोगशालामा भिसेरा परीक्षण गर्ने तयारी भएको छ। भिसेराबाट विष पिए, नपिएको थाहा हुन्छ। उनको शव नजिकै ड्युको बोतलमा विषादी जस्तो पदार्थ भेटिएको थियो।
साथीको घर जान्छु भनेर निस्केकी भण्डारीले सोही दिन आफू अहरणमा परेको भन्दै दिदीलाई जानकारी गराएकी थिइन्। अपरहण परेको जानकारी पाइएपछि केन्द्रीय अनुसन्धान ब्यूरो (सीआईबी) समेतको सहयोगमा अनुसन्धान भएपनि प्रहरीले केही जानकारी पाउन सकेको थिएन।
अपहरणमा परेकी भनिएकी भण्डारीले एउटै व्यक्तिसँग ६ पटकसम्म कल गरेको समेत पाइएको छ। उक्त समयमा मोबाइलमा डाटा समेत अन रहेको पाइएको अनुसन्धानबाट खुलेको छ। घटनाको अनुसन्धान जारी रहेको र अहिलेसम्म बताउन मिल्ने कुनै प्रगति नभएको एसपी अधिकारीले पत्रकार सम्मेलेनमा बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
